Kulonga 12:1-32
12 “Yai kele bansiku ti bankanu yina beno fwete sala yonso na kuzitisa bilumbu yonso yina beno ta zinga na insi yina Yehowa Nzambi ya ba-nkaka na nge ta pesa nge na kubaka.
2 Beno fwete panza kibeni bisika yonso yina makanda ya beno ta botula sadilaka banzambi na bo,+ yo vanda na zulu ya bangumba ya nda to ya bangumba ya fioti to na nsi ya konso nti yina kele ti matiti mingi.
3 Beno fwete bwisa bamesa-kimenga na bo, kubuka makunzi na bo ya santu,+ kuyoka banti na bo ya santu* na tiya, mpi kubuka biteki ya banzambi na bo,+ sambu na kufwanza bazina na bo na kisika yina.+
4 Beno fwete sambila ve Yehowa Nzambi na beno mutindu yina.+
5 Kansi, beno sosa Yehowa Nzambi na beno konso kisika yina yandi ke pona sambu na kutula zina na yandi mpi kisika na yandi ya kuzinga na kati ya makanda na beno yonso, mpi beno kwenda kuna.+
6 Yina kele kisika beno fwete nata makabu na beno ya kuyoka,+ bimenga na beno, makumi na beno,*+ makabu ya me katuka na maboko na beno,+ makabu na beno ya lusilu, makabu na beno ya luzolo ya mbote,+ mpi mwana ya ntete ya bangombe na beno mpi ya mameme na beno.+
7 Beno ti bantu ya banzo na beno fwete dia pana na ntwala ya Yehowa Nzambi na beno+ mpi kuwa kiese na bisalu na beno yonso,+ sambu Yehowa Nzambi na nge me sakumuna nge.
8 Beno fwete sala ve mutindu beto ke sala awa bubu yai, konso muntu ke sala mambu yonso yina kele mbote na meso na yandi mosi,*
9 sambu beno me kota ntete ve na kisika ya kupema+ mpi na dikabu yina Yehowa Nzambi na nge ke pesa nge.
10 Ntangu beno ta sabuka Yordani+ mpi ta zinga na insi yina Yehowa Nzambi na beno ke pesa beno na kubaka, yandi ta pesa beno ngemba na mutindu yandi ta gulusa beno na maboko ya bambeni na beno yonso yina kele na nziunga na beno, ebuna beno ta zinga na lutaninu.+
11 Beno ta nata bima yonso yina mono ke songa beno na kisika yina Yehowa Nzambi na beno ke sola sambu zina na yandi kuvanda+—makabu na beno ya kuyoka, bimenga na beno, makumi na beno,+ makabu ya me katuka na maboko na beno, mpi konso dikabu ya lusilu yina beno ke sila na kupesa na Yehowa.
12 Beno ta vanda na kiese na ntwala ya Yehowa Nzambi na beno,+ beno ti bana na beno ya babakala, bana na beno ya bankento, bampika na beno ya babakala ti ya bankento, mpi Mulevi yina kele na kati ya bambanza* na beno, sambu yandi kele ve ti kimvwama to dikabu ti beno.+
13 Keba! Kupesa ve makabu na nge ya kuyoka na konso kisika ya nkaka yina nge lenda mona.+
14 Nge fwete pesa makabu na nge ya kuyoka kaka na kisika yina Yehowa me sola na kati ya mosi ya bateritware ya makanda na nge, mpi kuna nge fwete sala mambu yonso yina mono ke songa nge.+
15 “Kansi konso ntangu yina nge me zola,* nge lenda fwa mbisi mpi kudia musuni na yo,+ na kutadila lusakumunu yina Yehowa Nzambi na nge me pesa nge na bambanza na nge yonso.* Muntu ya kukonda bunkete mpi muntu ya bunkete lenda dia yo, mutindu nge lenda dia mbambi to kabuluku.
16 Kansi, beno fwete dia ve menga;+ nge fwete tiamuna yo na ntoto bonso masa.+
17 Na kati ya bambanza na nge,* nge ta vanda ve ti nswa ya kudia ndambu mosi na kati ya bandambu kumi ya mbuma na nge, ya vinu na nge ya mpa, ya mafuta na nge, ya mwana ya ntete ya bangombe na nge mpi ya mameme na nge,+ makabu na nge yonso ya lusilu yina nge me sila, makabu na nge ya luzolo ya mbote, to makabu ya me katuka na maboko na nge.
