Esdrasi 8:1-36
8 Yai kele bamfumu ya banzo ya batata na bo mpi mutindu bo sonikisaka bazina na kulanda bandonga ya ba-nkaka ya bantu yina katukaka na Babilone mpi tombukaka ti mono na nsungi ya luyalu ya ntotila Artazeresesi:+
2 na bana ya Fineasi,+ Gershomi; na bana ya Itamare,+ Daniele; na bana ya Davidi, Atushi;
3 na bana ya Shekania, na bana ya Paroshi, Zekaria, mpi babakala 150 yina bo sonikaka bazina na bo vandaka kumosi ti yandi;
4 na bana ya Pahati-moabi,+ Elieho-enai mwana ya Zeraya, mpi kumosi ti yandi babakala 200;
5 na bana ya Zatu,+ Shekania mwana ya Yahaziele, mpi kumosi ti yandi babakala 300;
6 na bana ya Adini,+ Ebedi mwana ya Yonatani, mpi kumosi ti yandi babakala 50;
7 na bana ya Elami,+ Yeshaya mwana ya Atalia, mpi kumosi ti yandi babakala 70;
8 na bana ya Shefatia,+ Zebadia mwana ya Mikaele, mpi kumosi ti yandi babakala 80;
9 na bana ya Yoabi, Obadia mwana ya Yehiele, mpi kumosi ti yandi babakala 218;
10 na bana ya Bani, Shelomiti mwana ya Yosifia, mpi kumosi ti yandi babakala 160;
11 na bana ya Bebai, Zekaria mwana ya Bebai,+ mpi kumosi ti yandi babakala 28;
12 na bana ya Azgadi,+ Yohanani mwana ya Akatani, mpi kumosi ti yandi babakala 110;
13 na bana ya Adonikami,+ bayina vandaka bantu ya nsuka, bazina na bo yo yai: Elifeleti, Yeyele, ti Shemaya, mpi kumosi ti bo babakala 60;
14 mpi na bana ya Bigwai,+ Utai ti Zabudi, mpi kumosi ti bo babakala 70.
15 Mono vukisaka bo pene-pene ya nzadi yina ke kwisaka na Ahava,+ ebuna beto tulaka camp kuna bilumbu tatu. Kansi ntangu mono talaka mbote-mbote bantu mpi banganga-nzambi, mono monaka ve ata Mulevi mosi kuna.
16 Yo yina mono tindaka ndinga sambu bo binga Eliezere, Ariele, Shemaya, Elnatani, Yaribi, Elnatani, Natani, Zekaria, ti Meshulami, bayina vandaka bantwadisi, mpi Yoyaribi ti Elnatani, bayina vandaka balongi.
17 Ebuna mono pesaka bo nsiku sambu na Ido yina kele mfumu na kisika ya bo ke bingaka Kasifia. Mono songaka bo na kuzabisa Ido ti bampangi na yandi, bansadi ya tempelo* bayina vandaka na Kasifia, na kunatila beto bansadi sambu na nzo ya Nzambi na beto.
18 Sambu diboko ya mbote ya Nzambi na beto vandaka ti beto, bo nataka muntu mosi ya mayele yina vandaka na kati ya bana ya Mali+ mutekolo ya Levi mwana ya Izraele, disongidila, Sherebia,+ ti bana na yandi mpi bampangi na yandi, babakala 18;
19 mpi Ashabia, kumosi ti yandi Yeshaya ya bantu ya Merari,+ bampangi na yandi ti bana na bo, babakala 20.
20 Mpi bansadi ya tempelo* vandaka 220, bayina Davidi ti bamfumu pesaka na kusadila Balevi, bayina yonso ya bo bingaka na bazina na bo.
21 Ebuna kuna pene-pene ya nzadi ya Ahava, mono songaka bantu na kubuya madia sambu beto kudikulumusa na ntwala ya Nzambi na beto, beto sosa lutwadisu na yandi sambu na nzietelo na beto, sambu na beto, sambu na bana na beto, mpi sambu na bima na beto yonso.
