Inki nge ke yindula sambu na Desembri 21, 2012, dati yina kele na kalandrie ya Bamaya, yina bantu mingi tubaka nde yo zolaka kusoba ntoto ya mvimba? Kana nge ke vingila kusalama ya diambu mosi ya mbi, yo lenda lembika ntima na nge na kuzaba nde yo ta salama ve; kansi kana nge ke vingila kusalama ya diambu mosi ya mbote, nge lenda lemba nitu kana yo me salama ve. Mpi kana nge ke vingila nsuka ya nsi-ntoto tuka bamvula mingi, nge lenda yambula kutudila yo dikebi sambu yo ke sukinina. Keti yo kele kaka mbandu yina ke monisa mutindu badati yina bantu bikulaka sambu na nsuka ya nsi-ntoto vandaka ya luvunu?

Inki beto lenda tuba sambu na “nsuka ya nsi-ntoto” yina Biblia ke tubilaka? (Matayo 24:3, King James Version) Bantu ya nkaka ke waka boma nde ntoto ta fwa na tiya. Ba nkaka ke sepelaka kumona mambu yina ta salama na nsuka ya nsi-ntoto. Bantu yankaka diaka ke tudilaka yo diaka ve dikebi sambu bo ke vingilaka nsuka yina tuka ntama mpenza. Kansi, keti masolo ya luvunu to mambu ya kieleka ke vandaka na kisina ya bangindu yai?

Nge lenda yituka na kulonguka mambu yina Biblia ke tuba sambu na nsuka ya nsi-ntoto. Biblia ke pesaka kaka ve bikuma yina beto fwete vingila nsuka ya nsi-ntoto kansi yo ke tendulaka mpi nde bantu ya nkaka lenda lemba nitu kana nsuka ya nsi-ntoto ke sukinina. Beto ke lomba nge na kutadila bamvutu yina Biblia ke pesa na bangiufula ya nkaka yina bantu mingi ke yulaka sambu na nsuka ya nsi-ntoto.

MVUTU YA BIBLIA: ‘Nzambi me tulaka ntoto na zulu ya bafondasio na yo na mpila nde yo nikana ve ata fioti, to kimakulu.’​—NKUNGA 104:5.

Ntoto ta fwa ve, yo vanda na tiya to na mutindu ya nkaka. Nkutu, Biblia ke longaka nde ntoto kele kisika yina bantu fwete zinga mvula na mvula. Nkunga 37:29 ke tuba nde: ‘Bantu ya mbote ta zinga kimakulu na ntoto.’​—Nkunga 115:16; Yezaya 45:18.

Na nima ya kuganga ntoto, Nzambi tubaka nde yo vandaka “mbote mpenza” mpi yandi ke monaka yo kaka mbote. (Kuyantika 1:31) Nzambi me kanaka ve na kufwa ntoto, nkutu yandi ke sila na “kubebisa bantu yina ke bebisaka ntoto” mpi yandi ta tanina yo sambu yo beba ve kimakulu.​—Kusonga 11:18.

Kansi, mambu yina kele na 2 Piere 3:7 lenda yitukisa nge. Verse yina ke tuba nde: “Zulu mpi ntoto ya ntangu yai, bo me bumba yo sambu na kufwa yo na tiya.” Keti yo ke monisa ve nde ntoto ta fwa na tiya? Mbala mingi, Biblia ke sadilaka bangogo “zulu,” “ntoto” mpi “tiya” na mutindu ya kifwani. Mu mbandu, ntangu Nkunga 97:1 ke tuba nde: “Nge ntoto, vanda na kiese,” yo ke sadila ngogo “ntoto” sambu na kumonisa bantu.

