Mono butukaka na Saint-Domingue, na République dominicaine mpi mono vandaka mwana ya nsuka na dibuta ya bana iya. Bibuti na mono vandaka bantu yina me longukaka mpi bo vandaka na mfunu ya kusansa bana na bo sambu na kuvanda bantu ya mbote mpi ya masonga. Bamvula iya na ntwala ya kubutuka na mono, bibuti na mono kutanaka ti bamisionere ya dibundu ya Mormon. Sambu bo sepelaka na bunkete mpi kulwata ya batoko ya dibundu yina, kukonda kusukinina bibuti na mono bakaka lukanu nde dibuta na beto fwete vanda bantu ya ntete ya kukota na dibundu ya Mormon to Église de Jésus-Christ des saints des derniers jours.

Ntangu mono vandaka kuyela, mono vandaka kusepela na bisalu yina vandaka kusalama na dibundu mpi mutindu bo vandaka kuzitisa luzingu ya dibuta mpi bikalulu ya mbote. Mono vandaka na kiese ya kuvanda nsambidi ya dibundu ya Mormon mpi mono vandaka ti lukanu ya kukuma misionere.

Ntangu mono vandaka na bamvula 18, dibuta na beto kwendaka kuzinga na États-Unis sambu mono kukota na universite mosi ya mbote mpenza. Na nima ya mvula mosi, mama leki na mono ti bakala na yandi, yina kele Bambangi ya Yehowa, kwisaka kutala beto na Floride. Bo lombaka beto na kukwenda ti bo na lukutakanu mosi ya distrike ya me simbama na Biblia. Mono yitukaka ntangu mono monaka nde bantu yonso yina vandaka na nziunga na mono vandaka kusosa baverse na Biblia mpi kubaka banoti. Yo yina, mono lombaka biki ti papie mpi mono yantikaka kusala mutindu mosi.

Na nima ya lukutakanu ya distrike, mama leki mpi bakala na yandi tubaka nde sambu mono vandaka kusepela kukuma misionere, bo lendaka kusadisa mono na kulonguka mambu ya Biblia. Mono yindulaka nde yo vandaka dibanza mosi ya mbote, sambu na ntangu yina mono zabaka mingi ya Mukanda ya Mormon kuluta Biblia.

Ntangu mono vandaka kusolula ti bo masolo ya Biblia na telefone,  mama leki ti bakala na yandi vandaka kusiamisa mono ntangu yonso na kufwanisa malongi ya dibundu na mono ti ya Biblia. Bo zolaka nde, mono mosi kumona mambu yina Biblia ke longaka mpenza.

Mono vandaka kundima malongi mingi ya dibundu ya Mormon, kansi mono zabaka mpenza ve kana yo vandaka na kuwakana ti malongi ya Biblia. Mama leki tindilaka mono Réveillez-vous ! ya Novembri 8, 1995, yina Bambangi ya Yehowa basisaka ya kuvandaka ti masolo yina vandaka kutubila malongi ya dibundu ya Mormon. Mono yitukaka na kumona nde mono zabaka mpenza ve malongi mingi ya dibundu ya Mormon. Yo pusaka mono na kusala bansosa na site ya Internet ya dibundu ya Mormon sambu na kuzikisa nde Réveillez-vous ! vandaka kutuba mambu ya kieleka. Yo vandaka mpenza ya kieleka, mpi mono ndimaka yo diaka ntangu mono kwendaka kutala bamize ya dibundu ya Mormon na Utah.

Ntangu yonso, mono vandaka kukwikilaka nde Mukanda ya Mormon mpi Biblia vandaka na kuwakana. Kansi ntangu mono yantikaka kutanga Biblia na dikebi yonso, mono monaka nde malongi ya Mormon swaswanaka mpenza ti ya Biblia. Mu mbandu, na Ezekiele 18:4, Biblia ke tuba nde moyo ke fwaka. Kansi, na Alma 42:9, Mukanda ya Mormon ke tuba nde: “Moyo lenda fwa ve ata fioti.”

Katula yo, malongi ya dibundu ya Mormon yina vandaka kutubila zola ya insi vandaka kuyangisa mono mingi. Mu mbandu, bo longaka bantu ya Mormon nde kilanga ya Edeni vandaka na insi ya Jackson na Missouri, na nsi États-Unis. Mpi bantwadisi ya dibundu vandaka kulonga nde, “kilumbu mosi Nzambi ta yala nsi-ntoto ya mvimba na nzila ya luyalu ya États-Unis.”

Na kutadila malongi yina, mono vandaka kudiyula mambu yina ta kumina insi na mono mpi bansi ya nkaka. Kilumbu mosi na nkokila, ntangu leke mosi ya Mormon yina vandaka kubaka formasio sambu na kukuma misionere bingaka mono na telefone, mono zabisaka yandi diambu yina. Mono yulaka yandi kaka kana yandi ta ndima kunwana ti mpangi na yandi ya Mormon kana bansi na bo zole ke nwana. Mono yitukaka ntangu yandi tubaka nde ee! Mono longukaka malongi ya dibundu ya Mormon na mudindu mpi na nima mono kwendaka kusolula ti bantwadisi ya dibundu. Bo zabisaka mono nde, bamvutu ya bangiufula na mono kele maswekamu yina kilumbu kele ta zabana bonso nsemo ke kuma ngolo.

Sambu bantendula na bo lembisaka mono nitu, mono yindulaka mingi sambu na mono mosi mpi mpusa na mono ya kukuma misionere ya Mormon. Mono bakisaka nde, mono zolaka kukuma misionere sambu mono vandaka kuzola kusadisa bantu ya nkaka. Kikuma ya nkaka vandaka sambu nde bantu kuzitisa mono. Kansi mono zabaka mpenza ve mambu mingi sambu na Nzambi. Ata mono vandaka kutanga Biblia mbala mingi, mono vandaka kubaka yo ve na mbalu. Mono zabaka ve lukanu ya Nzambi sambu na ntoto mpi bantu.

Na nsadisa ya kulonguka na mono ti Bambangi ya Yehowa, mono longukaka mambu mingi mu mbandu, zina ya Nzambi, mambu yina ke salamaka kana beto me fwa, mpi mukumba ya Yezu na kulungana ya lukanu ya Nzambi. Nsuka-nsuka mono zabaka mbote-mbote mukanda yai ya kitoko, mpi mono ke sepelaka kuzabisa ba nkaka kieleka yina mono vandaka kulonguka. Ntangu yonso, mono zabaka nde Nzambi kele, kansi ntangu yai mono lenda solula ti yandi na kisambu bonso nduku na mono ya ngolo. Mono bakaka mbotika na Yuli 12, 2004 mpi kumaka Mbangi ya Yehowa; bangonda sambanu na nima mono yantikaka kisalu ya Bukristu ya ntangu yonso.

Na nsungi ya bamvula tanu, mono salaka na biro ya ke twadisaka kisalu ya Bambangi ya Yehowa na ntoto ya mvimba ya kele na Brooklyn, na New York. Mono vandaka na kiese mingi mutindu mono pesaka maboko na kisalu ya kubasisa Babiblia mpi mikanda yina ke tendulaka Biblia, yina ke sadisaka bamilio ya bantu na nsi-ntoto mpi mono ke landa kusadisa ba nkaka na kuzaba Nzambi.