22 Mono waka nsoni na kulomba ntotila basoda ti bantu yina ke tambusaka bampunda sambu na kutanina beto na bambeni na nzila, sambu beto tubilaka ntotila nde: “Diboko ya mbote ya Nzambi na beto ke vandaka ti bantu yonso yina ke sosaka yandi,+ kansi ngolo na yandi ti makasi na yandi ke nwanisaka bantu yonso yina ke yambulaka yandi.”+
23 Yo yina beto buyaka madia mpi salaka kisambu na Nzambi na beto sambu na diambu yai, mpi yandi waka kisambu na beto.+
24 Ntangu yai, mono tulaka bamfumu ya banganga-nzambi 12 na kingenga, disongidila, Sherebia, Ashabia,+ kumosi ti bampangi na bo kumi.
25 Ebuna mono tesilaka bo arza, wolo, mpi bisadilu, makabu yina ntotila ti bandongisi na yandi, bamfumu na yandi mpi bantu yonso ya Izraele yina vandaka pana pesaka sambu na nzo ya Nzambi na beto.+
26 Mpidina mono tesaka na maboko na bo batalanta* 650 ya arza, bisadilu 100 ya arza yina kele na ntalu ya batalanta 2, batalanta 100 ya wolo,
27 babolo ya fioti 20 ya wolo yina kele na ntalu ya badariki* 1 000, mpi bisadilu 2 ya kwivre ya kitoko, ya mbwaki yina ke sema, ya ntalu mingi bonso wolo.
28 Ebuna mono tubilaka bo nde: “Beno kele santu sambu na Yehowa,+ bisadilu kele ya santu, mpi arza ti wolo kele dikabu ya luzolo ya mbote sambu na Yehowa Nzambi ya ba-nkaka na beno.
29 Beno keba yo mbote-mbote tii kuna beno ta tesa yo na ntwala ya bamfumu ya banganga-nzambi, ya Balevi, ti ya bamfumu ya banzo ya batata ya Izraele na Yeruzalemi,+ na basuku* ya nzo ya Yehowa.”
30 Ebuna banganga-nzambi ti Balevi bakaka arza, wolo, ti bisadilu, yina bo tesilaka bo, sambu na kunata yo na Yeruzalemi na nzo ya Nzambi na beto.
31 Nsuka-nsuka beto katukaka na nzadi Ahava+ na kilumbu ya 12 ya ngonda ya ntete+ sambu na kukwenda na Yeruzalemi, mpi diboko ya Nzambi na beto vandaka ti beto, mpi yandi gulusaka beto na maboko ya mbeni mpi na bantu yina bumbanaka na nzila sambu na kusala beto mbi.
32 Ebuna beto kumaka na Yeruzalemi+ mpi bikalaka kuna bilumbu tatu.
33 Na kilumbu ya iya, beto tesaka arza, wolo, mpi bisadilu na nzo ya Nzambi+ na beto mpi beto pesaka yo na Meremoti+ mwana ya nganga-nzambi Uriya, mpi Eleazare mwana ya Fineasi vandaka ti yandi, mpi Balevi yai Yozabadi+ mwana ya Yeshua mpi Noadia mwana ya Binwi vandaka ti bo.+
34 Bo tangaka ntalu ya bima yonso mpi tesaka yo, na nima bo sonikaka kilo yonso na kimvuka.
35 Bantu yina katukaka na kimpika, bayina vandaka ntete bampika, pesaka bimenga ya kuyoka na Nzambi ya Izraele, bangombe 12+ sambu na Izraele ya mvimba, mameme ya babakala 96,+ bana-mameme ya babakala 77, mpi bankombo ya babakala 12+ bonso dikabu sambu na disumu; bima yai yonso vandaka dikabu ya kuyoka sambu na Yehowa.+
36 Ebuna beto pesaka bantuma ya ntotila+ na basatrape* ya ntotila ti na bamfumu ya bambanza ya ntoto yina kele na Simu ya Nzadi,*+ mpi bo pesaka bantu ti nzo ya Nzambi ya kieleka maboko.+
Banoti na nsi ya lutiti
^ To “Banetinimi.” Na kisina, “bantu ya bo me pesaka.”
^ To “Banetinimi.” Na kisina, “bantu ya bo me pesaka.”
^ Talanta mosi kele bakilo 34,2. Tala Bangindu ya Ngika B14.
^ Dariki vandaka mbongo ya kibende ya wolo ya bantu ya Persia. Tala Bangindu ya Ngika B14.
^ To “banzo ya kudila madia.”
^ Titre ya ke tendula “bantu ya ke taninaka kimfumu,” awa bo me sadila yo sambu na kutubila baguvernere ya baprovense na Kintinu ya bantu ya Persia.
^ To “na Simu ya Nkaka ya Efrate.”
