Yezaya 8:1-22
8 Yehowa tubilaka mono nde: “Baka kitini mosi ya nene ya dibaya+ mpi sonika na zulu na yo ti kilapi yina bantu yonso ke vandaka na yo* nde, ‘Mahere-shalale-ashi-bazi.’*
2 Mpi bika nde bambangi ya kwikama, nganga-nzambi Uria+ mpi Zekaria mwana ya Yeberekia, kusonikila mono yo sambu na kundimisa* yo.”
3 Ebuna mono vukisaka nitu ti* mbikudi ya nkento,* yandi bakaka divumu mpi na nima yandi butaka mwana ya bakala.+ Yehowa tubilaka mono nde: “Pesa yandi zina Mahere-shalale-ashi-bazi,
4 sambu na ntwala nde mwana yina kuzaba kubinga, ‘Tata na mono!’ mpi ‘Mama na mono!’ bo ta nata na meso ya ntotila ya Asiria bima ya Damasi mpi bima yina bo ta botula na Samaria.”+
5 Yehowa tubilaka mono diaka nde:
6 “Sambu bantu yai me buya bamasa ya Shiloa*+ ya ke kulumukaka malembe- malembe,Mpi bo ke wa kiese sambu na Resini ti mwana ya Remalia,+
7 Yo yina sambu na kunwanisa bo, Yehowa ta nataBamasa ya ngolo mpi ya nene ya Nzadi,*Ntotila ya Asiria+ ti nkembo na yandi yonso.
Yandi ta kwisa na zulu ya bamasa na yandi yonsoMpi ta fulusa balweka yonso ya bamasa na yandi
8 Ebuna yandi ta kwenda nswalu na Yuda.
Yandi ta fuluka mpi ta luta, mpi ta kuma tii na nkingu;+Mapapu na yandi ya kutandula ta fuluka na insi na nge ya mvimba,O Emanuele!”*+
9 Beno bantu, beno pesa mpasi, kansi bo ta zenga beno bitini-bitini.
Beno wa, beno bantu yonso ya bisika ya ntama ya ntoto!
Beno yilama* sambu na bitumba, kansi bo ta zenga beno bitini-bitini!+
Beno yilama sambu na bitumba, kansi bo ta zenga beno bitini-bitini!
10 Beno baka bangidika, kansi yo ta nunga ve!
Beno tuba mambu yina beno ke zola, kansi yo ta salama ve,Sambu Nzambi kele ti beto!*+
11 Ti diboko na yandi ya ngolo na zulu na mono, Yehowa tubilaka mono mambu yai sambu na kukebisa mono na kulanda ve nzila ya bantu yina:
12 “Beno fwete binga ve komplo kima yina bantu yai ke binga komplo!
Beno wa ve boma ya mambu yina bo ke wa boma!Beno tekita ve sambu na yo.
13 Yehowa ya makesa—yandi kele Muntu yina beno fwete mona nde yandi kele santu,+Yandi kele Muntu yina beno fwete wa boma,Mpi yandi kele Muntu yina fwete sala nde beno tekita.”+
14 Yandi ta kuma bonso kisika ya santu,Kansi bonso ditadi ya ke budisaka sakuba+Mpi bonso ditadi ya ke bwisakaSambu na banzo yonso zole ya Izraele,Yandi ta kuma bonso mutambu mpi bukondiSambu na bantu ya Yeruzalemi.
15 Bantu mingi na kati na bo ta bula sakuba, ta bwa mpi ta bukana;Bo ta tudila bo mutambu mpi bo ta kangama.
16 Dimba-dimba mukanda ya kundimisa yina bo me sonikaka,Kanga nsiku* na kati ya balongoki na mono!
17 Mono ta vingila* Yehowa,+ yina ke bumba luse na yandi sambu nzo ya Yakobi+ kumona yo ve, mpi mono ta tula kivuvu na yandi.
18 Tala! Mono ti bana yina Yehowa me pesaka mono,+ beto kele na Izraele bonso bidimbu+ mpi bonso bimangu yina me katuka na Yehowa ya makesa, yina ke zingaka na Ngumba ya Sioni.
19 Mpi kana bo tubila beno nde: “Beno yula bantu yina ke solulaka ti bampeve ya bafwa to bantu yina ke zabisaka bantu mambu yina ta kumina bo, bantu yina ke yimba-yimbaka mpi ke nguna-ngunaka,” keti bantu fwete yula ve Nzambi na bo? Keti bo fwete yula bafwa sambu na mambote ya bantu yina kele na luzingu?+
20 Kansi, bo fwete yula nsiku mpi kimbangi yina bo me sonikaka!
Ntangu bo ke tuba ve na kuwakana ti ndinga yai, bo kele ve ti nsemo.*+
21 Mpi konso muntu ta luta na insi yina ti mpasi mpi nzala; mpi sambu yandi ta vanda na nzala mpi makasi,+ yandi ta singa ntotila na yandi ti Nzambi na yandi ntangu yandi ta tala na zulu.
22 Ebuna yandi ta tala na ntoto mpi ta mona kaka mpasi ti mudidi, mpimpa ya ngolo ti bantangu ya mpasi, mpimpa mpi kukonda nsemo.
Banoti na nsi ya lutiti
^ Na kisina, “ti kilapi.”
^ Ziku yo ke tendula “Kukwenda Ntinu na Bima ya Bo Me Botula, Kukwisa Nswalu na Bima ya Bo Me Yiba.”
^ To “kuta kimbangi na; kumonisa.”
^ Na kisina, “pusanaka pene-pene ya.”
^ Disongidila, nkento ya Yezaya.
^ Shiloa vandaka nzila ya ke nataka masa.
^ Disongidila, Efrate.
^ To “Beno kanga luketo na beno.”
^ To “malongi.”
^ To “vingila ti nzala ya ngolo.”
^ Na kisina, “nsemo ya suka.”
