Mono butukaka na Acul, mbanza mosi ya bangumba ya kele na ndambu ya westi ya Guatemala. Ndinga na beto kele Ixil mpi beto kele bantu ya dikanda ya Maya. Mono ke tubaka Kiespaniole mpi ndinga ya bwala na beto. Mono butukaka na nsungi yina bantu ya Guatemala vandaka kunwana bitumba bo na bo mpi bitumba yango salaka bamvula 36. Na nsungi ya bitumba yai, bantu mingi ya ke tubaka Ixil fwaka.

Ntangu mono vandaka ti bamvula iya, yaya na mono ya bakala ya bamvula nsambwadi vandaka kusakana ti grenade. Ntangu grenade yango panzanaka, yo fwaka yandi mpi yo fwaka mono meso. Na nima, mono kotaka na nzo-nkanda ya bifwa-meso na Guatemala City, kisika ya mono vandaka kulonguka Bisono ya Bifwa-Meso. Na nzo-nkanda, bo buyisaka mono na kusolula ti bana ya nkaka sambu na kikuma yina mono zabaka ve mpi bana ya nzo-nkanda kumaka kutina mono. Mono vandaka ntangu yonso mono mosi. Yo yina, konso mvula mono vandaka kuvingila bangonda zole ya konzie sambu na kuvutuka na nzo mpi kukutana ti mama. Mama vandaka kuzola mono mpi kuwila mono mawa. Kansi, yandi fwaka ntangu mono vandaka ti bamvula kumi. Mono waka mpasi ya ngolo sambu muntu ya vandaka kuzola mono mingi fwaka.

Ntangu mono kumaka ti bamvula 11, mono vutukaka na bwala na beto. Mono kumaka kuzinga na dibuta ya mbuta na mono ya bakala yina beto vandaka ti yandi tata mosi. Bo vandaka kulungisa bampusa na mono ya kinsuni, kansi bo vandaka kusadisa mono ve sambu mabanza na mono kuvanda mbote. Bantangu ya nkaka, mono vandaka kuyula Nzambi nde: “Sambu na nki mama fwaka? Sambu na nki mono kele kifwa-meso?” Bantu vandaka kuzabisa mono nde bampasi yai kele luzolo ya Nzambi. Mono monaka nde Nzambi kele muntu ya mbi mpi yandi ke tudilaka ve bantu dikebi. Mono zolaka kudifwa kana mono vandaka ti mpila ya kusala yo.

Ntangu mono vandaka toko, luzingu na mono vandaka na kigonsa sambu mono kumaka kifwa-meso. Bantu vandaka kuvukisa nitu ti mono mbala mingi na kingolo-ngolo. Mono vandaka kuzabisa ve bantu mambu yai sambu mono vandaka kuyindula nde ata muntu mosi ve zolaka kutudila yo dikebi. Bantu vandaka kusolula ti mono na mpasi mpi mono vandaka kusolula ve ti bantu. Mono kumaka kudivandila. Mono vandaka mawa-mawa mpi vandaka kutudila ve ata muntu mosi ntima.

Ntangu mono vandaka toko, Bambangi ya Yehowa zole (bankwelani) kwisaka  kutala mono na ngunga yina bana ya nzo-nkanda ke pemaka. Longi na beto mosi ya vandaka kuwila mono mawa muntu songaka bo na kukwisa kutala mono. Bo tangilaka mono lusilu ya Biblia yina ke monisa nde bafwa ta futumuka mpi bifwa-meso ta mona diaka. (Yezaya 35:5; Yoane 5:28, 29) Mono vandaka kuzola mambu yina bo vandaka kulonga mono, kansi mono vandaka kukuka ve kusolula ti bo sambu mono vandaka ve ti kikalulu ya kusolula ti bantu. Ata mono vandaka kusolula ve ti bantu, bo vandaka kukwisa mbala na mbala sambu na kulonga mono Biblia. Bankwelani yai vandaka kusala bakilometre 10 mpi kumata ngumba sambu na kukuma na kisika ya mono vandaka kuzinga.

Mbuta na mono zabisaka mono nde Bambangi yai vandaka kulwata mbote, kansi bo vandaka ve ti mbongo mingi. Ata mpidina, bo vandaka kutudila mono dikebi ya ngolo konso ntangu mpi kunatila mono bima ya fioti-fioti. Mono monaka nde kaka Bakristu ya kieleka lenda sala bibansa ya mutindu yai.

