DISOLO YINA KELE NA LUTITI YA ZULU | INKI MUTINDU NZAMBI KE TADILAKA BITUMBA?
Mutindu Nzambi Vandaka Kutadila Bitumba na Ntangu ya Ntama
Bantu vandaka kuniokula bo. Bo vandaka kusamba Nzambi mbala na mbala sambu yandi gulusa bo, kansi Nzambi sadisaka bo ve na ntangu yina. Bantu yango vandaka bantu ya Izraele, bansadi ya Nzambi ya ntangu ya ntama. Bantu ya Ezipte, dikanda mosi ya ngolo mingi, bantu vandaka kuniokula bo. (Kubasika 1:13, 14) Banda ntama, bantu ya Izraele vandaka kuvingila nde Nzambi kukatula bo na bampasi yina bantu ya Ezipte vandaka kumonisa bo. Nsuka-nsuka, ntangu yina Nzambi tulaka sambu na kusadisa bo lungaka. (Kubasika 3:7-10) Biblia ke tuba nde Nzambi yandi mosi nwanaka bitumba ti bantu ya Ezipte. Yandi pesaka bantu ya Ezipte bandola mingi mpi yandi fwaka ntotila ya Ezipte ti basoda na yandi na Nzadi-Mungwa ya Mbwaki. (Nkunga 136:15) Yehowa Nzambi monisaka nde yandi kele “soda ya ngolo” ya bansadi na yandi.—Kubasika 15:3, 4.
Sambu Nzambi yandi mosi muntu nwanaka bitumba ti bantu ya Ezipte, yo ke monisa nde yandi ke monaka ve bitumba yonso mbi. Bantangu ya nkaka, yandi vandaka kupesa bantu na yandi, disongidila bantu ya Izraele, nswa ya kunwana bitumba. Mu mbandu, yandi tindaka bo na kunwanisa bantu ya Kanana, bantu ya mbi kibeni. (Kulonga 9:5; 20:17, 18) Yandi tindaka Davidi, ntotila ya Izraele, na kunwanisa bantu ya Filistia, bantu ya nku. Nkutu, Nzambi pesaka Davidi bantuma yina sadisaka yandi na kununga bitumba.
Masolo ya Biblia ya beto me katuka kutubila ke monisa nde ntangu bantu vandaka kusosa kuniokula bantu ya Izraele mpi vandaka kusala mambu ya mbi yina vandaka kutula luzingu na bo na kigonsa, Nzambi vandaka kusadila bitumba sambu na kutanina bantu na yandi mpi lusambu ya kieleka. Beto tadila mambu tatu ya mfunu ya me tala bitumba yina Nzambi vandaka kupesa nswa ya kunwana.
-
NZAMBI YANDI MOSI VANDAKA KUZABISA NANI FWETE NWANA BITUMBA. Kilumbu mosi, Nzambi zabisaka bantu ya Izraele nde: “Beno ta vanda ve na mfunu ya kunwana bitumba yai.” Sambu na nki? Sambu Nzambi yandi mosi zolaka kunwana sambu na bo. (2 Bansangu 20:17; 32:7, 8) Mutindu beto me mona yo na luyantiku ya disolo yai, Nzambi nwanaka bitumba mbala mingi sambu na bantu na yandi. Kansi na bantangu ya nkaka, Nzambi vandaka kutinda bantu na yandi, disongidila bantu ya Izraele ya ntama, na kukwenda kunwana bitumba sambu na kutanina Ntoto na bo ya Lusilu.—Kulonga 7:1, 2; Yozue 10:40.
