DISOLO YINA KELE NA LUTITI YA ZULU
Bo Ke Fwa Bantu Mingi ya Me Sala Kima Ve!
Noelle vandaka mwana mosi ya mawete yina vandaka kuzola kusala bifwanisu. Kilumbu mosi na nkokila yandi vandaka kutambula-tambula na nima ya nzo mpi na mbala mosi yandi bwaka na pisine mpi fwaka na masa. Yo bikalaka bamposo zole kaka na ntwala nde yandi lungisa bamvula iya.
Charlotte, Daniel, Olivia, Josephine . . . Yai kele bazina ya bana 20 na kati ya bana 26 ya bamvula sambanu to nsambwadi yina bo fwaka na munduki na ekole mosi na Connecticut, na États-Unis, na Desembri 14, 2012. Ntangu bo vandaka kuzika bo, Prezida Obama tangaka bazina ya bana yina mpi zabisaka bantu yina vandaka na mawa nde: “Bisumbula ya mutindu yai fwete suka.”
Bano vandaka ti bamvula nana ntangu bo katukaka na Iraq na mvu 1996 mpi kwendaka ti dibuta na yandi na Norvège. Banduku na yandi vandaka kubinga yandi Sun Rays. Kansi, yo kele mawa sambu na Yuli 22, 2011, Bano vandaka na kati ya bantu 77 yina muntu mosi ya nku fwaka, mpi muntu yango kudikumisaka nde: “Mono ke lomba pardo . . . sambu mono fwaka ve bantu mingi kuluta.”
Mbala mingi, bo me taka masolo ya mutindu yina na ntoto ya mvimba. Yindula mawa mpi mpasi yina ke katukaka na ba aksida, kufwa bantu na nku, bamvita, kiterorizme, bisumbula ya lugangu, mpi na bampasi ya nkaka. Mbala mingi, kukonda kikuma, bo me fwaka bantu mingi ya me sala kima ve mpi yo me nataka bampasi mingi!
Bantu ya nkaka ke pesaka Nzambi foti mpi ke yindulaka nde Ngangi na beto ke kudibanzaka ve sambu na bantu. Bankaka ke tubaka nde Nzambi ke monaka bampasi na beto kansi yandi ke buyaka kaka kumanisa yo. Nkutu, bankaka diaka ke tubaka nde bisumbula yina me kanamaka na ntwala. Yo ke monana nde bantu kele ti bangindu ya kuswaswana na diambu yai. Na wapi beto lenda zwa bamvutu ya mbote mpi ya beto lenda tudila ntima? Na masolo yina ke landa, beto ta tadila Ndinga ya Nzambi, Biblia, sambu na kuzaba bikuma ya bampasi mpi mutindu yo ta suka.
