Yeremia 44:1-30
44 Ndinga yina kwisilaka Yeremia sambu na Bayuda yonso yina vandaka kuzinga na insi ya Ezipte,+ bayina vandaka kuzinga na Migdole,+ na Tapanesi,+ na Nofi,*+ mpi na insi ya Patrosi,+ nde:
2 “Yehowa ya makesa, Nzambi ya Izraele, ke tuba nde, ‘Beno me mona bampasi yonso yina mono natilaka Yeruzalemi+ mpi bambanza yonso ya Yuda, mpi bubu yai yo kele mayumbu, kukonda bantu ke zinga kuna.+
3 Yo kele sambu na mambu ya mbi yina bo salaka sambu na kupesa mono makasi na mutindu bo kwendaka, bo pesaka bimenga,+ mpi bo sadilaka banzambi ya nkaka yina bo zabaka ve, yo vanda beno to ba-nkaka na beno.+
4 Mono landaka kutindila beno bansadi na mono yonso bambikudi, mono vandaka kutinda bo mbala na mbala,* mpi kutuba nde: “Pardo, beno sala ve diambu yai ya nzanzi ya mono ke mengaka.”+
5 Kansi bo waka ve mpi bo tulaka ve makutu sambu na kuyambula mambu na bo ya mbi na kupesaka ve bimenga na banzambi ya nkaka.+
6 Yo yina mono monisaka nganzi na mono mpi makasi na mono na bambanza ya Yuda mpi na babala-bala ya Yeruzalemi, ebuna yo kumaka mayumbu mpi ntoto ya mpamba, mutindu yo kele bubu yai.’+
7 “Ntangu yai, Yehowa, Nzambi ya makesa, Nzambi ya Izraele, ke tuba nde, ‘Sambu na nki beno ke kudinatila* mpasi ya ngolo, na mpila nde konso bakala mpi nkento, mwana mpi mwana-fioti, ta fwa na Yuda, ebuna muntu mosi ve ta bikala na kati na beno?
8 Sambu na nki beno fwete pesa mono makasi na bisalu ya maboko na beno na mutindu beno ke pesa makabu na banzambi ya nkaka na insi ya Ezipte kisika beno me kwenda kuzinga? Beno ta fwa mpi beno ta kuma kima ya bo me singa mpi ya nsoni na kati ya makanda yonso ya ntoto.+
9 Keti beno me vila mambu ya mbi ya ba-nkaka na beno, mambu ya mbi ya bantotila ya Yuda,+ mpi mambu ya mbi ya bankento na bo,+ mpi mambu na beno mosi ya mbi ti mambu ya mbi ya bankento na beno,+ yina beno salaka na insi ya Yuda mpi na babala-bala ya Yeruzalemi?
10 Tii bubu yai bo me kudikulumusaka ve,* bo me waka boma ve,+ bo me zitisaka mpi ve nsiku na mono mpi bantuma na mono yina mono tulaka na ntwala na beno mpi ya ba-nkaka na beno.’+
11 “Yo yina, Yehowa ya makesa, Nzambi ya Izraele, ke tuba nde, ‘Mono kele ti lukanu ya kunatila beno mpasi, ya kufwa Yuda ya mvimba.
12 Mono ta baka bantu ya Yuda yina me bikala, bayina vandaka ti lukanu ya kukwenda na insi ya Ezipte sambu na kuzinga kuna, mpi bo yonso ta fwa na insi ya Ezipte.+ Bo ta bwa na mbele ya bitumba mpi bo ta fwa na nzala; yantika na muntu ya kukonda mfunu tii na muntu ya mfunu mingi, bo ta fwa na mbele ya bitumba mpi na nzala. Mpi bo ta kuma kima ya kusinga, kima ya ke pesa boma, mpi kima ya nsoni.+
13 Mono ta pesa bantu yina ke zinga na insi ya Ezipte ndola kaka mutindu mono pesaka Yeruzalemi ndola. Mono ta pesa bo ndola na mbele ya bitumba, na nzala, mpi na kipupa.*+
14 Mpi bantu ya Yuda yina me bikala, bayina me kwenda kuzinga na insi ya Ezipte, ta tina ve mpi ta guluka ve sambu bo vutuka na insi ya Yuda. Bo ta vanda ti nzala ya ngolo ya* kuvutuka mpi kuzinga kuna, kansi bo ta vutuka ve, katula kaka ndambu ya bantu yina ta tina.’”
15 Babakala yonso yina zabaka nde bankento na bo vandaka kupesa bimenga na banzambi ya nkaka, bankento yonso yina telamaka pana, bayina salaka kimvuka mosi ya nene, ti bantu yonso yina vandaka kuzinga na insi ya Ezipte,+ na Patrosi,+ vutudilaka Yeremia nde:
16 “Beto ta wa ve mambu yina nge me tubila beto na zina ya Yehowa.
17 Kansi, beto ta lungisa kibeni mambu yonso yina munoko na beto me tuba, sambu na kupesa bimenga na Ntotila-Nkento ya Zulu* mpi kutiamuna makabu ya malafu sambu na yandi,+ kaka mutindu beto, ba-nkaka na beto, bantotila na beto, mpi bamfumu na beto salaka na bambanza ya Yuda mpi na babala-bala ya Yeruzalemi ntangu beto vandaka ti mampa mingi mpi beto vandaka bamvwama, ntangu beto vandaka kumona ve mpasi ata fioti.
18 Katuka ntangu yina beto yambulaka kupesa bimenga na Ntotila-Nkento ya Zulu* mpi kutiamuna makabu ya malafu sambu na yandi, beto me konda bima yonso mpi beto me fwa na mbele ya bitumba mpi na nzala.”
