Ezekiele 3:1-27
3 Ebuna yandi tubilaka mono nde: “Mwana ya muntu, dia kima yina kele na ntwala na nge.* Dia rulo yai, mpi kwenda, tubila nzo ya Izraele.”+
2 Yo yina mono kangulaka munoko, mpi yandi pesaka mono rulo yina sambu mono dia.
3 Yandi tubilaka mono diaka nde: “Mwana ya muntu, dia rulo yai ya mono ke pesa nge, mpi fulusa yo na divumu na nge.” Yo yina mono yantikaka kudia yo, mpi yo vandaka sukadi bonso bwiki na munoko na mono.+
4 Yandi tubilaka mono nde: “Mwana ya muntu, kwenda na kati ya nzo ya Izraele mpi tubila bo mambu ya mono ke tuba.
5 Sambu mono ke tinda nge ve na bantu yina ke tubaka ndinga yina kele mpasi na kubakisa to ndinga yina me zabana ve, kansi na nzo ya Izraele.
6 Mono ke tinda nge ve na bantu mingi yina ke tubaka ndinga yina kele mpasi na kubakisa to ndinga yina me zabana ve, bantu yina nge lenda bakisa ve bangogo na bo. Kana mono tinda nge na bantu yina, bo ta wila nge.+
7 Kansi nzo ya Izraele ta buya kuwila nge, sambu bo ke zola ve kuwila mono.+ Bantu yonso ya nzo ya Izraele kele ntu-ngolo mpi ntima-ngolo.+
8 Tala! Mono me kumisa luse na nge ngolo kaka bonso baluse na bo mpi mbunzu na nge ngolo kaka bonso bambunzu na bo.+
9 Mono me kumisa mbunzu na nge bonso diama, ngolo kuluta ditadi ya sileksi.+ Kuwa bo boma ve mpi kutekita ve sambu na baluse na bo,+ sambu bo kele nzo yina me kolamaka.”
10 Yandi tubilaka mono diaka nde: “Mwana ya muntu, mambu yonso ya mono ke tubila nge, tula yo na ntima mpi widikila yo.
11 Kwenda na kati ya bantu na nge*+ yina bikisaka insi na bo mpi tubila bo. Songa bo nde, ‘Yai kele mambu yina Yehowa Mfumu ya Kuluta Nene me tuba,’ ata bo wa to bo buya kuwa.”+
12 Ebuna mpeve mosi nataka mono+ mpi mono waka na nima na mono ndinga mosi bonso makelele ya mupepe ya ngolo ke tuba nde: “Bika bo pesa nkembo ya Yehowa lukumu na kisika na yandi.”
13 Kuvandaka ti makelele ya mapapu ya bigangwa ya moyo mutindu yo vandaka kubulana-bulana,+ makelele ya makulu yina vandaka pene-pene ti yo,+ mpi makelele bonso ya mupepe ya ngolo.
14 Mpeve yina nataka mono mpi bakaka mono, ebuna mono kwendaka na mawa mpi na makasi ya mpeve na mono, mpi diboko ya Yehowa vandaka ngolo na zulu na mono.
15 Yo yina mono kwendaka na Tele-abibi na ndambu ya bantu yina bikisaka insi na bo, bayina vandaka kuzinga pene-pene ya nzadi Kebare,+ mpi mono zingaka kuna kisika bo vandaka kuzinga; mono vandaka na kati na bo bilumbu nsambwadi, mono monaka ve kima ya kutuba.+
16 Na nsuka ya bilumbu nsambwadi ndinga ya Yehowa kwisilaka mono nde:
17 “Mwana ya muntu, mono me tula nge nkengidi ya nzo ya Izraele;+ mpi ntangu nge ta wa mambu ya me katuka na munoko na mono, nge fwete pesa bo lukebisu yina me katuka na mono.+
18 Kana mono tuba na muntu ya mbi nde, ‘Nge ta fwa kibeni,’ kansi nge kebisa yandi ve, mpi nge tuba ve sambu na kukebisa muntu ya mbi na kuyambula nzila na yandi ya mbi na mpila nde yandi bikala na luzingu,+ yandi ta fwa sambu na kifu na yandi sambu yandi kele muntu ya mbi,+ kansi mono ta lomba menga na yandi na nge.*+
19 Kansi kana nge kebisa muntu ya mbi ebuna yandi yambula ve mambi na yandi mpi nzila na yandi ya mbi, yandi ta fwa sambu na kifu na yandi, kansi nge, nge ta gulusa kibeni luzingu* na nge mosi.+
20 Kansi kana muntu ya lunungu kuyambula lunungu na yandi mpi kusala mambu ya mbi,* mono ta tula kima ya ke budisaka sakuba na ntwala na yandi mpi yandi ta fwa.+ Kana nge kebisa yandi ve, yandi ta fwa sambu na disumu na yandi mpi bo ta yibuka ve mambu ya lunungu yina yandi salaka, kansi mono ta lomba menga na yandi na nge.*+
21 Kansi kana nge kebisaka muntu ya lunungu na kusala ve disumu, ebuna yandi sala ve disumu, yandi ta bikala kibeni na luzingu sambu bo kebisaka yandi,+ mpi nge, nge ta gulusa luzingu* na nge mosi.”
22 Diboko ya Yehowa kwisaka na zulu na mono kuna, mpi yandi tubilaka mono nde: “Telama, kwenda na muwanda, mpi mono ta tubila nge kuna.”
23 Yo yina mono telamaka mpi kwendaka na muwanda, mpi tala! nkembo ya Yehowa vandaka kuna,+ bonso nkembo yina mono monaka pene-pene ya nzadi Kebare,+ ebuna mono fukamaka luse na ntoto.
24 Na nima mpeve kotaka na kati na mono mpi salaka nde mono telama,+ ebuna Nzambi tubilaka mono nde:
“Kwenda, kudikanga na kati ya nzo na nge.
25 Kansi nge, mwana ya muntu, bo ta kanga nge bansinga mpi ta kangisa nge yo na mpila nde nge basika ve sambu na kukwenda na kati na bo.
26 Ebuna mono ta sala nde ludimi na nge kukangama na kitini ya zulu ya munoko na nge, mpi nge ta kuma baba, nge ta kuka ve kunganina bo, sambu bo kele nzo yina me kolamaka.
27 Kansi ntangu mono ta tubila nge, mono ta kangula munoko na nge, ebuna nge fwete tubila bo nde,+ ‘Yai kele mambu yina Yehowa Mfumu ya Kuluta Nene me tuba.’ Bika nde muntu yina ke wa, kuwa,+ mpi muntu yina ke buya na kuwa, kubuya, sambu bo kele nzo ya ke kolamaka.+
Banoti na nsi ya lutiti
^ Na kisina, “dia kima yina nge ke mona.”
^ Na kisina, “ya bana ya bantu na nge.”
^ To “mono ta lomba nge na kuvutula munoko sambu na menga na yandi.”
^ To “moyo.”
^ To “kusala mambu ya kukonda lunungu.”
^ To “mono ta lomba nge na kuvutula munoko sambu na menga na yandi.”
^ To “moyo.”
