Bantu mingi ke vandaka ti mpusa ya ngolo ya kuzinga na zulu. Yezu tubaka nde bantumwa na yandi ya kwikama ta zinga kuna. Na ntwala ya lufwa na yandi, yandi silaka na kuyidikila bo kisika na lweka ya Tata na yandi yina kele na zulu.​—Tanga Yoane 14:2.

Sambu na nki bantu ya ke zingaka na ntoto ta futumuka sambu na kuzinga na zulu? Inki bo ta sala kuna? Yezu zabisaka bantumwa na yandi nde bo ta vanda bantotila. Bo ta yala ntoto.​—Tanga Luka 22:28-30; Kusonga 5:10.

Na bansi mingi, bantu fioti mpamba ke yalaka. Sambu Yezu ta futumuna bantu sambu na kuzinga na zulu na mpila nde bo yala ntoto, beto ke ndima nde bayina bo me ponaka ta vanda fioti. (Luka 12:32) Biblia ke tuba na siki-siki yonso ntalu ya bantu yina ta yala ti Yezu.​—Tanga Kusonga 14:1.

Nzambi ta sakumuna kaka ve bantu yina ta kwenda na zulu. Bantu ya kwikama na Kimfumu ya Yezu ta vanda ti luzingu ya kukonda nsuka na ntoto yina ta kuma paladisu. (Yoane 3:16) Bantu ya nkaka ta kota na Paladisu na nima ya kuguluka ntangu ngidika ya bima yai ya mbi ta fwa. Bankaka ta kota na nsadisa ya lufutumuku.​—Tanga Nkunga 37:29; Yoane 5:28, 29.