19 Bankento yikaka nde: “Mpi ntangu beto vandaka kupesa bimenga na Ntotila-Nkento ya Zulu* mpi kutiamuna makabu ya malafu sambu na yandi, keti beto vandaka kusala bagato yina vandaka bonso kiteki na yandi sambu na kupesa makabu mpi kutiamuna makabu ya malafu sambu na yandi kukonda nswa ya babakala na beto?”
20 Ebuna Yeremia tubilaka bantu yonso, babakala ti bankento na bo mpi bantu yonso yina vandaka kusolula ti yandi nde:
21 “Bimenga yina beno, ba-nkaka na beno, bantotila na beno, bamfumu na beno, mpi bantu ya insi yai pesaka na bambanza ya Yuda mpi na babala-bala ya Yeruzalemi+—Yehowa yibukaka yo mpi yo kwisilaka yandi na ntima!
22 Nsuka-nsuka, Yehowa lendaka diaka ve kukanga ntima na bisalu na beno ya mbi mpi na mambu ya nzanzi yina beno salaka, ebuna insi na beno kumaka kisika ya bo me bebisa, kima ya ke pesa boma mpi kima ya kusinga, kukonda muntu ya ke zinga kuna, mutindu yo kele bubu yai.+
23 Yo kele sambu beno pesaka bimenga yai mpi sambu beno salaka masumu na ntwala ya Yehowa na mutindu beno lemfukaka ve na ndinga ya Yehowa mpi beno landaka ve nsiku na yandi, bantuma na yandi, mpi bangibusa na yandi, yo yina mpasi yai me kwisila beno, mutindu yo kele bubu yai.”+
24 Yeremia landaka kutubila bantu yonso mpi bankento yonso nde: “Beno wa mambu ya Yehowa ke tuba, beno yonso bantu ya Yuda yina kele na insi ya Ezipte.
25 Yehowa ya makesa, Nzambi ya Izraele, ke tuba nde, ‘Mambu yina beno ti bankento na beno me tuba na munoko na beno, beno me sala yo ti maboko na beno, sambu beno tubaka nde: “Beto ta lungisa kibeni balusilu na beto ya kupesa bimenga na Ntotila-Nkento ya Zulu* mpi ya kutiamuna makabu ya malafu sambu na yandi.”+ Beno bankento, beno ta lungisa kibeni balusilu na beno mpi beno ta sala nde balusilu na beno kulungana.’
26 “Yo yina, beno wa ndinga ya Yehowa, beno yonso bantu ya Yuda yina ke zinga na insi ya Ezipte: ‘“Mono ke zenga kieleka na zina na mono ya nene,” Yehowa muntu me tuba, “nde ata muntu mosi ve ya Yuda,+ yina ke zinga na insi ya mvimba ya Ezipte, ta binga diaka zina na mono sambu na kudia ndefi nde, ‘Ya kieleka mutindu Yehowa Mfumu ya Kuluta Nene kele na luzingu!’+
27 Ntangu yai mono ke kengila bo sambu na kunatila bo mpasi kansi diambu ya mbote ve;+ bantu yonso ya Yuda yina kele na insi ya Ezipte ta fwa na mbele ya bitumba mpi na nzala, tii kuna bo ta vanda diaka ve na luzingu.+
28 Bantu fioti mpamba ta tina mbele ya bitumba mpi ta katuka na insi ya Ezipte sambu na kuvutuka na insi ya Yuda.+ Ebuna bantu yonso ya Yuda ya me bikala yina kwisaka na insi ya Ezipte sambu na kuzinga kuna ta zaba bangogo ya nani me lungana, ya mono to ya bo!”’”
29 “‘Mpi yai kidimbu sambu na beno,’ Yehowa muntu me tuba, ‘nde mono ta pesa beno ndola na kisika yai, sambu beno zaba nde mambu ya mono tubaka sambu na kusila beno mpasi ta lungana kibeni.
30 Yehowa ke tuba nde: “Mono ke pesa Farao Ofra, ntotila ya Ezipte, na maboko ya bambeni na yandi mpi ya bantu yina ke sosa kufwa yandi,* kaka mutindu mono pesaka Sidikiya ntotila ya Yuda na maboko ya Nebukadenezare* ntotila ya Babilone, yina vandaka mbeni na yandi mpi yina vandaka kusosa kufwa yandi.”’”*+
Banoti na nsi ya lutiti
^ To “Memfisi.”
^ Na kisina, “mono vandaka kutelama na suka-suka mpi kutinda bo.”
^ To “ke natila mioyo na beno.”
^ To “me monaka ve nde bo me bedisa bo.”
^ To “maladi.”
^ To “ta tombula moyo na bo sambu na.”
^ Titre ya nzambi-nkento mosi yina bantu ya Izraele yina kolamaka vandaka kusambila; ziku nzambi-nkento ya lubutu.
^ Titre ya nzambi-nkento mosi yina bantu ya Izraele yina kolamaka vandaka kusambila; ziku nzambi-nkento ya lubutu.
^ Titre ya nzambi-nkento mosi yina bantu ya Izraele yina kolamaka vandaka kusambila; ziku nzambi-nkento ya lubutu.
^ Titre ya nzambi-nkento mosi yina bantu ya Izraele yina kolamaka vandaka kusambila; ziku nzambi-nkento ya lubutu.
^ To “ke sosa moyo na yandi.”
^ Na kisina, “Nebukadrezare,” mutindu ya nkaka ya kusonika yo.
^ To “vandaka kusosa moyo na yandi.”
