DISOLO YINA KELE NA LUTITI YA ZULU | BAMBANGI YA YEHOWA KELE BANANI?
Bambangi ya Yehowa Kele Bantu ya Nki Mutindu?
Kimvuka na beto kele na kele na ntoto ya mvimba mpi beto ke vukanaka ve ti mabundu ya nkaka. Ata babiro ya ke twadisaka bisalu na beto kele na États-Unis, Bambangi ya Yehowa mingi ke zingaka na bansi ya nkaka. Bambangi ya Yehowa bamilio kuluta nana ke longaka bantu Biblia na bansi kuluta 230. Bo ke landaka mambu yai ya Yezu tubaka: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso.”
Na bisika yonso ya beto ke zingaka, beto ke zitisaka bansiku ya leta. Kansi, beto ke salaka ngolo na kukota ve na mambu ya politiki. Beto ke zitisaka ntuma yina Yezu pesaka Bakristu na ‘kuvanda ve bantu ya nsi-ntoto.’ Yo yina, beto ke kotaka ve na mambu ya politiki mpi ke nwanaka ve bitumba. (Yoane 15:19; 17:16) Nkutu, na Mvita ya Zole ya Ntoto ya Mvimba, bo tulaka Bambangi ya Yehowa na boloko, bo niokulaka bo sambu bo buyaka kukota na mambu ya politiki. Episikopo mosi na Allemagne sonikaka nde: “Bambangi ya Yehowa me fwana na kutuba nde bo mpamba kele bantu yina kansansa na bo buyisaka bo na kusala kisalu ya kisoda na luyalu ya Hitler.”
“[Bambangi ya Yehowa] ke kangamaka ngolo na minsiku ya Biblia. Beto lenda pesa bo biyeka ya nene na politiki, kansi bo ta zola ve ata fioti. . . . Bo ke zitisaka bamfumu ya luyalu kansi, bo ke kwikilaka nde kaka Kimfumu ya Nzambi ta manisa bampasi ya bantu.”
Diaka, beto ke zingaka kisika mosi ti bantu yonso. Yezu sambaka Nzambi sambu na balongoki na yandi nde: “Mono ke lomba nge na kukatula bo ve na nsi-ntoto.” (Yoane 17:15) Yo yina, nge ke monaka Bambangi ya Yehowa ke sala kisalu, ke kwenda na zandu mpi ke kota nzo-nkanda ti bantu yina kele ve Bambangi ya Yehowa.
Nge Lenda Sepela Mpi Ti
BAMVUTU NA BANGIUFULA YA BIBLIA
Kimfumu ya Nzambi Kele Inki?
Sosa kuzaba sambu na nki luyalu ya Nzambi me luta baluyalu yonso ya nkaka.
BANGIUFULA YINA BANTU KE YULAKA MINGI
Sambu na Nki Bambangi ya Yehowa Ke Kotaka Ve na Mambu ya Politiki?
Keti bo kele kigonsa sambu na lutaninu ya insi?
KISALU YA KUSAMUNA
Bambangi ya Yehowa Me Kuma Mingi Kibeni
Na Augusti 2014, Bambangi ya Yehowa ya kikesa vandaka kuluta bamilio 8. Inki mutindu ntalu na bo me kumaka mingi banda na Mvita ya Ntete ya Ntoto ya Mvimba?
