DISOLO YINA KELE NA LUTITI YA ZULU | KETI YO KELE MFUNU NA KUSAMBA?
Keti Kele ti Muntu ya Ke Waka Bisambu?
Bantu mingi ke yindulaka nde kusala kisambu kele kulutisa ntangu sambu ata muntu mosi ve ke waka bisambu. Bantu ya nkaka ke mekaka kusamba kansi bo ke bakaka ve mvutu na bisambu na bo. Muntu mosi ya ke ndimaka ve nde Nzambi kele, vandaka kuyindula mutindu Nzambi lenda vanda mpi yandi sambaka nde: “Nzambi, tubila mono ata ngogo mosi.” Na nima, muntu yango tubaka nde Nzambi “pesaka yandi ve mvutu.”
Kansi, Biblia ke zabisa beto nde Nzambi kele mpi nde yandi ke waka bisambu. Biblia ke monisa mambu yai ya Nzambi tubaka ntama na dikanda mosi: ‘Mfumu Nzambi ta tala beno na disu ya mbote ntangu beno ke didila yandi na kusadisa beno; yandi ta wa beno mpi yandi ta ndima beno.’ (Yezaya 30:19) Verse ya nkaka ke tuba nde: “Mfumu Nzambi ke zolaka bisambu ya bantu ya mbote.”
Yezu sambaka Tata na yandi, ‘ebuna Nzambi waka yandi.’
Diaka, Biblia ke tubila masolo ya bantu yina Nzambi waka bisambu na bo. Verse mosi ke tuba nde Yezu salaka “balombilu na Muntu yina lendaka kugulusa yandi” mpi nde ‘Nzambi waka yandi.’ (Baebreo 5:7) Beto lenda mona bambandu ya nkaka na Daniele 9:21 mpi na 2 Bansangu 7:1.
Sambu na nki bantu ya nkaka ke monaka nde Nzambi me pesaka ve mvutu na bisambu na bo? Sambu Nzambi kuwa bisambu na beto, beto fwete samba kaka Yehowa, * Nzambi yina Biblia ke tubilaka. Beto fwete samba ve banzambi ya nkaka to ba-nkaka. Diaka, Nzambi ke zolaka nde beto “lomba na kuwakana ti luzolo na yandi,” disongidila mambu yina yandi ke ndimaka. Nzambi ke zabisa beto nde kana beto ke samba mutindu yina, ‘yandi ta wa beto.’ (1 Yoane 5:14) Yo yina, sambu Nzambi kuwa bisambu na beto, beto fwete zaba Nzambi yina Biblia ke tubilaka mpi kulonguka luzolo na yandi.
Bantu mingi ke ndimaka nde kisambu kele ve kaka kima yina mabundu ke salaka mbala na mbala, kansi bo ke kwikilaka nde Nzambi ke waka bisambu mpi ke pesaka mvutu. Isaac, muntu ya Kenya, ke tuba nde: “Mono sambaka Nzambi sambu na kubakisa Biblia. Na nima, muntu mosi kwisaka kutala mono mpi sadisaka mono.” Hilda, nkento mosi ya ke zingaka na Philippines, sosaka kuyambula makaya, kansi yandi kukaka ve ata yandi vandaka kusala ngolo mbala na mbala. Yo yina, bakala na yandi zabisaka yandi nde: “Samba Nzambi sambu yandi sadisa nge.” Yandi sadilaka ndongisila yango mpi ke tuba nde: “Mono yitukaka mutindu Nzambi sadisaka mono. Mpusa ya kunwa makaya yantikaka kumana mpi mono yambulaka yo.”
Keti Nzambi lenda sadisa nge na kununga bampasi kana mambu ya nge ke lomba ke wakana ti luzolo na yandi?
^ par. 6 Yehowa kele zina ya Nzambi mutindu Biblia ke monisa yo.
