Yezaya 49:1-26
49 Beno bisanga, beno wa mono,Mpi beno makanda+ ya ntama, beno tula dikebi.
Yehowa bingaka mono na ntwala nde mono butuka.*+
Tuka ntangu yina mono vandaka na divumu ya mama na mono, yandi tubilaka zina na mono.
2 Yandi kumisaka munoko na mono bonso mbele ya makasi ya bitumba;Yandi bumbaka mono na kivudi ya diboko+ na yandi.
Yandi kumisaka mono tolo- tolo ya bo me kumisa butesi;Yandi bumbaka mono na lupaya na yandi.
3 Yandi tubilaka mono nde: “O Izraele,+ nge kele nsadi na mono,Yina na nzila na yandi mono ta monisa lukumu+ na mono.”
4 Kansi mono tubaka nde: “Mono salaka kisalu ya ngolo sambu na mpamba.
Mono sadilaka ngolo na mono sambu na kima mosi ya ke vandaka ve, sambu na mpamba.
Kansi ya kieleka Yehowa ta sambisa mambu na mono na lunungu,*Mpi lufutu* na mono kele na Nzambi na mono.”+
5 Ntangu yai Yehowa, Muntu yina salaka mono katuka na divumu sambu mono vanda nsadi na yandi,Me tubila mono nde mono vutudila yandi Yakobi,Sambu Izraele kuvukana kisika yandi kele.+
Bo ta pesa mono nkembo na meso ya Yehowa,Mpi Nzambi na mono ta kuma ngolo na mono.
6 Mpi yandi tubaka nde: “Yo me fwana kaka ve nde nge vanda nsadi na monoSambu na kutedimisa makanda ya YakobiMpi kuvutula bantu ya Izraele yina bikalaka.
Mono me pesa nge na kuvanda nsemo ya makanda,+Sambu mono gulusa bantu tii na nsuka ya ntoto.”+
7 Yehowa, Muntu ya me sumbaka diaka Izraele, Santu na yandi,+ me tuba na muntu yina bo me vwezaka,*+ na muntu yina dikanda me mengaka, na nsadi ya bamfumu, nde:
“Bantotila ta mona mpi ta telama,Ebuna bamfumu ta fukamaSambu na Yehowa, yina kele ya kwikama,+Santu ya Izraele, yina me solaka nge.”+
8 Yehowa me tuba nde:
“Na ntangu ya kundimama,* mono pesaka nge+ mvutu,Mpi mono sadisaka nge+ na kilumbu ya luguluku;Mono landaka kutanina nge sambu na kupesa nge bonso kuwakana sambu na bantu,+Sambu na kuyidika diaka insi,Sambu na kusala nde bo baka bisika na bo yina bikalaka mpamba ya bo me bakaka bonso dikabu,+
9 Sambu na kutuba na bantu ya boloko nde, ‘Beno basika!’+
Mpi na bantu yina kele na mpimpa+ nde, ‘Beno kudimonisa!’
Bo ta dia na banzila ya nene,Banseke na bo ta vanda na banzila yonso ya kubeba.*
10 Bo ta wa ve nzala, bo ta wa mpi ve nzala ya masa,+Tiya ya ngolo to ntangu ta bula bo+ mpi ve.
Sambu Muntu yina ke wila bo mawa ta nata bo,+Mpi yandi ta twadisa bo pene-pene ya banto ya masa.+
11 Mono ta kumisa bangumba na mono yonso nzila,Mpi banzila na mono ya nene ta nanguka.+
12 Tala! Bantu yai me katuka ntama,+Mpi tala! bayai me katuka na nordi mpi na westi,Mpi bayai ya nkaka me katuka na insi ya Sinimi.”+
13 Zulu, tula milolo ya kiese, mpi nge ntoto, wa kiese.+
Bika nde bangumba kukuma na kiese ti milolo ya kiese.+
Sambu Yehowa me lembika bantu na yandi,+Mpi yandi me wila bantu na yandi yina ke mona mpasi mawa.+
14 Kansi Sioni vandaka kaka kutuba nde:
“Yehowa me yambula mono,+ mpi Yehowa me vila mono.”+
15 Keti nkento lenda vila mwana na yandi ya ke nwa mabeleTo kukonda kuwa mawa sambu na mwana ya me basika na divumu na yandi?
