2 Bansangu 7:1-22
7 Ntangu Salomo manisaka kusamba,+ tiya katukaka na zulu+ mpi yo yokaka dikabu ya kuyoka ti bimenga, ebuna nkembo ya Yehowa fulukaka na nzo yina.+
2 Banganga-nzambi vandaka ve na mpila ya kukota na nzo ya Yehowa sambu nkembo ya Yehowa fulukaka na nzo ya Yehowa.+
3 Bantu yonso ya Izraele vandaka kutala ntangu tiya vandaka kukulumuka mpi nkembo ya Yehowa vandaka na zulu ya nzo, ebuna bo bwaka luse na ntoto na pavema, bo fukamaka, mpi bo pesaka Yehowa matondo, “sambu yandi kele mbote; zola na yandi ya kwikama ke zingaka kimakulu.”
4 Ntangu yai, ntotila mpi bantu yonso pesaka bimenga na ntwala ya Yehowa.+
5 Ntotila Salomo pesaka bimenga yai: Bangombe 22 000 mpi mameme 120 000. Na mutindu yina ntotila ti bantu yonso kangulaka bakielo ya nzo ya Nzambi ya kieleka. +
6 Banganga-nzambi telamaka na bisika na bo ya kisalu; Balevi yina vandaka ti bisadilu ya bo ke bulaka nzila mosi ti nkunga yina bo vandaka kuyimbila Yehowa vandaka mpi ya kutelama.+ (Ntotila Davidi salaka bima yai sambu na kupesa Yehowa matondo—“sambu zola na yandi ya kwikama ke zingaka kimakulu”—ntangu Davidi vandaka kupesa Nzambi matondo kumosi ti bo.*) Banganga-nzambi vandaka kubula bampungi+ ngolo na ntwala na bo, bantu yonso ya Izraele vandaka ya kutelama.
7 Na nima Salomo santisaka kati-kati ya kibansala yina vandaka na ntwala ya nzo ya Yehowa, sambu yo lombaka nde yandi pesa bimenga ya kuyoka+ mpi bitini ya mafuta ya bimenga ya kinduku kuna, sambu mesa-kimenga ya kwivre+ yina Salomo salaka kukaka ve sambu na bimenga ya kuyoka, makabu ya mbuma,+ mpi bitini ya mafuta.+
8 Na ntangu yina, Salomo salaka nkinsi bilumbu nsambwadi+ kumosi ti Izraele ya mvimba, dibundu ya nene kibeni yina katukaka na Lebo-amati* tii na Muwanda* ya Ezipte.+
9 Kansi na kilumbu ya nana* bo salaka lukutakanu ya santu,+ sambu bo salaka nkinsi ya kuyantika kusadila mesa-kimenga bilumbu nsambwadi mpi bo taka nkinsi bilumbu nsambwadi.
10 Ebuna na kilumbu ya 23 ya ngonda ya nsambwadi, yandi songaka bantu na kuvutuka na banzo na bo, bo vandaka kuwa kiese+ mpi kuwa mbote na ntima sambu na bumbote yina Yehowa monisilaka Davidi, Salomo, ti bantu na yandi Izraele.+
11 Ebuna Salomo manisaka nzo ya Yehowa ti nzo ya ntotila;+ mpi bima yonso yina kwisilaka yandi na ntima sambu na nzo ya Yehowa mpi nzo na yandi mosi, yandi salaka yo.+
12 Ebuna Yehowa monanaka na Salomo+ na mpimpa mpi tubilaka yandi nde: “Mono me wa kisambu na nge, mpi mono me sola kisika yai sambu na mono bonso nzo ya kimenga.+
13 Kana mono kanga zulu mpi mvula kunoka ve, kana mono songa bampasu na kubebisa insi mpi kana mono tinda kipupa na kati ya bantu na mono,
14 kana bantu na mono yina bo ke bingaka+ na zina na mono kudikulumusa,+ kusamba, kusosa luse na mono, mpi kuyambula banzila na bo ya mbi,+ mono ta wa kuna na zulu, mono ta lolula disumu na bo, mpi mono ta belula insi na bo.+
15 Ntangu yai meso na mono ta vanda ya kukanguka mpi makutu na mono ta tula dikebi na kisambu ya bo ke sala na kisika yai.+
16 Ntangu yai mono me sola mpi me santisa nzo yai sambu zina na mono kuvanda kuna kimakulu,+ mpi meso na mono ti ntima na mono ta vandaka ntangu yonso kuna.+
17 “Mpi nge, kana nge tambula na ntwala na mono bonso tata na nge Davidi, kana nge sala mambu yonso ya mono me songaka nge, mpi kana nge zitisa bansiku na mono ti balusambisu na mono,+
18 mono ta tula kiti ya kimfumu na nge kimakulu,+ kaka mutindu mono salaka kuwakana ti tata na nge Davidi+ nde, ‘Ntangu yonso yo ta vandaka ti muntu mosi ya dibuta na nge yina ta yalaka Izraele.’+
19 Kansi kana beno yambula mpi beno vila bansiku na mono ti bantuma na mono yina mono me pesa beno, ebuna beno kwenda kusadila banzambi ya nkaka mpi beno fukimina bo,+
20 mono ta tumuna Izraele na ntoto yina mono me pesaka bo,+ mpi nzo yai ya mono me santisa sambu na zina na mono, mono ta katula yo na meso na mono, mpi mono ta kumisa yo kima yina bantu yonso ta vwezaka mpi ta sekaka.+
21 Mpi nzo yai ta kuma mayumbu. Konso muntu yina ke luta na lweka na yo ta tala ti kuyituka+ mpi ta tuba nde, ‘Sambu na nki Yehowa salaka mambu yai na insi yai mpi na nzo yai?’+
22 Ebuna bo ta tuba nde, ‘Sambu bo yambulaka Yehowa+ Nzambi ya ba-nkaka na bo, yina basisaka bo na insi ya Ezipte,+ mpi bo ndimaka banzambi ya nkaka, bo fukiminaka bo, mpi bo sadilaka bo.+ Yo yina yandi natilaka bo bampasi yai yonso.’”+
Banoti na nsi ya lutiti
^ Ziku yo ke tubila Balevi.
^ To “kisika ya kukotila na Amati.”
^ Tala Bantendula ya Bangogo.
^ Kilumbu yina landaka nkinsi, to kilumbu ya 15.
