1 Samuele 2:1-36
2 Ebuna Ana tubaka mambu yai na kisambu:
“Ntima na mono ke wa kiese sambu na Yehowa;+Yehowa me nangula kibongo* na mono.
Munoko na mono me kanguka nene sambu na kupesa mvutu na bambeni na mono,Mono ke wa kiese sambu nge ke gulusaka.
2 Muntu mosi ve kele santu bonso Yehowa,Muntu ya nkaka kele ve katula kaka nge,+Mpi kele ve ti ditadi bonso Nzambi na beto.+
3 Beno bika kutuba ti lulendo;Bika nde ata diambu mosi ve ya lulendo kubasika na munoko na beno,Sambu Yehowa kele Nzambi ya nzayilu,+Mpi yandi ke tesaka bisalu na mutindu ya me fwana.
4 Batolo-tolo ya bantu ya ngolo ke zengana,Kansi bo ke pesa ngolo+ na bantu yina ke bula sakuba.
5 Bantu yina vandaka kudia mbote fwete kudidefisa sambu na dimpa,Kansi bantu ya nzala ke wa diaka ve nzala.+
Mukobo me buta bana nsambwadi,+Kansi nkento yina vandaka ti bana-babakala mingi ke buta diaka ve.*
6 Yehowa ke nataka lufwa, mpi yandi ke taninaka luzingu;*Yandi ke kulumusaka na Maziamu,* mpi yandi ke tombulaka.+
7 Yehowa ke kumisaka muntu nsukami, mpi yandi ke kumisaka muntu mvwama;+Yandi ke kulumusaka, mpi yandi ke nangulaka.+
8 Yandi ke tombulaka muntu ya kukonda mfunu katuka na mfututu;Yandi ke tedimisaka nsukami katuka na putulu ya tiya,*+Sambu na kuvandisa bo kisika mosi ti bamfumu,Yandi ke pesaka bo kiti ya lukumu.
Makunzi ya ntoto kele ya Yehowa,+Mpi yandi ke tulaka ntoto na zulu na yo.
9 Yandi ke taninaka bitambi ya bantu na yandi ya kwikama,+Kansi bo ta kanga bantu ya mbi munoko na mpimpa,+Sambu muntu ke nungaka ve na ngolo na yandi mosi.+
10 Yehowa ta panza bantu yina ke nwana ti yandi;*+Yandi ta nganina bo katuka na zulu bonso nzasi.+
Yehowa ta sambisa ntoto ya mvimba,+Yandi ta pesa ntotila+ na yandi ngoloMpi ta nangula kibongo* ya muntu yina yandi me tulaka mafuta.”+
11 Ebuna Elkana kwendaka na nzo na yandi na Rama, kansi mwana yina kumaka nsadi ya* Yehowa+ na ntwala ya nganga-nzambi Eli.
12 Kansi, bana ya Eli vandaka bantu ya mbi;+ bo vandaka kuzitisa ve Yehowa.
13 Yai mambu yina bo vandaka kusala sambu na bitini ya mbisi yina banganga-nzambi vandaka na nswa ya kubaka na bantu ya Izraele:+ Konso ntangu yina muntu vandaka kupesa kimenga, nsadi mosi ya nganga-nzambi vandaka kukwisa ti nsomo ya meno tatu na diboko na yandi ntangu musuni vandaka kutoka,
14 yandi vandaka kukotisa yo na dilonga, na nzungu ya maboko zole, na nzungu ya nene, to na nzungu ya diboko mosi. Konso kitini yina nsomo vandaka kubasisa, nganga-nzambi vandaka kubaka yo sambu na yandi mosi. Yai mambu yina bo vandaka kusala na Shilo na bantu yonso ya Izraele yina vandaka kukwisa kuna.
15 Diaka, na ntwala nde muntu yina ke pesa kimenga kuyoka mafuta sambu yo basisa midinga,+ nsadi ya nganga-nzambi vandaka kukwisa mpi kutubila yandi nde: “Pesa nganga-nzambi musuni sambu yandi yoka. Yandi ta baka ve musuni na nge ya kutokisa, yandi ta baka kaka musuni ya mubisu.”
16 Kana muntu yina kutubila yandi nde: “Vingila ntete mafuta kubasisa midinga,+ na nima nge ta baka konso kima yina nge ke zola,”* yandi vandaka kutuba nde: “Ve, pesa mono yo sesepi yai; kana ve, mono ta baka yo na ngolo!”
17 Na mutindu yina disumu ya bansadi kumaka nene kibeni na meso ya Yehowa,+ sambu bo vandaka kuzitisa ve dikabu ya Yehowa.
18 Samuele vandaka kusala+ na ntwala ya Yehowa, yandi vandaka kulwata efodi ya lino,+ ata yandi vandaka kaka mwana.
19 Diaka, mama na yandi vandaka kusadila yandi kazaka ya fioti ya kukonda maboko, mpi yandi vandaka kunatila yandi yo konso mvula ntangu yandi vandaka kukwisa ti bakala na yandi sambu na kupesa kimenga ya konso mvula.+
20 Ebuna Eli sakumunaka Elkana ti nkento na yandi mpi tubaka nde: “Bika Yehowa kupesa nge mwana ya nkaka ti nkento yai na kisika ya mwana yina yandi me defisa Yehowa.”+ Ebuna bo vutukaka na bwala na bo.
