Yezaya 1:1-31
1 Mbona-meso yina Yezaya*+ mwana ya Amozi monaka sambu na Yuda mpi Yeruzalemi na bilumbu ya Uziya,+ Yotami,+ Ahazi,+ mpi Ezekiasi,+ bantotila ya Yuda:+
2 O zulu, wa, mpi tula dikebi, O ntoto,+Sambu Yehowa me tuba nde:
“Mono me sansa mpi me yedisa bana,+Kansi bo me kolama na ntwala na mono.+
3 Ngombe ke zabaka mbote muntu yina me sumba yo,Mpi mpunda ke zabaka mbote kidikilu ya munkwa na yo;Kansi Izraele ke zaba mono* ve,+Bantu na mono mosi ke sala ve mambu ti mayele ya kubakisa mambu.”
4 Mawa na dikanda ya masumu,+Bantu yina kele ti kilo ya masumu,Bana ya bantu ya mbi, bana ya kubeba!
Bo me yambula Yehowa;+Bo me sadila Santu ya Izraele mambu kukonda luzitu;Bo me pesa yandi mukongo.
5 Bo ta bula beno diaka na wapi, sambu beno ke landa kukolama?+
Ntu ya mvimba ke bela,Mpi ntima ya mvimba kele maladi.+
6 Katuka na makulu tii na ntu, ata kima mosi ve kele na mavimpi ya mbote.
Kele ti bamputa, matutu mpi bamputa ya kukanguka—Bo me sansa* yo ve, bo me kanga yo ve babande, mpi bo me kumisa yo ve pete ti mafuta.+
7 Insi na beno me bikala mpamba.
Bo me yoka bambanza na beno tiya.
Banzenza me bebisa insi na beno na meso na beno.+
Yo kele bonso ntoto mosi ya mpamba yina banzenza me bwisa.+
8 Mwana-nkento ya Sioni me bikala bonso kisika ya lutaninu* na kilanga mosi ya vinu,Bonso sombolo mosi na kilanga ya bakonkombre,Bonso mbanza mosi ya bo me ziunga.+
9 Kana Yehowa ya makesa bikilaka beto ve ndambu ya bantu yina gulukaka,Beto zolaka kukuma bonso Sodome,Mpi beto zolaka kufwanana ti Gomore.+
10 Beno bamfumu ya nku* ya Sodome,+ beno wa ndinga ya Yehowa.
Beno bantu ya Gomore,+ beno tula dikebi na nsiku* ya Nzambi na beto.
11 Yehowa ke tuba nde: “Inki kele mfunu ya bimenga ya mingi yina beno ke pesa mono?+
Mono me lemba makabu na beno ya kuyoka ya mameme ya babakala+ mpi mafuta ya bambisi yina bo ke disaka mbote,+Mpi mono ke wa ve kiese na menga+ ya bana-bangombe ya babakala,+ ya bana-mameme mpi ya bankombo.+
12 Ntangu beno ke kwisa sambu na kumonana na ntwala na mono,+Nani me songa beno na kukwisaSambu na kuniata bibansala na mono?+
13 Beno yambula kunata diaka makabu ya mbuma ya kukonda mfunu.
Ndumbu na beno kele kima ya nzanzi na meso na mono.+
Bangonda ya mpa,+ bisaba- tu,+ kubinga bantu sambu na balukutakanu ya nene+—Mono lenda ndima ve mutindu beno ke sadila mazi+ mpi kaka na ntangu yina mosi beno ke sala lukutakanu ya santu.
14 Mono* me menga bangonda na beno ya mpa ti bankinsi na beno.
Yo me kuma kizitu sambu na mono;Mono me lemba na kunata yo.
