Kusonga 22:1-21
22 Ebuna yandi songaka mono nzadi ya masa ya luzingu,+ yo vandaka kusema bonso kristale; yo vandaka kubasika na kiti ya kimfumu ya Nzambi mpi ya Mwana-Dimeme,+
2 mpi yo vandaka kukulumuka na kati-kati ya bala-bala na yo ya nene. Banti ya luzingu yina vandaka kubuta bambuma mbala 12 konso mvula mpi kupesa bambuma na yo konso ngonda vandaka na bandambu yonso zole ya nzadi yina. Matiti ya banti yina vandaka sambu na kubelula makanda.+
3 Kusinga ta vanda diaka ve. Kansi, kiti ya kimfumu ya Nzambi mpi ya Mwana-Dimeme+ ta vanda na mbanza yina, mpi bampika na yandi ta sadila yandi kisalu ya santu;
4 bo ta mona luse na yandi,+ mpi zina na yandi ta vanda na bambunzu na bo.+
5 Diaka, mpimpa ta vanda diaka ve,+ mpi bo ta vanda ve na mfunu ya nsemo ya mwinda to ya nsemo ya ntangu, sambu Yehowa* Nzambi ta pesa bo nsemo,+ mpi bo ta yala bonso bantotila mvula na mvula.+
6 Yandi tubilaka mono nde: “Mambu yai kele ya kwikama* mpi ya kieleka;+ ee, Yehowa,* Nzambi yina pesaka bambikudi mpeve+ tindaka wanzio na yandi sambu na kusonga bampika na yandi mambu yina fwete salama ntama mingi ve.
7 Wa! Mono ke kwisa nswalu.+ Kiese na muntu yina ke zitisaka mambu ya mbikudulu ya rulo yai.”+
8 Ya kieleka, mono Yoane, mono muntu waka mpi monaka mambu yai. Ntangu mono waka mpi monaka yo, mono bwaka na makulu ya wanzio yina vandaka kusonga mono mambu yai sambu na kusambila yandi.
9 Kansi yandi tubilaka mono nde: “Keba! Kusala yo ve! Mono kele kaka mpika bonso nge mpi bonso bampangi na nge yina kele bambikudi mpi bonso bantu yina ke zitisaka mambu ya rulo yai. Sambila Nzambi.”+
10 Yandi tubilaka mono diaka nde: “Kubumba ve mambu ya mbikudulu ya rulo yai, sambu ntangu ya bo me tulaka me finama.
11 Muntu yina kele ya kukonda lunungu, yandi landa kusala mambu ya kukonda lunungu; mpi muntu ya mvindu, yandi landa kuvanda muntu ya mvindu; kansi muntu ya lunungu, yandi landa kusala mambu ya lunungu, mpi santu, yandi landa kuvanda santu.
12 “‘Tala! Mono ke kwisa nswalu, mpi mono kele ti matabisi yina mono ke pesa, sambu na kufuta konso muntu na kutadila kisalu na yandi.+
13 Mono kele Alfa mpi Omega,*+ muntu ya ntete mpi ya nsuka, luyantiku mpi nsuka.
14 Kiese na bantu yina ke yobisa bamvwela na bo,+ sambu bo vanda ti nswa ya kukwenda na banti ya luzingu+ mpi sambu bo kota na mbanza na bakielo na yo.+
15 Bambwa,* bantu yina ke salaka bisalu ya bampeve ya mbi, bantu yina ke salaka pite,* bantu yina ke fwaka bantu, mpi bantu yonso yina ke zolaka luvunu mpi ke vandaka ti kikalulu ya kuta luvunu kele na nganda.’+
16 “‘Mono, Yezu, mono tindaka wanzio na mono sambu na kutela beno kimbangi ya mambu yai sambu na mabundu. Mono kele musisa mpi mwana ya Davidi+ mpi mbwetete ya suka yina ke sema.’”+
17 Mpeve mpi nkento yina ke kwela+ ke landa kutuba nde: “Kwisa!” mpi konso muntu yina ke wa, yandi tuba nde: “Kwisa!” mpi konso muntu yina kele na nzala ya masa, yandi kwisa;+ konso muntu yina ke zola, yandi baka masa ya luzingu ya ofele.+
18 “Mono ke ta kimbangi na konso muntu yina ke wa mambu ya mbikudulu ya rulo yai nde: Kana muntu kuyika diambu ya nkaka na mambu yai,+ Nzambi ta yikila yandi bampasi ya bo me sonika na rulo yai;+
19 mpi kana muntu kukatula diambu na mambu ya rulo ya mbikudulu yai, Nzambi ta katula dikabu na yandi na mambu yina bo me sonika na rulo yai, yandi ta pesa yandi ve nzila ya kudia bambuma ya banti ya luzingu+ mpi ya kukota na mbanza ya santu.+
20 “Muntu yina ke ta kimbangi ya mambu yai ke tuba nde, ‘Ee, mono ke kwisa nswalu.’”+
“Amen! Mfumu Yezu, Kwisa.”
21 Ntima ya mbote ya nene ya Mfumu Yezu Kristu kuvanda ti basantu.
Banoti na nsi ya lutiti
^ Tala Bangindu ya Ngika A5.
^ To “ya kutudila ntima.”
^ Tala Bangindu ya Ngika A5.
^ To “A mpi Z.” Alfa mpi Omega kele kisono ya ntete mpi ya nsuka ya alfabe ya Kigreki.
^ Disongidila, bantu yina ke salaka mambu ya nzanzi na meso ya Nzambi.
^ Tala Bantendula ya Bangogo, “Mansoni.”
