Kubasisa muntu na dibundu ke taninaka dibundu mpi yo ke pesaka ndola na bantu yina me balula ve ntima. (1Bk 5:6, 11) Beto ta monisa zola kana beto ke zitisa ndola ya Yehowa. Inki mutindu yo lenda vanda masonga nde kubasisa muntu na dibundu ke pesaka mpasi na bantu ya dibuta mpi na komite ya kusambisa?

Ntete-ntete, beto ke monisaka nde beto ke zolaka Yehowa kana beto ke fingisa ve zina na yandi mpi beto ke sala ve mambu yina ke vandaka mvindu na meso na yandi. (1Pi 1:14-16) Beto ke monisaka mpi zola sambu na muntu yina bo basisaka na dibundu. Ndola ya ngolo mpi ya mpasi lenda buta “lunungu, yina kele mbuma ya ngemba.” (Ebr 12:5, 6, 11) Beto ta monisa nde beto ke zitisa ve ndola ya Yehowa kana beto ke vukana ti muntu yina bo me basisa na dibundu to muntu yina me kudikatula na dibundu. Beto vila ve nde Yehowa ke pesaka bansadi na yandi ndola “na kiteso yina me fwana.” (Yer 30:11) Kana beto ke zitisa ndola ya Yehowa mpi ke tanina kimpeve na beto, beto ta ndima nde muntu yina bo me basisa na dibundu ta vutuka na Tata na beto yina ke wilaka bantu mawa.—Yez 1:16-18; 55:7.

SONGA VIDEO TANINA KWIKAMA NA NTIMA MOSI MPI NA NIMA BENO PESA BAMVUTU NA BANGIUFULA YAI:

• Inki mpasi bibuti yina kele Bakristu ke waka kana mwana na bo me yambula Yehowa?

• Inki mutindu dibundu lenda sadisa bampangi ya dibuta yina kele ya kwikama?

• Inki disolo ya Biblia ke monisa beto nde kubikala ya kwikama na Yehowa kele mfunu mingi kuluta kubikala ya kwikama na dibuta?

• Inki mutindu beto ke tulaka kwikama na beto na Yehowa na kisika ya ntete kuluta kwikama na beto sambu na dibuta?