Bubu yai na ntoto ya mvimba, bifwa-makutu me kuma kiteso ya 70 milio. Mingi na kati na bo ke sadilaka ndinga mosi buna ya bidimbu sambu na kusolula. Badinga ya bidimbu ke vandaka kuluta 200. Kansi diambu ya mawa kele nde, mbala mingi bo ke sadilaka bifwa-makutu mambu ya mbi mutindu mambu yai bo me tubaka ke monisa yo:

•   Kimvuka mosi (National Association of the Deaf [U.S.]) tubaka nde: “Na ntoto ya mvimba, bantu ke zolaka ve kutadila banswa yina bifwa-makutu mpi bantu yina ke waka ve mbote ke vandaka ti yo.”

•   Kimvuka ya nkaka (World Federation of the Deaf) tubaka nde: “Bifwa-makutu ya ke zingaka na bansi yina bantu kele bansukami, ke vandaka bansukami ya kuluta bansukami yonso sambu bo ke kotaka ve nzo-nkanda, bo ke zwaka ve bisalu mpi bo ke pesaka bo ve bansangu ya bo fwete zaba.”

 Nzambi ke kudiwaka inki mutindu sambu na bifwa-makutu? Inki Biblia ke tuba sambu na bifwa-makutu? Mpi Inki mutindu Bambangi ya Yehowa ke sadisa bo bubu yai?

Mutindu Nzambi Ke Tadilaka Bifwa-Makutu

 Biblia ke monisa nde Yehowa a ke lungisaka mpusa ya bifwa-makutu. Yandi ke zola nde bantu kusadila bo mambu ya mbote mpi nde bo baka malongi yina yandi ke pesaka.

 Verse: “Nge fwete singa ve kifwa-makutu.”​—Levi 19:14.

 Verse: “Nzambi ke pona-ponaka ve.”​—Bisalu 10:34.

 Verse: “Yezu vandaka kukwenda . . . , kusamuna nsangu ya mbote ya Kimfumu.”​—Matayo 9:35.

 Verse: Nkutu Yezu salaka nde “bifwa-makutu kuwa mpi bababa kutuba.”​—Marko 7:37.

 Verse: “Makutu ya bifwa-makutu ta wa.”​—Yezaya 35:5.

 Ntendula: Yehowa me tubaka nde bifwa-makutu ta wa.​—Yezaya 29:18.

Mutindu Bambangi ya Yehowa Ke Sadisa Bifwa-Makutu Bubu Yai

 Na nsi-ntoto ya mvimba, Bambangi ya Yehowa ke longaka bifwa-makutu nsangu ya Nzambi yina ke pesaka bantu kivuvu. Inki beto ke salaka sambu na kusala kisalu yai? Beto ke basisaka Babiblia mpi bavideo ya ke sadisaka bo na kulonguka Biblia na bandinga ya bidimbu kuluta 100. Beto ke longaka mpi bantu Biblia na Ndinga ya Bidimbu mpi beto ke salaka balukutakanu ya Bukristu na Ndinga ya Bidimbu. Beto ke sadisaka bantu yina ke zolaka kubaka lusadisu ya Nzambi na mutindu yina, kukonda kulomba bo mbongo. Sambu na nki? Sambu Yezu pesaka nsiku nde: “Beno me baka ya ofele, beno pesa mpi ya ofele.”​—Matayo 10:8.

 Nge lenda kota na Internet sambu na kumona bisadilu yina to nge lenda baka yo kuna mpi kutula yo na apareyi na nge. Nge lenda baka yo na:

 JW.ORG. Bweta kidimbu ya ndinga. Yo ke vandaka na zulu ya konso lutiti ya site Internet sambu na kupona ndinga mosi ya siki-siki.

 Application JW Library Sign Language. Application yai ke vandaka ya ofele. Nge lenda tula yo na apareyi na nge, mpidina nge lenda baka bavideo to kulanda bavideo ya ndinga ya bidimbu na Internet.

Inki Beto Ke Sadilaka Sambu na Kulonga Biblia?

