Kuditula na kisika ya bantu ya nkaka ke tendula kubakisa mutindu bantu ya nkaka ke yindulaka, ke kudiwaka, ke tadilaka mambu mpi kubakisa bampusa na bo. Kana beto ke kuditula na kisika ya bantu ya nkaka, bo ke zabaka yo. Kana beto kele ti nzala ya ngolo ya kusadisa bantu ya nkaka, beto ta kuditula na kisika na bo. Kana beto ke kuditula na kisika ya bantu ya nkaka na kisalu ya kusamuna, beto ta landa mbandu ya Yehowa na yina me tala zola mpi kutudila bantu ya nkaka dikebi. Yo ta pusa bantu na kuzola kuzaba yandi.—Fil 2:4.

Kuditula na kisika ya bantu ya nkaka kele ve kaka metode ya beto ke sadilaka sambu na kulonga. Beto ta monisa nde beto ke kuditula na kisika ya bantu ya nkaka kana beto ke widikila bo na dikebi yonso mpi na mawete. Beto ta monisa mpi nde beto ke kuditula na kisika ya bantu ya nkaka kana beto ke tubila bo na mutindu ya mbote. Beto ta monisa yo mpi na mambu ya beto ke sala, na bidimbu na beto ya nitu mpi ya luse. Beto ta monisa diaka nde beto ke kuditula na kisika ya bantu ya nkaka kana beto tudila bo dikebi na masonga yonso. Beto vila ve dikebi yina bo me monisa, balukwikilu na bo mpi luzingu na bo. Beto fwete songa bo mambu ya mfunu mpi kusadisa bo. Kansi beto fwete pusa bo ve na kusoba. Kana bantu ya nkaka ke ndima nde beto sadisa bo, yo ke pesaka beto kiese mingi na kisalu ya kusamuna.

TALA VIDEO VANDA NA KIESE NA KISALU YA KUKUMISA BANTU BALONGOKI MPI TOMISA MAYELE NA NGE YA KULONGA—KUDITULA NA KISIKA YA BANTU YA NKAKA, MPI NA NIMA BENO PESA BAMVUTU NA BANGIUFULA YAI:

• Inki mutindu Neta kuditulaka na kisika ya Jade ntangu Jade kwisaka na retare?

• Inki mutindu Neta kuditulaka na kisika ya Jade ntangu Jade tubaka nde yandi kele mbote ve sambu na kulonguka Biblia?

• Inki mutindu Neta kuditulaka na kisika ya Jade ntangu Jade tubaka nde yandi kele kibeni ve muntu ya ndonga?