-
NZAMBI YANDI MOSI VANDAKA KUZABISA NTANGU BANTU NA YANDI FWETE NWANA BITUMBA. Yo vandaka kulomba nde bansadi ya Nzambi kuvingila ntangu yina Nzambi tulaka sambu na kunwanisa bantu yina vandaka kusala mambu ya nku mpi ya mbi na nziunga na bo. Yo vandaka kulomba ve nde bo kwenda na bitumba na luzolo na bo. Ntangu bo vandaka kukwenda na bitumba na luzolo na bo, Nzambi vandaka kutanina bo ve. Biblia ke monisa nde ntangu bantu ya Izraele vandaka kukwenda na bitumba yina Nzambi pesaka bo ve nswa, bo vandaka kukutana mbala mingi ti bampasi. *
-
Ata Nzambi nwanaka bitumba ti bantu ya Kanana, yandi gulusaka bantu ya nkaka, mu mbandu, Rahabi ti dibuta na yandi
NZAMBI KE WAKA VE KIESE NA LUFWA YA BANTU, ATA YA BANTU YA MBI. Yehowa Nzambi kele Nto ya luzingu mpi yandi Muntu gangaka bantu. (Nkunga 36:9) Yo yina, yandi ke sepelaka ve kumona bantu ke fwa. Kansi, bantu ya nkaka ke salaka komplo sambu na kumonisa bankaka mpasi mpi nkutu kufwa bo. (Nkunga 37:12, 14) Sambu na kumanisa mambu ya mbi ya mutindu yai, bantangu ya nkaka Nzambi vandaka kupesa bantu na yandi nzila ya kunwanisa bantu ya mbi. Ata mpidina, na bamvula yina yonso ya yandi vandaka kutinda bantu ya Izraele na kunwana bitumba ya mutindu yai, yandi vandaka kaka Nzambi ya “mawa” sambu na bantu yina vandaka kuniokula bantu ya Izraele mpi ya “ke waka makasi nswalu ve.” (Nkunga 86:15) Mu mbandu, yandi pesaka bantu ya Izraele ntuma nde na ntwala ya kunwanisa mbanza mosi, bo fwete ‘zabisa mbanza yango mambu ya bo fwete sala sambu ngemba kuvanda,’ mpidina bo vandaka kupesa bantu ya mbanza yango dibaku ya kusoba banzila na bo sambu bitumba kuvanda ve. (Kulonga 20:10-13) Ntuma yai vandaka kumonisa nde Nzambi “ke waka ve kiese na lufwa ya muntu ya mbi, kansi [yandi] ke waka kiese kana muntu ya mbi kusoba nzila na yandi mpi kulanda kuzinga.”
—Ezekiele 33:11, 14-16. *
Beto me mona na disolo yai nde na ntangu ya ntama, Nzambi vandaka kumona bitumba mutindu mosi ya mbote ya kusukisa mambu mingi ya mbi mpi ya nku. Nzambi muntu vandaka kuzabisa ntangu bantu fwete nwana bitumba mpi nani fwete nwana bitumba, kansi bantu bo mosi ve. Keti Nzambi vandaka kuzola kunwana bitumba ya mbi? Ata fioti ve. Ya kieleka, yandi ke mengaka mubulu. (Nkunga 11:5) Keti Nzambi sobaka mutindu na yandi ya kutadila bitumba ntangu Yezu Kristu, Mwana na yandi, yantikaka kisalu ya kusamuna na mvu-nkama ya ntete?
^ par. 7 Mu mbandu, bantu ya Izraele belaka na bitumba ntangu bo kwendaka kunwana ti bantu ya Amaleki mpi ti bantu ya Kanana sambu Nzambi pesaka bo ve nswa ya kukwenda kunwana. (Kutanga 14:41-45) Na nima ya bamvula mingi, Yoziasi, ntotila ya kwikama, kwendaka kunwana bitumba yina Nzambi pesaka yandi ve nswa. Diambu yai ya kukonda kuyindula natilaka yandi lufwa.
^ par. 8 Na ntwala ya kunwanisa bantu ya Kanana, bantu ya Izraele zabisaka bo ve mambu ya bo fwete sala sambu ngemba kuvanda. Sambu na nki? Sambu Nzambi pesaka bantu ya Kanana bamvula 400 sambu bo yambula banzila na bo ya mbi. Ntangu bantu ya Izraele kwendaka kunwanisa bo, bantu mingi ya Kanana vandaka kusala kaka mambu ya mbi. (Kuyantika 15:13-16) Yo yina, yo lombaka nde bantu ya Izraele kufwa bo yonso. Kansi, bantu ya nkaka ya Kanana yina sobaka banzila na bo gulukaka.
Nge Lenda Sepela Mpi Ti
NZOZULU YA NKENGI
Nzambi Ndimaka Rahabi“Bonso Muntu ya Lunungu na Nzila ya Bisalu”
Inki mutindu disolo ya Rahabi ke monisa nde beto yonso kele mfunu na meso ya Yehowa? Inki dilongi beto lenda baka na mbandu ya lukwikilu na yandi?
NZOZULU YA NKENGI
Bandola ya Nzambi—Keti Yo Vandaka ya Nku?
Sambu na kupesa mvutu na ngiufula yai, beto tadila bambandu zole ya bandola ya Nzambi yina kele na Biblia—Mvula ya Ngolo ya bilumbu ya Noa mpi lufwa ya bantu ya Kanana.
