“NZAMBI kele Mpeve,” bantu lenda mona yandi ve. (Yoane 4:24) Ata mpidina, Biblia ke tuba nde na mutindu mosi buna, bantu ya nkaka monaka Nzambi. (Baebreo 11:27) Inki mutindu? Keti nge lenda mona mpenza “Nzambi yina ke monanaka ve”?—Bakolosai 1:15.

Beto lenda fwanisa diambu yai ti muntu yina me butukaka kifwa-meso. Keti meso na yandi ya kufwa ke kangaka yandi nzila ya kubakisa mambu yina ke salama na nziunga na yandi? Mpenza ve. Kifwa-meso ke vandaka na mitindu mingi yina ke sadisaka yandi na kuzaba bantu, bima, mpi mambu yina ke luta na lweka na yandi. Kifwa-meso mosi ke tuba nde: “Mono ke monaka ve na meso kansi na mabanza.”

Mutindu mosi, ata nge lenda mona ve Nzambi na meso ya kimuntu, nge lenda sadila “meso ya ntima” na nge sambu na kumona yandi. (Baefezo 1:18) Beto tadila mitindu tatu yina nge lenda sala yo.

Mbala mingi mpusu ya nitu mpi makutu ya kifwa-meso ke kumaka ti makuki ya ngolo yina ke sadisaka yandi na kubakisa bima yina ya yandi lenda mona ve. Mutindu mosi, nge lenda sadila meso, makutu, mbombo, ludimi, ti nitu na nge sambu na kutala bima ya kele na nziunga na nge mpi kumona Nzambi yina ke monanaka ve yina gangaka yo. Biblia ke tuba nde: “Bikalulu na yandi ya ke monanaka ve ke monanaka pwelele banda na lugangu ya nsi-ntoto, sambu yo ke monanaka na bima yina yandi salaka.”—Baroma 1:20.

Beto baka mbandu ya ntoto. Nzambi gangaka ve ntoto sambu beto mona mpasi kansi sambu beto zinga na kiese. Beto ke vandaka na kiese ntangu beto ke bakaka mupepe ya kitoko, ke vandaka na nsi ya ntangu, ke waka ntomo ya bambuma mpi ke widikila mutindu bandeke ke yimbaka. Keti makabu yai ke monisa ve nde Ngangi na beto kele zola, ntima-mbote mpi ti kikalulu ya kukaba?

Mambu ya nge ke mona na luyalanganu lenda longa nge nki na yina me tala Nzambi? Ntete-ntete zulu ke monisaka ngolo ya Nzambi. Banzikisa ya mpa ya bantu ya siansi ke monisa nde luyalanganu ke landa na kukuma nene mpi yo ke salama nswalu kibeni! Ntangu nge ke tala zulu na mpimpa, kudiyula nde: ‘Ngolo yai ya ke sala nde luyalanganu kukuma nene nswalu kibeni ke katukaka na wapi?’ Biblia ke zabisa beto nde Ngangi kele na “ngolo . . . ya mingi kibeni.” (Yezaya 40:26, NW) Lugangu ya Nzambi ke monisa beto nde yandi kele “Nkwa-Ngolo Yonso,” mpi “yandi kele ti ngolo mingi.”—Yobi 37:23, NW.

Mama mosi yina kele ti bana zole ya ke monaka mbote ve ke tuba nde: “Ndinga kele kima mosi ya mfunu ya ke sadisaka bana na mono na kulonguka. Ntangu nge ke tambula ti bo, zabisa bo mambu yonso ya nge ke mona sambu nge kele meso na bo.” Mutindu mosi, ata “muntu mosi ve me monaka Nzambi,” Yezu, Mwana ya Nzambi “yina kele na ntulu ya Tata muntu tendulaka yandi.” (Yoane 1:18) Sambu Yezu kele kigangwa ya ntete mpi Mwana mosi kaka ya kubutukaka ya Nzambi, yandi kumaka “meso” na beto na zulu. Yandi muntu me fwana mpenza na kuzabisa beto mambu ya me tala Nzambi yina ke monanaka ve.

Tala mwa mambu yai ya Yezu, yina lutisaka bamvula mingi kibeni ti Tata na yandi, tubaka sambu na Nzambi:

• Nzambi ke lembaka ve na kusala kisalu. “Tata na mono ke landa na kusala tii ntangu yai.”—Yoane 5:17.

• Nzambi ke zabaka banzala na beto. “Tata na beno ke zabaka mambu yina beno kele na yo mfunu na ntwala nkutu nde beno lomba yandi yo.”—Matayo 6:8.

