Kuyantika 28:1-22
28 Yo yina, Izaki bingaka Yakobi, sakumunaka yandi, mpi songaka yandi nde: “Nge fwete kwela ve nkento na kati ya bana-bankento ya Kanana.+
2 Kwenda na Padani-arami na nzo ya Betuele, tata ya mama na nge, mpi kuna kwela nkento na kati ya bana-bankento ya Labani,+ mpangi ya mama na nge.
3 Nzambi Nkwa-Ngolo Yonso ta sakumuna nge, ta sala nde nge buta mingi, mpi ta kumisa nge mingi, ebuna nge ta kuma kibeni kimvuka ya bantu.+
4 Yandi ta pesa nge lusakumunu ya Abrahami,+ nge ti bana* na nge, sambu nge baka insi yina nge ke zinga bonso munzenza, insi yina Nzambi pesaka Abrahami.”+
5 Yo yina Izaki tindaka Yakobi, mpi yandi kwendaka na Padani-arami, na Labani mwana ya Betuele muntu ya Arami,+ mpangi ya Rebeka,+ mama ya Yakobi ti Ezau.
6 Ezau monaka nde Izaki me sakumuna Yakobi mpi me tinda yandi na Padani-arami sambu na kukwela nkento kuna, mpi nde ntangu yandi sakumunaka yandi, yandi songaka yandi nde, “Kukwela ve nkento na kati ya bana-bankento ya Kanana,”+
7 mpi nde Yakobi lemfukilaka tata na yandi ti mama na yandi mpi kwendaka na Padani-arami.+
8 Ebuna Ezau bakisaka nde bana-bankento ya Kanana vandaka kusepedisa ve tata na yandi Izaki,+
9 yo yina Ezau kwendaka na Ismaele mpi kwelaka Mahalati mwana ya Ismaele mwana ya Abrahami, mpangi ya Nebayoti, katula bankento ya nkaka yina yandi vandaka ti bo.+
10 Yakobi katukaka na Bere-sheba mpi landaka kukwenda na ndambu ya Arani.+
11 Na nima, yandi kumaka na kisika mosi mpi yandi yilamaka sambu na kulala pana sambu ntangu vandaka me dinda. Yo yina, yandi bakaka ditadi mosi ya kisika yina, yandi tulaka yo sambu na kutula ntu, mpi yandi lalaka pana.+
12 Ebuna yandi lalaka ndosi, mpi tala! kuvandaka ti kimatilu mosi me telama na ntoto, mpi nsongi na yo kumaka tii na zulu; ebuna bawanzio ya Nzambi vandaka kutombuka mpi kukulumuka na zulu na yo.+
13 Yehowa vandaka na zulu na yo, mpi yandi tubaka nde:
“Mono kele Yehowa Nzambi ya tata na nge Abrahami mpi Nzambi ya Izaki.+ Insi yai ya nge me lala, mono ta pesa yo na nge mpi na bana* na nge.+
14 Bana* na nge ta kuma kibeni bonso bambuma ya zelo ya ntoto,+ mpi nge ta yalumuka na westi, na esti, na nordi, mpi na sudi, ebuna na nzila na nge mpi na nzila ya bana* na nge mabuta yonso ya ntoto ta baka kibeni lusakumunu.*+
15 Mono kele ti nge, mono ta tanina nge konso kisika yina nge ke kwenda, mpi mono ta vutula nge na insi yai.+ Mono ta yambula nge ve tii kuna mono ta sala mambu yina mono me sila nge.”+
16 Ebuna Yakobi telamaka na mpongi mpi tubaka nde: “Ya kieleka, Yehowa kele na kisika yai, kansi mono zabaka yo ve.”
17 Yandi waka boma mpi tubaka diaka nde: “Kisika yai ke pesa boma kibeni! Yo lenda vanda kaka nzo ya Nzambi,+ mpi yo kele kielo ya zulu.”+
18 Ebuna Yakobi telamaka na suka-suka, bakaka ditadi yina yandi tulaka ntu na yandi, tedimisaka yo bonso dikunzi, mpi tiamunaka mafuta na zulu na yo.+
19 Yo yina yandi pesaka kisika yina zina Betele,* kansi zina ya mbanza yina vandaka ntete Luzi.+
20 Ebuna Yakobi salaka lusilu nde: “Kana Nzambi kulanda kuvanda ti mono, kutanina mono na nzietelo na mono, kupesa mono dimpa ya kudia mpi bilele ya kulwata,
21 mpi kana mono vutuka na ngemba na nzo ya tata na mono, mpidina Yehowa ta songa nde yandi kele Nzambi na mono.
22 Ebuna ditadi yai ya mono me tedimisa bonso dikunzi ta kuma nzo ya Nzambi,+ mpi ntembe kele ve nde mono ta pesa nge ndambu mosi na kati ya bandambu kumi ya bima yonso ya nge ke pesa mono.”
Banoti na nsi ya lutiti
^ Na kisina, “nkuna.”
^ Na kisina, “nkuna.”
^ Na kisina, “Nkuna.”
^ Na kisina, “nkuna.”
^ To “ta baka lusakumunu sambu na bo mosi.”
^ Yo ke tendula “Nzo ya Nzambi.”