Ata bankento yai kuvila, mono ta vila nge ve ata fioti.+
16 Tala! Mono me sonika nge na bipala-pala ya maboko na mono.
Bibaka na nge kele ntangu yonso na ntwala na mono.
17 Bana na nge ke vutuka nswalu.
Bantu yina bebisaka nge mpi fwaka nge ta katuka na kati na nge mpi ta kwenda.
18 Tombula meso na nge mpi tala ndambu na ndambu.
Bo yonso ke vukana kisika mosi.+
Bo ke kwisa kisika nge kele.
“Ya kieleka mutindu mono kele na luzingu,” Yehowa muntu me tuba,“Nge ta lwata bo yonso bonso bima ya ke kumisaka nitu kitoko,Mpi nge ta lwata bo na nitu na nge bonso nkento yina ke kwela ke lwataka mayaka.
19 Ata bo bebisaka bisika na nge mpi yo bikalaka mpamba mpi insi na nge bikalaka mayumbu,+Ntangu yai yo ta kuma fioti kibeni sambu na bantu yina ke zingaka kuna,+Mpi bantu yina bebisaka+ nge ta vanda ntama.+
20 Bana yina butukaka ntangu nge fwilaka ta tuba na makutu na nge nde,‘Kisika yai kele fioti mingi sambu na mono.
Bikila mono kisika sambu mono zinga awa.’+
21 Mpi nge ta tuba na ntima na nge nde,‘Nani me butilaka mono bana yai,Sambu mono kele nkento yina me fwilaka bana mpi mukobo,Yina me kwendaka na insi ya nkaka mpi yina bo me tulaka na boloko?
Nani me yedisaka bana yai?+
Tala! Mono bikalaka kaka mono mosi,+Ebuna bayai me katuka na wapi?’”+
22 Yehowa Mfumu ya Kuluta Nene me tuba nde:
“Tala! Mono ta nangula diboko na mono na ndambu yina makanda kele,Mpi mono ta tedimisa kidimbu* na mono na ndambu yina bantu kele.+
Bo ta kwisa kunata bana na nge ya babakala na maboko* na boMpi ta nata bana na nge ya bankento na mapeka na bo.+
23 Bantotila ta kuma bantu yina ta kebaka nge,+Mpi bana-bankento ya ntotila ta kuma bandesi na nge ya bankento.
Bo ta fukama na ntwala na nge ti baluse na ntoto+Mpi ta lenga mfututu ya makulu na nge,+Ebuna nge ta zaba nde mono kele Yehowa;Bayina ke tulaka kivuvu na mono bo ta pesa bo ve nsoni.”+
24 Keti bo lenda botula bantu yina bo kangaka dezia na maboko ya muntu ya ngolo,To keti bo lenda gulusa bampika ya mfumu mosi ya nku?
25 Kansi Yehowa me tuba nde:
“Ata bampika ya muntu ya ngolo, bo ta botula bo,+Mpi bantu yina mfumu ya nku me kangaka, bo ta gulusa bo.+
Mono ta nwanisa bantu yina ke nwanisa nge,+Mpi mono ta gulusa bana na nge.
26 Mono ta sala nde bantu yina ke niokula nge kudia nsuni na bo mosi,Mpi bo ta lawuka menga na bo mosi mutindu bantu ke lawukaka vinu ya sukadi.
Mpi bantu yonso* ta zaba nde mono kele Yehowa,+Ngulusi na nge+ mpi Muntu ya ke sumba nge diaka,+Muntu ya Ngolo ya Yakobi.”+
Banoti na nsi ya lutiti
^ Na kisina, “katuka na divumu.”
^ Na kisina, “lusambisu na mono kele na Yehowa.”
^ To “matabisi.”
^ To “bo me vwezaka na moyo.”
^ To “ya luzolo ya mbote.”
^ To mbala ya nkaka, “na bangumba yonso ya fioti ya me konda banti.”
^ To “nti yina kele kidimbu.”
^ Na kisina, “na ntulu.”
^ Na kisina, “nsuni yonso.”