18 Nge ta dia bima yai na ntwala ya Yehowa Nzambi na nge na kisika yina Yehowa Nzambi na nge ta sola+—nge ti mwana na nge ya bakala, mwana na nge ya nkento, nsadi na nge ya bakala ti ya nkento, mpi Mulevi yina kele na kati ya bambanza* na nge; ebuna nge ta vanda na kiese na ntwala ya Yehowa Nzambi na nge na bisalu na nge yonso.
19 Keba! Kuvila ve Mulevi+ ntangu yonso yina nge ke zinga na insi na nge.
20 “Ntangu Yehowa Nzambi na nge ta kumisa teritware+ na nge nene kaka mutindu yandi silaka nge,+ ebuna nge tuba nde, ‘Mono ke zola kudia musuni,’ sambu nge ke zola* kudia musuni, nge lenda dia yo konso ntangu yina nge me zola.*+
21 Kana kisika yina Yehowa Nzambi na nge me pona na kutula zina+ na yandi kele ntama ti kisika yina nge kele, nge fwete fwa ndambu ya bangombe na nge to ndambu ya mameme na nge yina Yehowa me pesaka nge, kaka mutindu mono songaka nge, mpi nge fwete dia yo na kati ya bambanza* na nge konso ntangu yina nge me zola.*
22 Nge lenda dia yo mutindu nge ta dia mbambi ti kabuluku;+ muntu ya kukonda bunkete mpi muntu ya bunkete lenda dia yo.
23 Kansi, vanda kaka ti lukanu ya ngolo ya kudia ve menga,+ sambu menga kele luzingu,*+ mpi nge fwete dia ve luzingu* ti musuni.
24 Nge fwete dia yo ve. Nge fwete tiamuna yo na ntoto bonso masa.+
25 Nge fwete dia yo ve, sambu mambu kukwendila mbote sambu na nge ti bana na nge, sambu nge ke sala mambu yina kele mbote na meso ya Yehowa.
26 Ntangu nge ta kwisa na kisika yina Yehowa ta sola, nge fwete nata kaka bima na nge ya santu mpi makabu na nge ya lusilu.
27 Kuna nge ta pesa makabu na nge ya kuyoka, musuni ti menga,+ na zulu ya mesa-kimenga ya Yehowa Nzambi na nge, mpi bo fwete tiamuna menga ya bimenga na nge na mesa-kimenga+ ya Yehowa Nzambi na nge, kansi musuni, nge lenda dia yo.
28 “Nge fwete lemfukila mbote-mbote mambu yai yonso ya mono ke songa nge, na mpila nde mambu kukwendila ntangu yonso mbote sambu na nge ti bana na nge, sambu nge ke sala mambu yina kele mbote mpi ya kusungama na meso ya Yehowa Nzambi na nge.
29 “Ntangu Yehowa Nzambi na nge ta fwa makanda yina nge ta botula insi na bo,+ ebuna nge zinga na insi na bo,
30 keba sambu nge bwa ve na mutambu ntangu bo ta manisa bo na ntwala na nge. Kuyula ve na yina me tala banzambi na bo nde, ‘Nki mutindu makanda yai vandaka kusadila banzambi na bo? Mono mpi ta sala mutindu mosi.’+
31 Nge fwete sala ve mambu yai na Yehowa Nzambi na nge, mpamba ve bo ke salaka sambu na banzambi na bo mambu yonso ya nzanzi yina Yehowa ke mengaka, nkutu bo ke yokaka bana na bo ya babakala ti ya bankento na tiya sambu na banzambi na bo.+
32 Mambu yonso yina mono ke songa beno kele mambu yina beno fwete sala ngolo na kusala.+ Beno fwete yika ve mambu ya nkaka mpi kukatula ve mambu ya nkaka.+
Banoti na nsi ya lutiti
^ Tala Bantendula ya Bangogo.
^ To “bandambu na beno ya kumi.”
^ To “mambu yina yandi ke yindula nde yo kele mbote.”
^ Na kisina, “bakielo.”
^ Na kisina, “na kati ya bakielo na nge yonso.”
^ To “na nzala yonso ya moyo na nge.”
^ Na kisina, “Na kati ya bakielo na nge.”
^ Na kisina, “bakielo.”
^ To “moyo na nge kele na mpusa ya.”
^ To “na mpusa yonso ya moyo na nge.”
^ Na kisina, “bakielo.”
^ To “na mpusa yonso ya moyo na nge.”
^ To “moyo.”
^ Na kisina, “moyo.”
