Yeremia 2:1-37
2 Ndinga ya Yehowa kwisilaka mono nde:
2 “Kwenda mpi samuna na makutu ya Yeruzalemi nde, ‘Yehowa ke tuba nde:
“Mono ke yibuka mbote mutindu nge vandaka kudipesa* ntangu nge vandaka leke,+Zola yina nge monisaka ntangu bo silaka nge na makwela,+Mutindu nge landaka mono na ntoto-makanga,Na ntoto yina bo ke kunaka ve bima.+
3 Izraele vandaka santu na meso ya Yehowa,+ bambuma ya ntete ya bima yina yandi katulaka na bilanga.”’
‘Konso muntu yina diaka yandi salaka mbi.
Mpasi vandaka kubwila bo,’ Yehowa muntu me tuba.”+
4 Wa ndinga ya Yehowa, O nzo ya Yakobi,Mpi beno yonso mabuta ya nzo ya Izraele.
5 Yehowa ke tuba nde:
“Inki kifu ba-nkaka na beno monaka na mono,+Sambu bo kuma ntama kibeni ti mono,Mpi bo landa biteki ya kukonda mfunu+ mpi bo mosi kukuma bantu ya kukonda mfunu?+
6 Bo yulaka ve nde, ‘Yehowa kele na wapi,Muntu yina basisaka beto na insi ya Ezipte,+Yina twadisaka beto na ntoto-makanga,Na ntoto ya zelo na zelo+ mpi ya mabulu,Na ntoto ya kuyuma+ mpi ya mpimpa ya ngolo,Na ntoto yina muntu mosi ve ke salaka nzieteloMpi kisika muntu mosi ve ke zingaka?’
7 Na nima, mono nataka beno na ntoto yina kele ti bisika ya bo me kunaka banti yina ke butaka bambuma,Sambu beno dia bambuma na yo mpi bima na yo ya mbote.+
Kansi beno kotaka mpi beno kumisaka ntoto na mono mvindu;Beno kumisaka dikabu na mono kima ya nzanzi.+
8 Banganga-nzambi yulaka ve nde, ‘Yehowa kele na wapi?’+
Bantu yina ke longaka Nsiku zabaka mono ve,Bangungudi kolamaka na ntwala na mono,+Bambikudi bikulaka na zina ya Baale,+Mpi bo landaka banzambi yina lendaka ve kunatila bo mambote.
9 ‘Yo yina mono ta nwana diaka ti beno,’+ Yehowa muntu me tuba,‘Mpi mono ta nwana ti bana ya bana na beno.’
10 ‘Kansi beno sabuka na bantoto ya Kitimi+ yina kele na lweka ya nzadi-mungwa* mpi beno mona.
Ee, beno tinda nsangu na Kedare+ mpi beno tadila diambu yina mbote-mbote;Beno tala kana diambu ya mutindu yai me bwaka ntete.
11 Keti dikanda mosi me katulaka banzambi na yo mpi me yingisaka yo na bayina kele ve banzambi?
Kansi bantu na mono me katulaka lukumu na mono mpi me yingisaka yo na kima yina me konda mfunu.+
12 Nge zulu, tala diambu yai ti kuyituka;Tekita na boma ya ngolo,’ Yehowa muntu me tuba,
13 ‘Sambu bantu na mono me sala mambu zole ya mbi:
Bo me yambula mono, nto ya masa ya luzingu,+Mpi bo me kuditimunina mabulu ya masa,Mabulu ya masa ya kubeba, yina lenda bumba ve masa.’
14 ‘Keti Izraele kele nsadi to mpika yina me butuka na nzo?
Ebuna sambu na nki bo me bika nde bo botula yandi?
15 Bana-bantambu* ke nganina yandi;+Bo me tombula ndinga na bo.
Bo me kumisa insi na yandi kima ya ke pesa boma.
Bo me yoka bambanza na yandi tiya, yo yina muntu mosi ve ke zinga kuna.
16 Bantu ya Nofi*+ mpi ya Tapanesi+ ke dia na zulu ya ntu na nge.
17 Keti nge me kudinatila ve makambu yaiNa mutindu nge yambulaka Yehowa Nzambi na nge+Ntangu yandi vandaka kutwadisa nge na nzila?
18 Ntangu yai, sambu na nki nge ke zola kukwenda na Ezipte+Sambu na kunwa bamasa ya Shihore?*
Sambu na nki nge ke zola kukwenda na Asiria+Sambu na kunwa bamasa ya Nzadi?*
19 Mambu na nge ya mbi fwete sungika nge,Mpi kukonda kwikama na nge mosi fwete nganina nge.
Zaba mpi bakisa mutindu yo kele mbi mpi bululu+Na kuyambula Yehowa Nzambi na nge;Nge me wa mono boma ve,’+ Mfumu ya Kuluta Nene, Yehowa ya makesa, muntu me tuba.
20 ‘Sambu tuka ntama mono panzaka vangu na nge+Mpi mono katulaka miniololo na nge.
