Filemoni 1:1-25
1 Mono Polo, muntu ya boloko+ sambu na Kristu Yezu, mpi Timoteo,+ mpangi na beto, beto ke sonikila Filemoni nduku ya kisalu ya beto ke zolaka mingi,
2 mpangi na beto ya nkento Afia, Arshipe+ yina kele soda bonso beto, mpi dibundu yina kele na nzo na nge:+
3 Ntima ya mbote ya nene mpi ngemba ya Nzambi Tata na beto mpi ya Mfumu Yezu Kristu kuvanda ti beno.
4 Mono ke pesaka ntangu yonso matondo na Nzambi na mono ntangu mono ke tulaka nge na bisambu na mono,+
5 sambu mono ke landa kuwa nsangu ya lukwikilu na nge mpi zola na nge sambu na Mfumu Yezu mpi sambu na basantu yonso.
6 Mono ke samba sambu lukwikilu yina nge kele na yo na kimvuka ti bankaka kusadisa nge na kubakisa konso diambu ya mbote yina beto kele na yo na nzila ya Kristu.
7 Mpangi, mono waka kiese mingi mpi mono bakaka kikesa mingi ntangu mono waka nsangu ya zola na nge, sambu bantima* ya basantu bakaka kikesa sambu na nge.
8 Yo yina, ata mono kele ti masonga ya nene na zina ya Kristu sambu na kusonga nge na kusala mambu ya mbote,
9 mono ke bondila nge sambu mono me zaba zola na nge, sambu mono Polo, mono kele mununu, ee, ntangu yai mpi mono kele muntu ya boloko sambu na Kristu Yezu.
10 Mono ke bondila nge sambu na mwana na mono, Onezime,+ yina mono me kumaka+ tata na yandi awa na boloko.*
11 Yandi vandaka ntete mfunu ve sambu na nge, kansi ntangu yai, yandi kele mfunu sambu na nge mpi sambu na mono.
12 Mono ke vutudila nge yandi, ee, yandi kele kibeni ntima* na mono.
13 Mono zolaka nde yandi bikala ti mono sambu yandi landa kusadila mono na kisika na nge ntangu mono kele na boloko sambu na nsangu ya mbote.+
14 Kansi mono ke zola ve kusala ata kima mosi kukonda nswa na nge, sambu nge sala ve diambu ya mbote sambu bo ke pusa nge, kansi nge sala yo na luzolo na nge mosi.+
15 Ziku yo yina kibeni kikuma yandi tinaka sambu na ntangu fioti,* sambu nge baka yandi diaka kimakulu,
16 bonso mpika diaka ve,+ kansi kuluta mpika, bonso mpangi yina beto ke zolaka mingi,+ mingi-mingi sambu na mono, kansi mingi kuluta sambu na nge, na kinsuni mpi na Mfumu.
17 Yo yina, kana nge ke bakaka mono bonso nduku na nge, yamba yandi na ntima ya mbote mutindu nge zolaka kuyamba mono.
18 Diaka, kana yandi salaka nge mbi to kana yandi kele na mfuka na nge, tula yo na zina na mono.
19 Mono Polo, mono ke sonika ti diboko na mono mosi: Mono ta futa yo—kansi mono ke tuba ve nde nge kele na mfuka na mono, luzingu na nge.
20 Ya kieleka mpangi, pesa mono lusadisu yai na zina ya Mfumu; lembika ntima* na mono na zina ya Kristu.
21 Mono ke tula ntima nde nge ta sala mambu ya mono ke lomba nge, yo yina mono ke sonikila nge, sambu mono me zaba nde nge ta sala mambu mingi kuluta mambu ya mono me tuba.
22 Kansi mono ke lomba mpi nde nge yidikila mono kisika ya kulala, sambu mono ke tula ntima nde na nzila ya bisambu na beno bo ta vutula mono na beno.*+
23 Epafrasi,+ nduku na mono ya boloko na bumosi ti Kristu Yezu, me tindila nge mbote,
24 Marko, Aristarke,+ Demasi,+ mpi Luka,+ banduku na mono ya kisalu, me tindila nge mpi mbote.
25 Ntima ya mbote ya nene ya Mfumu Yezu Kristu kuvanda ti mpeve yina beno ke monisa.
Banoti na nsi ya lutiti
^ To “lutondo.”
^ Na kisina, “na miniololo.”
^ To “lutondo.”
^ Na kisina, “ngunga mosi.”
^ To “lutondo.”
^ To “bo ta yambula mono sambu na beno.”