 Biblia na ndinga ya bidimbu. Biblia​—Mbalula ya Nsi-Ntoto ya Mpa na Ndinga ya Bidimbu ya Amerika kele Biblia ya ntete ya mvimba yina basikaka na ndinga ya bidimbu. Bubu yai Mbalula ya Nsi-Ntoto ya Mpa kele ya mvimba to ya kitini na bandinga mingi ya bidimbu mpi ya nkaka ke yikama konso mvula. (Sambu na kutala lisiti ya bandinga to kutala Biblia yina kele na Internet, tala lupangu “ Mbalula ya Nsi-Ntoto ya Mpa ya Biblia na ndinga ya bidimbu.”)

•   Sambu na kuzaba kisalu yina yo ke lombaka kusala sambu na kubasisa Biblia na ndinga ya Bidimbu, tala video La Traduction du monde nouveau en entier est maintenant disponible en langue des signes américaine.

•   Sambu nde nge kuma kutanga Biblia kukonda mpasi, tula application JW Library Sign Language na apareyi na nge. Application yina ta pesa nge nzila ya kupona baverse ya Biblia na Biblia yina kele na ndinga ya bidimbu.

•   Dmytro mpi Vita kele bifwa-makutu. Bana na bo mpi kele bifwa-makutu. Tala inki mutindu dibuta na bo ke bakaka konso kilumbu mambote ntangu bo ke talaka Biblia na ndinga ya bidimbu.

 Bavideo yina ke longaka mambu ya Biblia. Bambangi ya Yehowa me basisaka bavideo na ndinga ya bidimbu mpi bavideo yango ke sadisaka bantu na kubakisa mpi na kusadila bandongisila ya Biblia sambu na . . .

•   Makwela mpi Dibuta

•   Baleke mpi Bambuta

•   Bana

 Kulonguka Biblia ti muntu kimuntu-kimuntu. Longuka nsangu ya kele na Biblia na Ndinga ya Bidimbu na vitesi na nge ti lusadisu ya longi mosi. Lomba nde bo songa mutindu ya kulonguka Biblia ya ofele.

 Jeson Senajonon ke zingaka na Philippines. Tala inki mutindu kulonguka Biblia sadisaka yandi na kukuma nduku ya ngolo ya Nzambi.

 Mario Antúnez vandaka pastere na Honduras. Tala inki mutindu yandi zwaka bamvutu na bangiufula yina yandi vandaka kudiyula sambu na Biblia. Yandi ke tubila yo na disolo na yandi ya kele ti ntu-diambu “Mono Vandaka ti Bangiufula Mingi ya Kukonda Bamvutu.”

 Balukutakanu ya dibundu mpi balukutakanu ya nkaka. Konso kisika na nsi-ntoto ya mvimba, beto kele ti mabundu mpi bimvuka na ndinga ya bidimbu. Kuna, bifwa-makutu ke vukanaka konso mposo sambu na kulanda malongi ya Biblia mpi kusambila Nzambi. Konso mvula, beto ke yidikaka mpi balukutakanu ya nkaka ya nene ya ke tubilaka malongi ya Biblia na ndinga ya bidimbu. Na balukutakanu na beto, yo vanda ya fioti to ya nene, beto ke sadilaka ndinga ya bidimbu yina bo ke simbaka bantu yina me fwaka meso mpi makutu na maboko sambu na kubalutidila bo manaka. Beto ke kabulaka mpi mikanda yina bo me sonikaka na ndinga ya bifwa-meso (braille) ya ofele.

•   Sosa dibundu mosi ya kele pene-pene ti nge.

•   Yikama ti balukutakanu na beto ya distrike mpi ya nziunga.

•   Kwisa na Nkinsi ya Kuyibuka Lufwa ya Yezu, nkinsi ya kuluta mfunu ya beto ke salaka konso mvula.

 José Luis Ayala ke zingaka na Mexique. Yandi butukaka kifwa-makutu mpi na nima yandi kumaka kifwa-meso. Sosa kuzaba mutindu bo sadisaka yandi na kukuma longi ya mbote ya Biblia.