Banda na 2018, bazulunalu ya bantu yonso me kumaka kutubila kaka disolo mosi na nimero ya mvimba. Bazulunalu yai yonso kele na kati ya Bisadilu Sambu na Kulonga. Yo yina, beto lenda sadila yo na kisalu ya kusamuna. Beto lenda nata mpi mwa bazulunalu ntangu beto ke sala nzietelo to ke kwenda na zandu. Beto ke sadilaka ve bazulunalu sambu na kulonguka Biblia ti bantu kansi yo lenda pesa muntu nzala ya kulonguka mambu mingi ya Nzambi.

Ntangu nge ke solula ti muntu, tangila yandi verse mosi mpi tubila disolo mosi ya kele na zulunalu yina lenda sepedisa yandi. Kana muntu yango kele ti dibuta to ke kutana ti bampasi to basusi, nge lenda songa yandi nde: “Mono me katuka kutanga disolo mosi ya kitoko ya ke tubila mambu yai. Mono lenda songa nge yo?” Kana yandi me monisa mpusa, nge lenda pesa yandi zulunalu ya papie to kutindila yandi yo na telefone ata na mbala ya ntete ya nge me kutana ti yandi. Lukanu na beto ya ntete ke vandaka ve kaka ya kukabula bazulunalu, kansi bazulunalu lenda sadisa beto na kuzwa bantu yina ta ndima kusadila mambu yina beto ke longa bo.—Bis 13:48.