Keti nge ke zola kuzaba kieleka na yina me tala Nzambi disongidila, yandi kele nani, nki mambu yandi ke zolaka mpi ke mengaka, mpi nki kele lukanu na yandi? Na Ndinga na yandi Biblia, Yehowa Nzambi ke monisaka kieleka yonso ya me tala yandi. Kansi, muntu yonso ve lenda tanga Biblia mpi kubakisa kieleka yina mbote-mbote. Sambu na nki? Sambu kubakisa kieleka yina ya kimpeve kele dibaku yina muntu yonso ve ke bakaka. Bika beto tadila mambu yina Yezu tubaka na diambu yai.​—Tanga Matayo 11:25.

Verse yina ke yantika ti bangogo yai: “Na ntangu yina, Yezu tubaka nde.” Yo yina, mbala ya nkaka mambu yina Yezu ke zola kutuba kele mvutu na mambu yina katukaka kusalama. Yandi katukaka kunganina bantu ya bambanza tatu ya Galilea, kisika yandi salaka bimangu kansi bo buyaka kukuma balongoki na yandi. (Matayo 11:20-24) Nge lenda kudiyula nde, ‘Inki mutindu muntu mosi lenda mona bimangu ya Yezu mpi kubuya kundima kieleka yina yandi longaka?’ Bo buyaka kukuma balongoki ya Yezu sambu bo vandaka ntima ngolo.​—Matayo 13:10-15.

Yezu zabaka nde sambu na kubakisa kieleka ya me tala Nzambi, beto kele na mfunu ya mambu zole: Lusadisu ya Nzambi mpi nkadilu ya mbote ya ntima. Yezu ke tuba nde: “Tata, Mfumu ya zulu ti ya ntoto, mono ke kumisa nge na ntwala ya bantu sambu nge me bumbaka mambu yai na bantu ya mayele ti ya ngangu mpi nge me monisaka yo na bana ya fioti.” Keti nge ke mona sambu na nki beto lenda tuba nde kubakisa kieleka yina kele na Biblia kele dibaku? Yehowa kele ti nswa ya kubumba kieleka to kumonisa yo sambu yandi kele “Mfumu ya zulu ti ya ntoto.” Kansi, muntu yonso kele ti dibaku ya kubakisa kieleka; Nzambi ke pona-ponaka ve. Inki bikuma ke pusaka yandi na kumonisa kieleka na bantu ya nkaka kansi na ba nkaka ve?

Yehowa ke sepelaka na bantu ya kudikulumusa kansi ya lulendo ve. (Yakobo 4:6) Yandi ke bumbaka kieleka na “bantu ya mayele ti ya ngangu”​—bantu ya mayele mpi ya me longukaka ya nsi-ntoto, bayina lulendo na bo mpi kuditudila ntima ke pusaka bo na kumona nde bo kele ve na mfunu ya lusadisu ya Nzambi. (1 Bakorinto 1:19-21) Kansi yandi ke monisaka kieleka na “bana ya fioti”​—bayina ke kwisaka na yandi ti ntima ya masonga, mpi ke kudikulumusaka bonso bana ya fioti. (Matayo 18:1-4; 1 Bakorinto 1:26-28) Yezu, Mwana ya Nzambi, zabaka mbote-mbote mitindu yina ya bantu. Bamfumu mingi ya mabundu ya me longukaka mpi ya kuvandaka lulendo bakisaka ve nsangu ya Yezu, kansi milobi-mbisi yina vandaka bantu ya kudikulumusa bakisaka yo. (Matayo 4:18-22; 23:1-5; Bisalu 4:13) Ata mpidina, bamvwama ya nkaka mpi bantu ya me longukaka yina monisaka kudikulumusa ya masonga kumaka balongoki ya Yezu.​—Luka 19:1, 2, 8; Bisalu 22:1-3.

Beto vutukila ngiufula yina beto yulaka na luyantiku: Keti nge ke zola kuzaba kieleka ya me tala Nzambi? Kana ee, nge lenda zwa kikesa na kuzaba nde Nzambi ke telaminaka bantu yina ke kudimonaka bonso bantu ya mayele na nsi-ntoto. Kansi, yandi ke songaka mambote na yandi na bayina, bantu ya mayele ya nsi-ntoto lenda mona nde bo kele mfunu ve. Kana nge ke longuka ndinga ya Nzambi ti kudikulumusa, nge lenda vanda na kati ya bantu yina Yehowa ke pesa dikabu mosi ya mbalu​—kubakisa kieleka ya me tala yandi. Kubakisa kieleka yina ta kumisa luzingu na nge mfunu bubu yai mpi yo lenda nata nge na “luzingu ya kieleka,” disongidila luzingu ya kukonda nsuka na nsi-ntoto ya mpa ya lunungu yina Nzambi me silaka. *​—1 Timoteo 6:12, 19; 2 Piere 3:13.