2 Bakorinto 6:1-18
6 Sambu beto ke sala kumosi ti yandi,+ beto ke bondila beno mpi na kundima ve ntima ya mbote ya nene ya Nzambi mpi kukonda kulungisa lukanu na yo.+
2 Sambu yandi ke tuba nde: “Mono waka nge na ntangu ya me ndimama, mpi mono sadisaka nge na kilumbu ya luguluku.”+ Yai ntangu ya me ndimama kibeni. Yai kilumbu ya luguluku.
3 Beto ke pesaka ve bantu kikuma ya kubula sakuba ata na diambu mosi, sambu bantu kumona ve kifu na kisalu na beto;+
4 kansi na mambu yonso beto ke monisaka nde beto kele bansadi ya Nzambi,+ na kukanga ntima na mambu mingi, na bampasi, na bantangu ya kukonda bima, na mambu ya mpasi,+
5 na kubula ya bo ke bula beto, na baboloko,+ na mubulu, na kisalu ya ngolo, na bampimpa kukonda mpongi, na bantangu ya kukonda madia;+
6 na bunkete, na nzayilu, na ntima ya nda,+ na ntima ya mbote,+ na mpeve santu, na zola ya kukonda luvunu,+
7 na kutuba ya kieleka, na ngolo ya Nzambi;+ na nzila ya binwaninu ya lunungu+ na diboko ya kitata* mpi na diboko ya kimama,*
8 na nzila ya nkembo mpi ya nsoni, na nzila ya lukumu ya mbi mpi ya lukumu ya mbote. Bo ke mona beto bonso bantu ya luvunu, kansi beto ke tubaka kieleka,
9 bo ke mona beto bonso bantu ya me zabanaka ve, kansi beto me zabanaka, bo ke tadila beto bonso bantu yina me fwana na kufwa, kansi beto ke zinga,+ bo ke pesa beto ndola, kansi bo ke fwa beto ve,+
10 bo ke mona beto bonso bantu yina kele na mawa, kansi beto kele na kiese ntangu yonso, bo ke mona beto bonso bansukami, kansi beto ke kumisa bantu mingi bamvwama, bo ke mona beto bonso bantu ya kele ti kima ve, kansi beto kele ti bima yonso.+
11 Beto me kangula munoko sambu na kutubila beno,* bampangi ya Korinto, mpi beto me kangula kibeni ntima na beto.
12 Beto ke yiminaka beno ve lutondo na beto,+ kansi beno ke yiminaka beto lutondo na beno.
13 Yo yina mono ke tuba bonso nde mono ke tubila bana na mono, beno mpi beno kangula kibeni ntima na beno.*+
14 Beno vukana ve* ti bantu yina ke kwikilaka ve.+ Sambu inki kuwakana kele na kati ya lunungu ti kufwa bansiku?+ To inki kuwakana kele na kati ya nsemo ti mpimpa?+
15 Diaka, inki kuwakana kele na kati ya Kristu ti Beliale?*+ To inki kima muntu yina ke kwikilaka* kele ti yo na kimvuka ti muntu yina ke kwikilaka ve?+
16 Mpi nki kuwakana kele na kati ya tempelo ya Nzambi ti biteki?+ Sambu beto kele tempelo ya Nzambi ya moyo;+ mutindu Nzambi tubaka nde: “Mono ta zinga na kati na bo+ mpi mono ta tambula na kati na bo; mono ta vanda Nzambi na bo, mpi bo ta vanda bantu na mono.”+
17 “Yehowa* ke tuba nde: ‘Yo yina beno basika na kati na bo, beno kabwana ti bo, mpi beno yambula kusimba kima ya mvindu’”;+ “‘ebuna mono ta yamba beno.’”+
18 “Yehowa* Nkwa-Ngolo Yonso ke tuba nde: ‘Mono ta kuma tata na beno,+ mpi beno ta kuma bana na mono ya babakala mpi ya bankento.’”+
Banoti na nsi ya lutiti
^ Ziku sambu na kuditanina.
^ Ziku sambu na kuditanina.
^ To “me tubila beno na pwelele.”
^ To “beno mpi beno kanguka.”
^ Na kisina, “Beno kuditula ve na nsi ya vangu yina kele ve kiteso mosi.”
^ Yo me katuka na ngogo mosi ya Kiebreo yina ke tendula “Kukonda Mfunu.” Yo ke tubila Satana.
^ To “muntu ya kwikama.”
^ Tala Bangindu ya Ngika A5.
^ Tala Bangindu ya Ngika A5.