•  Nzambi ke lungisa banzala na beto na zola yonso. “Tata na beno yina kele na zulu, . . . ke basisaka ntangu na yandi na bantu ya mbi ti ya mbote mpi ke nokisaka mvula na bantu ya lunungu ti ya kukonda lunungu.”—Matayo 5:45.

• Nzambi ke bakaka konso muntu na mbalu. “Keti bo ke tekaka ve tubandeke zole na mbongo mosi ya kibende ya mfunu mingi ve? Kansi, ata mosi ve na kati na yo ta bwa na ntoto kukonda nde Tata na beno kuzaba yo. Kansi, ata nsuki ya ntu na beno, yandi ke tangaka yo yonso. Yo yina, beno tita ve: Beno kele na mbalu mingi kuluta tubandeke mingi.”—Matayo 10:29-31.

Mbala mingi, bifwa-meso ke bakisaka ve mambu mutindu mosi ti bantu ya ke monaka mbote. Kifwa-meso lenda zaba nde yandi kele na nsi ya madidi, kansi yandi ta mona ve madidi yango. Yandi ta bakisa kaka nde yandi kele na kisika mosi ya mbote yina nsemo ya ntangu ke kota ve. Bonso kifwa-meso yina lenda mona ve mudidi to nsemo, beto lenda bakisa mpi ve Yehowa na ngolo na beto mosi. Yo yina, Yehowa tindilaka beto muntu yina monisaka bikalulu mpi kimuntu na yandi na mutindu ya kukuka.

Muntu yango kele Yezu. (Bafilipi 2:7) Yezu zabisaka beto mambu ya me tala Tata na yandi mpi yandi monisaka mutindu yina Nzambi kele. Ntangu longoki ya Yezu, Filipo yulaka yandi nde: “Mfumu, songa beto Tata.” Yezu tubaka nde: “Muntu yina me mona mono me mona mpi Tata.” (Yoane 14:8, 9) Inki mambu ya Tata nge lenda “mona” na mambu yina Yezu vandaka kusala?

Yezu vandaka muntu ya zola, ya kudikulumusa mpi bantu vandaka kusolula ti yandi kukonda mpasi. (Matayo 11:28-30) Kimuntu na yandi ya mbote salaka nde bantu kukwenda pene-pene na yandi. Yezu vandaka kuditula na kisika ya bantu yina vandaka na mpasi mpi kuwa kiese ti bantu yina vandaka na kiese. (Luka 10:17, 21; Yoane 11:32-35) Ntangu nge ke tanga to ke wa masolo ya Biblia ya me tala Yezu, kudikotisa na masolo yango mpi yo ta sadisa nge na kumona nde mambu yango kele ya kieleka. Kana nge yindulula mutindu Yezu vandaka kusadila bantu mambu, nge ta bakisa mbote-mbote kimuntu ya Nzambi mpi nge ta kwenda pene-pene na yandi.

Na kutadila mutindu kifwa-meso ke bakisaka mambu, nsoniki mosi ke tuba nde: “Yandi ke bakisaka mambu na mitindu mingi, na nsadisa ya maboko, ya mbombo, ya makutu mpi buna na buna. Na nima, yandi ke vukisaka bansangu yango kisika mosi sambu na kubakisa yo.” Mutindu mosi, kana nge ke tala bima yina Nzambi gangaka, ke tanga mambu yina Yezu tubaka sambu na Tata na yandi mpi ke tadila mutindu Yezu monisaka bikalulu ya Nzambi na yandi, nge ta bakisa kimuntu ya Yehowa mpi yandi ta kuma Muntu ya kieleka sambu na nge.

Yobi yina zingaka na ntangu ya ntama kutanaka mpi ti mambu yai. Ntete, yandi tubaka “kukonda kubakisa.” (Yobi 42:3, NW) Kansi na nima ya kutadila na dikebi yonso lugangu ya Nzambi, Yobi tubaka nde: “Makutu na mono waka mambu na nge, kansi ntangu yai mono me mona nge ti meso na mono.”—Yobi 42:5, NW.

Yo lenda vanda mutindu mosi sambu na nge. Biblia ke tuba nde: “Kana nge sosa [Yehowa], yandi ta bika nde nge mona yandi.” (1 Bansangu 28:9, NW). Bambangi ya Yehowa ta vanda na kiese ya kusadisa nge na kusosa mpi na kumona Nzambi yina ke monanaka ve.