Nkunga 45:1-17
ntwadisi; ya bo me tula na “Bintuntu ya Lisi.” Ya bana ya Kora.+ Maskile.* Nkunga ya zola.
45 Ntima na mono kele na kiese sambu na diambu ya mbote.
Mono ke tuba nde: “Nkunga* na mono ke tadila ntotila mosi.”+
Bika ludimi na mono kuvanda kilapi+ ya kalaki ya mikanda* yina me zaba kisalu mbote.+
2 Nge kele kitoko mingi kuluta bana ya bantu.
Bangogo ya kitoko ke basikaka na munoko na nge.+
Yo yina Nzambi me sakumunaka nge kimakulu.+
3 Lwata mbele na nge ya bitumba,+ O muntu ya ngolo,+Na nkembo na nge mpi na lukumu na nge.+
4 Mpi na lukumu na nge, kwenda kununga;+Mata na mpunda sambu na kunwanina kieleka, kudikulumusa, mpi lunungu,+Mpi diboko na nge ya kitata ta sala* mambu ya ke pesa boma.
5 Batolo-tolo na nge kele nsongi, yo ke sala nde bantu kubwa na ntwala na nge;+Yo ke tobulaka bantima ya bambeni ya ntotila.+
6 Nzambi kele kiti na nge ya kimfumu mvula na mvula;+Muhangu ya kimfumu na nge kele muhangu ya lunungu.*+
7 Nge zolaka lunungu,+ kansi nge mengaka mambu ya mbi.+
Yo yina Nzambi, Nzambi na nge, me tula nge mafuta+ ya kiese+ kuluta banduku na nge.
8 Bilele na nge yonso ke basisa nsudi ya mire, ya nti ya aloesi, mpi ya kase;Na nzo ya nene ya ntotila, yina bo me sala na meno ya nzioko, bima ya kubudila miziki ya kele ti bansinga ke pesa nge kiese.
9 Bana-bankento ya bantotila kele na kati ya bankento na nge ya lukumu.
Nkento ya ntotila* me telama na diboko na nge ya kitata, yandi me lwata wolo ya Ofire.+
10 O mwana-nkento, wa, tula dikebi mpi widikila;Vila bantu na nge mpi nzo ya tata na nge.
11 Ebuna ntotila ta vanda ti nzala ya ngolo ya kitoko na nge,Sambu yandi kele mfumu na nge,Yo yina fukimina yandi.
12 Mwana-nkento ya Tire ta kwisa ti dikabu;Bamvwama ya nene ta sosa nde nge ndima bo.*
13 Na kati ya nzo ya ntotila,* mwana-nkento ya ntotila kele kitoko mingi;Bo me kumisa bilele na yandi kitoko na* wolo.
14 Bo ta nata yandi na ntotila yandi me lwata bilele yina bo me tunga kitoko.*
Banduku na yandi, bamwense yina ke landa yandi, bo ke nata bo na ntwala na nge.
15 Bo ta nata bo ti kuyangalala mpi kiese;Bo ta kota na nzo ya ntotila.
16 Bana na nge ta baka kisika ya ba-nkaka na nge.
Nge ta tula bo bamfumu na ntoto ya mvimba.+
17 Mono ta zabisa zina na nge na bandonga yonso ya bantu yina ke kwisa.+
Yo yina bantu ta kumisaka nge mvula na mvula.
Banoti na nsi ya lutiti
^ Tala Bantendula ya Bangogo.
^ Na kisina, “Bisalu.”
^ To “nsekudi.”
^ Na kisina, “ta longa nge.”
^ Na kisina, “kusungama.”
^ To “Ntotila-nkento.”
^ To “ta lembika luse na nge.”
^ Na kisina, “nzo.”
^ Na kisina, “ti bima ya kitoko ya.”
^ To mbala ya nkaka, “bamvwela ya bo me tula bifwanisu.”