Baverse yina kele na ntwala mpi na nima ya 2 Piere 3:7 ke monisa nde zulu, ntoto mpi tiya yina bo ke tubila na verse yina kele ya kifwani. Verse 5 mpi 6 kele na kuwakana ti Mvula ya Ngolo ya bilumbu ya Noa. Na Mvula yina ya ngolo, ntoto ya ntama fwaka, kansi ntoto yai ya beto ke zinga fwaka ve. Mvula ya Ngolo fwaka bantu ya mbi, to “ntoto.” Yo fwaka mpi “zulu” disongidila, bamfumu yina vandaka kuyala bantu yina vandaka na ntoto. (Kuyantika 6:11) Na mutindu mosi, 2 Piere 3:7 ke bikula lufwa ya kimakulu ya bantu ya mbi mpi baluyalu na bo ya mbi, kaka mutindu kima mosi ke fwaka na tiya kimakulu.

MVUTU YA BIBLIA: “Nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.”​—1 YOANE 2:17.

“Nsi-ntoto” yina ke luta, kele ve ntoto yai, kansi bantu yonso yina kele na nsi-ntoto yina luzingu na bo kele ve na kuwakana ti luzolo ya Nzambi. Kaka mutindu munganga yina ke pasulaka bantu lenda katula maladi ya kansere sambu na kugulusa muntu  yina ke bela, Nzambi ta katula bantu ya mbi na mpila nde bantu ya lunungu kuvanda ti luzingu ya mbote na ntoto. (Nkunga 37:9) Na mutindu yina, “nsuka ya nsi-ntoto” kele diambu mosi ya mbote.

Bambaludi ya nkaka ya Biblia monisaka dibanza ya mutindu yina sambu na “nsuka ya nsi-ntoto,” yina balulaka bangogo yai na “nsukisilu ya ngidika ya bima” to “nsuka ya nsungi.” (Matayo 24:3, New International Version) Sambu ntoto yai ta fwa ve mpi bantu ta guluka na nsuka ya nsi-ntoto, keti yo ke monisa ve nde nsungi mosi ya mpa to ngidika mosi ya mpa ta yantika? Mvutu ya Biblia kele ee, sambu yo ke tubilaka “ngidika ya bima yina ke kwisa.”​—Luka 18:30.

Yezu bingaka nsungi yina ke kwisa “ntangu bima yonso ta kuma ya mpa.” Na ntangu yina, yandi ta sala na mpila nde luzingu ya bantu kuvanda bonso yina Nzambi kanaka tuka luyantiku. (Matayo 19:28) Na ntangu yina beto ta sepela

• Na paladisu ya ntoto, kisika bantu yonso ta vanda na ngemba mpi na lutaninu.​—Yezaya 35:1; Mishe 4:4.

• Na kisalu ya mfunu mpi ya ke sepedisa.​—Yezaya 65:21-23.

• Na mutindu maladi yonso ta mana.​—Yezaya 33:24.

• Na mutindu minunu ta vutuka batoko.​—Yobi 33:25.

• Na mutindu bafwa ta futumuka.​—Yoane 5:28, 29.

Kana beto ke sala “luzolo ya Nzambi,” mpi ke lungisa mambu yina yandi ke lomba beto, mfunu kele ve ya kuwa nsuka ya nsi-ntoto boma. Nkutu, beto fwete vingila yo ti kivuvu.

MVUTU YA BIBLIA: “Ntangu beno ta mona mambu yai ke bwa, beno zaba nde Kimfumu ya Nzambi me finama.”​—LUKA 21:31.

Profesere Richard Kyle sonikaka na mukanda na yandi (The Last Days Are Here Again) nde: “Bansoba ya kintulumukina mpi mambu ya mpasi yina ke salama ke pusa bantu na kubikula nde nsuka ya nsi-ntoto me finama.” Mingi-mingi kana bo ke kuka ve kutendula bansoba mpi bampasi yina.

Kansi, baprofete ya Biblia yina tubilaka mambu ya me tala nsuka sosaka ve kutendula kikuma yina mambu ya mbi vandaka kusalama na bilumbu na bo. Nkutu, bo vandaka ya kupemama na Nzambi sambu na kutubila mambu yina ta monisa nde nsuka ya nsi-ntoto me finama. Tadila mwa bambikudulu yina mpi tala nge mosi kana yo ke lungana na ntangu na beto.