21 Yehowa tudilaka Ana dikebi, yo yina yandi kumaka kubuta;+ mpi yandi butaka bana tatu ya nkaka ya babakala mpi bana zole ya bankento. Leke yai Samuele landaka kuyela na ntwala ya Yehowa.+
22 Ntangu yai Eli vandaka mununu kibeni, mpi yandi waka mambu yonso yina bana na yandi vandaka kusala+ Izraele ya mvimba mpi mutindu bo vandaka kulala ti bankento yina vandaka kusala na munoko ya tenta ya lukutakanu.+
23 Yandi vandaka kutubila bo nde: “Sambu na nki beno ke landa kusala mambu ya mutindu yai? Sambu mambu yina mono ke wa, yina bantu yonso ke tuba sambu na beno kele mbi.
24 Ve, bana na mono, nsangu yina mono ke wa, yina ke tambula na kati ya bantu ya Yehowa kele mbote ve.
25 Kana muntu me sala disumu na ntwala ya muntu ya nkaka, muntu mosi lenda bondila Yehowa sambu na yandi;* kansi kana yandi me sala disumu na ntwala ya Yehowa,+ nani lenda samba sambu na yandi?” Kansi bo buyaka kuwila tata na bo, sambu Yehowa bakaka lukanu ya kufwa bo.+
26 Na ntangu yina, leke Samuele vandaka kaka kuyela na nitu, mpi Yehowa ti bantu landaka kundima yandi.+
27 Muntu mosi ya Nzambi kwisaka kutubila Eli nde: “Yehowa me tuba nde: ‘Keti mono kudimonisaka ve pwelele na nzo ya tata na nge ntangu bo vandaka na Ezipte bonso bampika na nzo ya Farao?+
28 Mono solaka yandi na makanda yonso ya Izraele+ sambu yandi vanda nganga-nzambi na mono mpi sambu na kutombuka na mesa-kimenga+ na mono sambu na kupesa bimenga, kuyoka ndumbu,* mpi kulwata efodi na ntwala na mono; mpi mono pesaka nzo ya nkaka na nge makabu yonso ya bantu ya Izraele* yina bo ke yokaka na tiya.+
29 Sambu na nki beno ke vweza kimenga na mono* mpi dikabu na mono yina mono pesaka nsiku na kisika na mono ya kuzinga?+ Sambu na nki nge ke landa kupesa bana na nge lukumu kuluta mono na mutindu beno ke kudikumisa mafuta na bitini ya kuluta kitoko ya makabu yonso ya bantu na mono Izraele?+
30 “‘Yo yina, Yehowa Nzambi ya Izraele ke tuba nde: “Ya kieleka mono tubaka nde nzo na nge mpi nzo ya nkaka na nge ta tambulaka ntangu yonso na ntwala na mono.”+ Kansi ntangu yai Yehowa ke tuba nde: “Ngindu ya kusala yo lenda kwisila mono ve ata fioti, sambu bantu yina ke kumisa mono mono ta kumisa bo,+ kansi bantu yina ke vweza mono mono ta vweza bo.”
31 Tala! Bilumbu ke kwisa ntangu mono ta katula ngolo* na nge mpi ngolo ya nzo ya tata na nge, mpidina muntu mosi ve na nzo na nge ta zinga tii na kimununu.+
32 Mpi nge ta mona mbeni na kisika yina mono ke zingaka, na kati ya mambu yonso ya mbote yina bo ke sala sambu na Izraele,+ mpi mununu ta vandaka diaka ve na nzo na nge ata fioti.
33 Muntu na nge yina mono ta bikisa sambu na kusala na mesa-kimenga na mono ta sala nde meso na nge kubeba mpi yandi ta natila nge mawa,* kansi bantu mingi ya nzo na nge ta fwa na mbele ya bitumba ya bantu.+
34 Ebuna mambu yina ta kumina bana na nge zole, Hofni ti Fineasi, ta vanda kidimbu sambu na nge: Bo zole ta fwa kilumbu mosi.+
35 Ebuna mono ta basisa nganga-nzambi mosi ya kwikama+ sambu na mono. Yandi ta sala mambu na kuwakana ti mambu yina ntima na mono ke zola;* mono ta tungila yandi nzo ya ke zingaka mingi, mpi yandi ta tambula ntangu yonso na ntwala ya muntu yina mono me tulaka mafuta.
36 Konso muntu yina ta bikala na nzo na nge, ta kwisa mpi ta fukimina yandi sambu yandi futa yandi mbongo mpi kupesa yandi dimpa, mpi yandi ta tuba nde: “Pardo, tula mono na kisalu mosi ya kinganga-nzambi sambu mono zwa kima ya kudia.”’”+
Banoti na nsi ya lutiti
^ To “ngolo.” Tala Bantendula ya Bangogo.
^ Na kisina, “ke yuma.”
^ To “ke nataka na luzingu.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ To mbala ya nkaka, “na kisika ya bo ke losaka mvindu.”
^ To mbala ya nkaka, “Bantu yina ke nwana ti Yehowa ta wa boma ya ngolo.”
^ To “ngolo.” Tala Bantendula ya Bangogo.
^ To “vandaka kusadila.”
^ To “yina moyo na nge kele na nzala na yo ya ngolo.”
^ To mbala ya nkaka, “Nzambi ta zenga mambu sambu na yandi.”
^ Na kisina, “bana ya Izraele.”
^ To mbala ya nkaka, “kupesa midinga ya kimenga yina ta tombuka na zulu.”
^ Na kisina, “ke bula kimenga na mono dikulu.”
^ Na kisina, “diboko.”
^ To “ta sala nde moyo na nge kulemba.”
^ To “mambu yina kele na ntima na mono mpi na moyo na mono.”
