Ezekiele 47:1-23
47 Ebuna yandi vutulaka mono na munoko ya tempelo,+ mpi kuna mono monaka masa ke basika na nsi ya munoko ya tempelo mpi ke kulumuka na ndambu ya esti,+ sambu ntwala ya tempelo vandaka kutala na ndambu ya esti. Masa vandaka kukulumuka katuka na nsi ya ndambu ya diboko ya kitata ya tempelo, na sudi ya mesa-kimenga.
2 Na nima yandi nataka mono na nganda na nzila ya kielo ya nordi+ mpi basisaka mono na nganda mpi na nziunga ya kielo ya nganda yina ke tala na ndambu ya esti,+ ebuna mono monaka masa ke kulumuka malembe-malembe katuka na ndambu ya diboko ya kitata.
3 Ntangu muntu yina basikaka na ndambu ya esti ti nsinga ya kutesila na diboko na yandi,+ yandi tesaka maboko* 1 000 mpi songaka mono na kusabuka masa; masa sukaka mono na bitambi ya makulu.
4 Ebuna yandi tesaka 1 000 ya nkaka mpi songaka mono na kusabuka masa, mpi yo sukaka mono na mabolongo.
Yandi tesaka 1 000 ya nkaka mpi songaka mono na kusabuka, mpi masa sukaka mono na luketo.
5 Ntangu yandi tesaka 1 000 ya nkaka, yo kumaka masa mingi yina mono lendaka ve kusabuka na makulu, sambu masa vandaka mudindu mingi kibeni na mpila nde yo lombaka nde muntu kukasa, masa mingi yina muntu lendaka ve kusabuka na makulu.
6 Yandi yulaka mono nde: “Mwana ya muntu, keti nge me mona diambu yai?”
Ebuna yandi songaka mono na kutambula mpi na kuvutuka na lweka ya masa.
7 Ntangu mono vutukaka, mono monaka nde banti mingi kibeni vandaka na bandambu yonso zole ya lweka ya masa.+
8 Ebuna yandi tubilaka mono nde: “Masa yai ke kulumuka na ndambu ya ntoto ya esti mpi ke landa kukulumuka tii na Araba*+ mpi ke bwa na nzadi-mungwa. Ntangu yo ta bwa na nzadi-mungwa,+ masa yina kele kuna ta beluka.
9 Bimvuka ya bigangwa* ya ke zingaka ta kuka kuzinga konso kisika yina bamasa* ke kulumuka. Bambisi ta vanda mingi, sambu masa yai ta kulumuka kuna. Masa ya nzadi-mungwa ta beluka, mpi bima yonso ta zinga konso kisika yina masa yina ke kwenda.
10 “Balobi-mbisi ta telama pene-pene na yo katuka na Ene-gedi+ tii na Ene-eglayimi, kisika yina ta vanda kisika ya kuyumisa babukondi. Bambisi mingi ya mutindu na mutindu ta vanda kuna, bonso bambisi ya Nzadi-Mungwa ya Nene.*+
11 “Yo ta vanda ti bisika ya masa-masa ti bisika ya poto-poto, mpi bisika yai ta beluka ve. Bo ta yambula yo na mungwa.+
12 “Banti ya mitindu yonso ya ke pesaka madia ta yela na balweka yonso zole ya masa. Matiti na yo ta yumaka ve; bambuma na yo mpi ta kondaka ve kubasika. Konso ngonda, yo ta butaka bambuma ya mpa, sambu masa na yo ke katukaka na kisika ya santu.+ Mbuma na yo ta vanda sambu na kudia mpi matiti na yo sambu na kubelula.”+
13 Yehowa Mfumu ya Kuluta Nene me tuba nde: “Yai kele teritware yina beno ta pesa bonso dikabu ya ntoto ya makanda 12 ya Izraele, mpi Yozefi ta vanda ti bitini zole.+
14 Beno ta baka yo bonso dikabu mpi ta baka bitini kiteso mosi.* Mono diaka ndefi na kupesa insi yai na ba-nkaka na beno,+ mpi ntangu yai bo me pesa yo* na beno bonso dikabu.
15 “Yai kele ndilu ya insi na ndambu ya nordi: Yo me katuka na Nzadi-Mungwa ya Nene, me luta na nzila ya Etloni,+ mpi me kwenda tii na Sedadi,+
16 Amati, Berota,+ ti Sibrayimi,+ yina kele na kati-kati ya teritware ya Damasi ti teritware ya Amati, tii na Azare-atikoni, yina kele pene-pene ya ndilu ya Orani.+
17 Yo yina ndilu ta katuka na nzadi-mungwa tii na Azare-enoni,+ na ndilu ya Damasi na nordi, mpi ndilu ya Amati.+ Yai kele ndilu ya nordi.
18 “Ndambu ya esti kele na kati-kati ya Orani ti Damasi mpi na Yordani na kati-kati ya Gileadi+ ti insi ya Izraele. Beno fwete tesa kitamina yina ke yantika na ndilu yina tii na nzadi-mungwa ya esti.* Yai kele ndilu ya esti.
19 “Ndilu ya sudi* ta yantika na Tamare tii na bamasa ya Meribati-kadeshi,+ tii na Muwanda* mpi tii na Nzadi-Mungwa ya Nene.+ Yai kele ndilu ya sudi.*
20 “Na ndambu ya westi kele Nzadi-Mungwa ya Nene, katuka na ndilu tombuka tii na kisika yina ke talana ti Lebo-amati.*+ Yai kele ndilu ya westi.”
21 “Beno fwete kabisa insi yai beno na beno, na kati ya makanda 12 ya Izraele.
22 Beno fwete kabisa yo sambu yo vanda dikabu na kati na beno mpi na banzenza yina ke zingaka ti beno, bayina me butaka bana ntangu bo vandaka kuzinga na kati na beno; mpi bo ta vanda na meso na beno bonso bantu yina me butukaka kibeni bantu ya Izraele. Bo ta baka dikabu na kati ya makanda ya Izraele kumosi ti beno.
23 Beno fwete pesa munzenza dikabu na teritware ya dikanda yina yandi ke zingaka,” Yehowa Mfumu ya Kuluta Nene muntu me tuba.
Banoti na nsi ya lutiti
^ Yo ke tubila maboko ya nda. Tala Bangindu ya Ngika B14.
^ To “na ntoto ya zelo na zelo.”
^ To “mioyo.”
^ Na kisina, “bamasa yina zole.”
^ Disongisila, Nzadi-Mungwa ya Mediterane.
^ Na kisina, “baka yo bonso dikabu, konso muntu bonso mpangi na yandi.”
^ Na kisina, “ntangu yai yo me bwa.”
^ Disongidila, Nzadi-Mungwa ya Kufwa.
^ Na kisina, “Ndambu ya sudi na sudi.”
^ Disongidila, Muwanda ya Ezipte.
^ Na kisina, “ndambu ya sudi na sudi.”
^ To “kisika ya kukotila na Amati.”
