SAMBU NA NKI YO KELE MFUNU: Sambu Yehowa kundima balongoki ya Biblia, bo fwete pesa yandi luzingu na bo mpi kubaka mbotika. (1Pi 3:21) Bantu yina ke zingaka na kuwakana ti kudipesa na bo, Yehowa ke taninaka bo na kimpeve. (Nk 91:1, 2) Mukristu ke kudipesaka na Yehowa, kansi ve na muntu, na kisalu, to na kimvuka mosi buna. Yo yina, balongoki fwete yedisa zola mpi ntonda sambu na Nzambi.—Bar 14:7, 8.

MUTINDU YA KUSALA YO:

• Na ntangu beno ke longuka, beno tubila mambu yina malongi ya beno ke longuka ke monisa sambu na Yehowa. Monisa mfunu ya kutanga Biblia konso kilumbu mpi ya kusamba Yehowa “ntangu yonso.”—1Te 5:17; Yak 4:8

• Siamisa longoki na kubaka balukanu ya kimpeve ya kudipesa mpi ya kubaka mbotika. Diaka, sadisa yandi na kulungisa balukanu yina yandi lenda lungisa na ntangu fioti, mu mbandu, kupesa bakomantere na balukutakanu to kuta kimbangi na bantu ya ke zingaka pene-pene na yandi to na banduku ya kisalu. Yibuka nde Yehowa ke pusaka ve muntu na ngolo na kusadila yandi. Kudipesa kele lukanu ya muntu yandi mosi.—Kul 30:19, 20

• Siamisa longoki na kusala bansoba ya me fwana sambu na kusepedisa Yehowa mpi kulungisa mambu ya bo ke lombaka sambu na kubaka mbotika. (Bin 27:11) Sambu bifu ya nkaka lenda vanda mpasi na kumana, yo lenda lomba nde nge sadisa longoki ntangu yonso na kukatula kimuntu ya ntama mpi kulwata kimuntu ya mpa. (Efe 4:22-24) Beno tadila masolo ya Nzozulu ya Nkengi yina ke vandaka na ntu-diambu “Biblia Ke Sobaka Luzingu ya Bantu”

• Zabisa yandi kiese yina nge me bakaka sambu nge ke sadilaka Yehowa.—Yez 48:17, 18