•   Bamvita, nzala, kunikana ya ntoto mpi bamaladi yina ke fwaka bantu mingi na mbala mosi.—Matayo 24:7; Luka 21:11.

• Mubulu ke kuma mingi.​—Matayo 24:12.

• Bantu ke bebisa ntoto.​—Kusonga 11:18.

• Bantu ke kudizola, ke zola mbongo mpi biese kansi ke zola Nzambi ve.​—2 Timoteo 3:2, 4.

• Mabuta ke kabwana.​—2 Timoteo 3:2, 3.

• Bantu mingi ke tula ve dikebi na banzikisa ya ke monisa nde nsuka me finama.​—Matayo 24:37-39.

• Kulongama ya nsangu ya mbote ya Kimfumu Nzambi na ntoto ya mvimba.​—Matayo 24:14.

Mutindu Yezu tubaka yo, ntangu beto ta mona “mambu yai yonso” beto zaba nde nsuka ya nsi-ntoto me finama. (Matayo 24:33) Bambangi ya Yehowa ke kwikilaka nde banzikisa yina kele ya kieleka, mpi bo ke zabisaka bantu ya nkaka mambu yina bo ke kwikilaka na kusamunaka na bansi 236.

MVUTU YA BIBLIA: “Na ntangu bo ta tuba nde: ‘Ngemba mpi lutaninu!’ ebuna na mbala mosi lufwa ta kwisila bo kaka mutindu misongo ke simbaka nkento yina kele na divumu; mpi bo ta tina ve ata fioti.”​—1 BATESALONIKA 5:3.

Biblia ke fwanisa kufwa ya nsi-ntoto ti luyantiku ya mpasi ya kubuta, sambu ata mama mosi ve lenda tina mpasi yina mpi mpasi yina ke kwisaka na kintulumukina. Nsungi yina ke nata na nsuka ya nsi-ntoto kele bonso divumu, sambu mama yina me finama na kubuta ke zabaka bidimbu yonso yina ke monisa nde yandi ta buta ntama mingi ve. Bantangu ya nkaka, munganga na yandi lenda zabisa yandi dati mosi buna ya siki-siki yina yandi ta buta; kansi ata mambu ke sukinina, yandi ke vandaka kaka ti kivuvu nde mwana na yandi ta butuka ntama mingi ve. Kiteso mosi, ata nsuka me kwisa ve na badati yina bantu vandaka kuvingila yo, yo ke soba ve bidimbu yina ke monisa nde beto kele na “bilumbu ya nsuka.”​—2 Timoteo 3:1.

‘Kana bidimbu yina ke monisa nde beto me finama na nsuka kele pwelele,’ nge lenda kudiyula nde: ‘Sambu na nki bantu mingi ke buya kundima yo?’ Biblia ke monisa nde, ntangu nsuka ta finama bantu mingi ta vwenza banzikisa na yo. Na kisika ya kundima bansoba ya nene yina ke salama na bilumbu ya nsuka, bo ta vwenza bantu yina ke kwikila yo mpi ta tuba nde: “Banda na  kilumbu yina ba-nkaka na beto me lalaka na lufwa, mambu yonso kele kaka mutindu yo vandaka katuka na luyantiku ya lugangu.” (2 Piere 3:3, 4) Na bangogo ya nkaka, banzikisa ya bilumbu ya nsuka kele pwelele, kansi bantu mingi ta ndima yo ve.​—Matayo 24:38, 39.

Disolo yai me tubila kaka mwa banzikisa yina kele na Masonuku ya ke monisa nde nsuka me finama. * Keti nge ta zola kuzaba mambu mingi ya nkaka? Kana mpidina, lomba Bambangi ya Yehowa na kulonguka Biblia ti nge ya ofele. Kulonguka yina lenda salama na nzo na nge, na kisika ya nkaka yina nge ta zola to ata nkutu na telefone. Diambu mosi kaka yina nge lenda sala kele: kupesa ntangu na nge, mpi nge ta bikila yo mambote mingi.