15 Mpi ntangu beno ke tandula maboko na beno,Mono ke fika meso na mono sambu na kumona beno ve.+
Ata beno ke sala bisambu mingi,+Mono ke wa yo ve;+Maboko na beno me fuluka na menga.+
16 Beno yobila, beno kudikumisa bunkete;+Beno katula bisalu na beno ya mbi na meso na mono;Beno yambula kusala mambu ya mbi.+
17 Beno longuka na kusala mambu ya mbote, beno sosa lunungu,+Beno sungika muntu yina ke niokula bantuBeno nwanina banswa ya mwana ya me konda tata,*Mpi beno nwanina diambu ya mufwidi ya nkento+ na tribinale.”
18 Yehowa+ ke tuba nde: “Ntangu yai, beno kwisa mpi beto tula mambu na ndonga na kati na beto.
Ata masumu na beno kele mbwaki bonso menga,Yo ta kuma mpembe bonso mvula ya mpembe;*+Ata yo kele mbwaki bonso lele ya mbwaki ya ngolo,Yo ta kuma bonso lene.
19 Kana beno monisa luzolo ya mbote mpi beno wa,Beno ta dia bima ya mbote ya insi.+
20 Kansi kana beno buya mpi beno kolama,Beno ta fwa na mbele ya bitumba,+Sambu munoko ya Yehowa me tuba yo.”
21 Mbanza ya kwikama+ me kuma kibeni nkento ya ndumba!+
Yandi vandaka ya kufuluka ti lunungu;+Lunungu vandaka na kati na yandi,+Kansi ntangu yai kaka bantu yina ke fwaka bantu kele na kati na yandi.+
22 Arza na nge me kuma mvindu ya kibende ya bo ke tomisa,+Mpi malafu na nge* me vukana ti masa.
23 Bamfumu na nge kele ntu ngolo mpi bo kele banduku ya miyibi.+
Konso muntu na kati na bo ke zolaka kubaka avoka mpi ke sosa-sosaka makabu.+
Bo ke sambisa ve mambu ya mwana ya me konda tata* na lununguMpi diambu ya mufwidi ya nkento ke kumina bo+ ve ata fioti.
24 Yo yina Mfumu ya kieleka, Yehowa ya makesa,Muntu ya Ngolo ya Izraele, ke tuba nde:
“A! Mono ta katula bambeni na mono,Mpi mono ta vutula mbi na bambeni na mono.+
25 Mono ta pesa nge ndola,Mono ta kumisa mvindu na nge masa-masa bonso ti sabuni,Mpi mono ta katula mvindu na nge yonso.+
26 Mono ta vutula diaka bazuzi na nge bonso na luyantiku,Mpi bandongisi na nge bonso na luyantiku.+
Na nima, bo ta binga nge Mbanza ya Lunungu, Bwala ya Kwikama.+
27 Bo ta sumba diaka+ Sioni ti lunungu,Mpi bantu na yandi yina ke vutuka, bo ta sumba bo diaka mpi ti lunungu.
28 Bankolami ti bansumuki ta fwa nzila mosi,+Mpi bantu yina ke bikisa Yehowa ta suka.+
29 Sambu bo ta wa nsoni ya banti ya ngolo yina beno waka nzala na yo,+Mpi beno ta wa nsoni sambu na bilanga* yina beno solaka.+
30 Sambu beno ta kuma bonso nti ya nene yina kele ti matiti ya kuyuma,+Mpi bonso kilanga ya me konda masa.
31 Muntu ya ngolo ta kuma nsinga ya fioti,*Mpi kisalu na yandi ta kuma ka-nsemo;Bo yonso zole ta zika na tiya kumosi,Mpi muntu ya kufwa tiya yina ta vanda ve.”
Banoti na nsi ya lutiti
^ Yo ke tendula, “Luguluku ya Ke Katukaka na Yehowa.”
^ To “mfumu na yo.”
^ Na kisina, “me bweta.”
^ To “kisasa.”
^ To “bamfumu.”
^ To “malongi.”
^ To “Moyo na mono.”
^ To “mwana-nsiona.”
^ To “neige.”
^ To “malafu na nge ya ble.”
^ To “bana-nsiona.”
^ Yo ke monana nde yo kele banti mpi bilanga yina kele na kuwakana ti lusambu ya biteki.
^ Nsinga yina ke piaka tiya.