Kansi nge tubaka nde: “Mono ta sadila nge ve,”
Sambu na konso ngumba ya fioti mpi na nsi ya konso nti ya kele ti matiti mingi+Nge vandaka kulala makadi-kadi, nge ke sala kindumba.+
21 Mono kunaka nge bonso vinu ya mbwaki ya kitoko,+ yonso vandaka nkeni ya bunkete;Ebuna, inki mutindu nge me kuma balutangu ya kubeba ya nti ya vinu ya nzenza na ntwala na mono?’+
22 ‘Ata nge yobila ti mukedi* mpi nge sadila sabuni* mingi,Mbi na nge ta vanda kaka ditono na ntwala na mono,’+ Yehowa Mfumu ya Kuluta Nene muntu me tuba.
23 Inki mutindu nge lenda tuba nde, ‘Mono me kudikumisa ve mvindu.
Mono me landa ve Babaale’?
Tala nzila na nge na muwanda.
Tadila mambu yina nge me sala.
Nge kele bonso mwana ya shamo ya nkento yina kele ntinu,Yina ke baka ntinu mpamba-mpamba na ntwala mpi na nima na banzila na yandi,
24 Mpunda ya mfinda yina me yikanaka na ntoto- makanga,Yina ke benda mupepe na mbombo sambu na nzala na yo ya ngolo ya kuvukisa nitu.*
Nani lenda kanga yandi nzila na ntangu yandi kele na nzala ya ngolo ya kuvukisa nitu?
Bayina yonso ke sosa yandi ta vanda ve na mfunu ya kudilembisa.
Bo ta mona yandi na nsungi* na yandi.
25 Keba makulu na nge sambu yo kuma ve makulu-nguluMpi mungungu na nge sambu yo wa ve nzala ya masa.
Kansi nge tubaka nde, ‘Kivuvu kele ve!+
Ve! Mono me zola banzenza,*+Mpi mono ta landa bo.’+
26 Mutindu muyibi ke waka nsoni ntangu bo me kanga yandi,Mutindu mosi mpi, bo me pesa nzo ya Izraele nsoni,Bo, bantotila na bo, mpi bamfumu na bo,Banganga-nzambi na bo mpi bambikudi na bo.+
27 Bo ke tubila nti nde, ‘Nge kele tata na mono,’+
Mpi bo ke tubila ditadi nde, ‘Nge muntu butaka mono.’
Bo ke pesa mono mukongo kansi luse ve.+
Mpi na ntangu ya bo ke mona mpasi, bo ta tuba nde,‘Telama mpi gulusa beto!’+
28 Ntangu yai, wapi banzambi na nge yina nge kudisadilaka?+
Bika bo telama kana bo lenda gulusa nge na ntangu ya nge ke mona mpasi,Sambu banzambi na nge me kuma mingi bonso bambanza na nge, O Yuda.+
29 ‘Sambu na nki beno ke landa kunwana ti mono?
Sambu na nki beno yonso me kolama na ntwala na mono?’+ Yehowa muntu me tuba.
30 Mono me bula bana na nge kukonda kikuma.+
Bo ta ndima ve ndola;+Mbele na nge mosi ya bitumba diaka bambikudi na nge,+Bonso ntambu yina ke nwanisaka.
31 O ndonga ya bantu, beno tadila ndinga ya Yehowa.
Keti mono me kuma bonso ntoto-makanga sambu na IzraeleTo ntoto ya mpimpa ya ngolo?
Sambu na nki bantu na mono yai me tuba nde, ‘Beto ke tambula na kimpwanza.
Keti beto ta kwisa diaka ve na nge’?+
32 Keti mwense lenda vila bima na yandi ya kukumisa nitu kitoko,Mpi keti nkento yina ke kwela lenda vila bilele na yandi ya kukanga na ntulu?*
Kansi bantu na mono me vila mono bilumbu mingi.+
33 O nkento, nge ke yidika nzila na nge na mayele kibeni sambu na kusosa zola!
Nge me kudilonga na banzila ya mambu ya mbi.+
34 Ata bilele na nge kele ti matono ya menga ya bansukami*+ yina me salaka kima ve,Ata mono monaka bo ve ntangu bo ke sala mambu ya mbi;Yo kele na bilele na nge yonso.+
35 Kansi nge ke tuba nde, ‘Mono me sala kima ve.
Ya kieleka yandi ke wila mono diaka ve makasi.’
Ntangu yai mono ke pesa nge ndolaSambu nge ke tuba nde, ‘Mono me sala ve disumu.’
36 Sambu na nki nge ke mona mpamba nzila na nge ya ke soba-sobaka?
Nge ta wa mpi Ezipte nsoni,+Kaka mutindu nge waka Asiria nsoni.+
37 Sambu na kikuma yai mpi, nge ta basika maboko na zulu ya ntu,+Sambu Yehowa me buya bantu yina nge ke tudila ntima;Bo ta sadisa nge ve na kununga.”
Banoti na nsi ya lutiti
^ To “ke yibuka mbote zola ya kwikama na nge.”
^ To “bisanga.”
^ To “Bana-bantambu yina kele ti mika mingi na nkingu.”
^ To “Memfisi.”
^ Disongidila, kitini ya Nzadi ya Nile.
^ Disongidila, Efrate.
^ To “mungwa ya basenzi.”
^ Na kisina, “sude.”
^ To “sambu na nzala ya ngolo ya moyo na yandi.”
^ Na kisina, “na ngonda.”
^ To “banzambi ya nzenza.”
^ To “mukaba na yandi ya makwela.”
^ To “menga ya mioyo.”
