Kulonga 25:1-19
25 “Kana bantu me swana, bo lenda kwenda na ntwala ya bazuzi, ebuna bazuzi+ ta sambisa bo mpi ta zenga nde muntu ya lunungu me sala mbi ve mpi muntu ya mbi me sala mbi.+
2 Kana yo ke lomba nde bo bula muntu ya mbi,+ zuzi ta lomba bantu na kuladisa yandi na ntoto ebuna bo ta bula yandi na ntwala ya zuzi. Ntalu ya bafimbu fwete wakana ti diambu ya mbi yina yandi me sala.
3 Yandi lenda bula yandi bafimbu tii na 40,+ kansi kuluta ntalu yina ve. Kana yandi landa kubula yandi bafimbu mingi kuluta ntalu yina, mpangi na nge ta baka nsoni na meso na nge.
4 Nge fwete kanga ve munoko ya ngombe ntangu yo ke niata mbuma sambu na kukatula yo bampusu.+
5 Kana bampangi ke zingaka kumosi ebuna mosi na kati na bo kufwa kukonda kubuta mwana, nkento ya muntu yina me fwa fwete kwela ve muntu ya dibuta ya nkaka. Semeki na yandi ya bakala fwete kwenda kukutana ti yandi, kukwela yandi, mpi kusala makwela ya kisemeki ti yandi.+
6 Mwana ya ntete yina nkento yina ta buta ta baka zina ya bakala yina fwaka,+ mpidina bo ta fwanza ve zina na yandi na Izraele.+
7 Kansi kana bakala yina ke zola ve kukwela mufwidi ya mpangi na yandi, mufwidi yina fwete kwenda na bankuluntu na kielo ya mbanza mpi kutuba nde, ‘Mpangi ya bakala na mono me buya kutanina zina ya mpangi na yandi na Izraele. Yandi me buya kusala makwela ya kisemeki ti mono.’
8 Bankuluntu ya mbanza ya bakala yina fwete binga yandi mpi kusolula ti yandi. Kana yandi dindamana mpi kutuba nde, ‘Mono ke zola ve kukwela nkento yina,’
9 mufwidi ya mpangi na yandi fwete pusana pene-pene na yandi na ntwala ya bankuluntu, kukatula bakala yina sandale na dikulu,+ kulosila yandi mate na luse, mpi kutuba nde, ‘Yai kele mambu yina bo fwete sala bakala yina ta tanina ve ndonga ya dibuta ya mpangi na yandi.’
10 Na nima, zina ya dibuta na yandi* na Izraele ta vanda ‘Nzo ya muntu yina bo katulaka sandale.’
11 “Kana babakala zole ke nwana, ebuna nkento ya bakala mosi kukota na bitumba yina sambu na kutanina bakala na yandi na maboko ya muntu yina ke bula yandi mpi yandi tandula diboko na yandi mpi kusimba bakala yina ya nkaka na kibakala na yandi,
12 nge fwete zenga nkento yina diboko. Nge* fwete wa ve mawa.
13 “Nge fwete vanda ve na saki na nge ti matadi ya kutesila kilo ya mitindu zole,+ ya nene mpi ya fioti.
14 Nge fwete vanda ve na nzo na nge ti bima ya kutesila ya mitindu zole,*+ ya nene mpi ya fioti.
15 Nge fwete vanda ntangu yonso ti kilo ya sikisiki ti ya masonga mpi kitesilu ya sikisiki ti ya masonga, mpidina nge ta zinga mingi na ntoto yina Yehowa Nzambi na nge ke pesa nge.+
16 Sambu konso muntu ya kukonda lunungu yina ke sala mambu ya mutindu yai kele nzanzi na meso ya Yehowa Nzambi na nge.+
17 “Yibuka mambu yina Amaleki salaka nge na nzila ntangu beno vandaka kubasika na Ezipte,+
18 mutindu yandi kutanaka ti nge na nzila mpi nwanisaka bantu yonso yina bikalaka na nima na nge ntangu nge lembaka nitu mpi manaka ngolo. Yandi waka ve Nzambi boma.
19 Ntangu Yehowa Nzambi na nge ta pesa nge ngemba na mutindu yandi ta gulusa nge na maboko ya bambeni na nge yonso yina kele na nziunga na nge na insi yina Yehowa Nzambi na nge ke pesa nge na kubaka bonso dikabu,+ nge fwete fwanza kimakulu zina ya Amaleki na zulu ya ntoto.+ Nge fwete vilana ve.
Banoti na nsi ya lutiti
^ To “zina ya bantu ya nzo na yandi.” Na kisina, “zina na yandi.”
^ Na kisina, “Disu na nge.”
^ Na kisina, “na nzo na nge ti efa mpi efa.” Tala Bangindu ya Ngika B14.