Mono longukaka Biblia na nsadisa ya mikanda ya bifwa-meso. Ata mono vandaka kubakisa mambu ya mono vandaka kulonguka, mono vandaka kundima malongi ya nkaka na mpasi. Mu mbandu, yo vandaka mpasi na kundima nde Nzambi ke kudibanzaka sambu na mono mpi nde bantu ya nkaka lenda tudila mono dikebi bonso Nzambi. Mono bakisaka kikuma yina Nzambi ke pesaka nzila na bampasi kansi mono vandaka kumona yandi mpenza ve bonso Tata mosi ya zola. *

Malembe-malembe, mambu ya mono longukaka na Masonuku sadisaka mono na kusoba mabanza. Mu mbandu, mono longukaka nde Nzambi ke kuditulaka na kisika ya bantu yina ke mona mpasi. Nzambi tubaka mambu yai sambu na bansadi na yandi yina bo vandaka kuniokula: “Mono me mona mbote-mbote mutindu bantu na mono ke mona mpasi . . . , mono me zaba bampasi na bo.” (Kubasika 3:7) Ntangu mono kumaka kubakisa bikalulu ya Nzambi, yo pusaka mono na kudipesa na yandi. Na mvu 1998, mono bakaka mbotika.

Mvula mosi na nima ya mbotika na mono, mono kwendaka kulonguka na nzo-nkanda ya bifwa-meso yina vandaka pene-pene ya mbanza Escuintla. Nkuluntu mosi ya dibundu na beto zabaka mpasi ya mono vandaka ti yo sambu na kukwenda na balukutakanu. Dibundu ya pene-pene vandaka na zulu ya ngumba, kisika Bambangi yina vandaka kulonguka ti mono vandaka kukatuka mpi yo vandilaka mono mpasi na kukwenda kuna mbala na mbala. Sambu na kusadisa mono, nkuluntu ya dibundu na beto solulaka ti dibuta mosi ya Bambangi ya Yehowa yina vandaka na mbanza Escuintla. Dibuta yango ndimaka na kubaka mono na nzo na bo mpi na kusadisa mono na kukwenda na balukutakanu. Tii bubu yai, bo ke sadisaka mono bonso nde mono kele muntu ya fami na bo.

Mono lenda tanga diaka mambu mingi ya mbote yina bampangi ya dibundu me sadilaka mono. Mambu yai yonso me ndimisaka mono nde mono kele na kati ya Bakristu ya kieleka.—Yoane 13:34, 35.

Mono me kumaka ti kivuvu mpi mono ke kudimonaka diaka ve mpamba. Ntangu yai, luzingu na mono me kumaka ti lukanu. Sambu mono ke salaka ntangu yonso kisalu ya kulonga bantu Biblia yina Bambangi ya Yehowa ke salaka, mono me kudipesaka na kuzabisa bantu mambu ya kitoko ya Biblia na kisika ya kutula dikebi na kimbefo na mono. Diaka, mono kele nkuluntu mpi ke salaka badiskure na mabundu. Nkutu, mono ke salaka badiskure na balukutakanu ya distrike na ntwala ya bantu mingi.

Na 2010, mono manisaka Nzo-Nkanda Yina Ke Longaka Mutindu ya Kusala Kisalu ya Kusamuna (bo ke bingaka yo bubu yai Nzo-Nkanda ya Bansamuni ya Kimfumu) yina salamaka na Salvador. Nzo-nkanda yai me sadisaka mono na kulungisa mbote mikumba na mono na dibundu. Formasio yai me sadisaka mono na kumona nde Yehowa Nzambi ke zolaka mpi ke bakaka mono na mbalu, mpi nde yandi lenda pesa bantu yonso makuki ya kusala kisalu na yandi.

Yezu tubaka nde: “Kiese ke vandaka mingi na kupesa kuluta na kubaka.” (Bisalu 20:35) Ata mono vandaka kuyindula ntete ve nde mono lenda vanda na kiese, bubu yai, mono me kumaka na kiese. Yo yina, mono lenda sadisa bantu ya nkaka ntangu yai.