Prezida ya Kimvuka ya Banki ya Nsi-Ntoto ya Mvimba tubaka na rapore ya juin 2022 nde: “Ntalu ya bima mpi ya mambu ya nkaka ya kusadila bantu kele na kumata nswalu kansi kwaku bantu kele ve ti mbongo mingi.”

 Kimvuka mosi ya Ke Talaka Mambu ya Mbongo na Nsi-Ntoto ya Mvimba (Fonds monétaire international) me tuba nde: “Ntalu ya carburant mpi ya bima ya nkaka me mata nswalu, diambu yai ke natila bantu yina ke zingaka na bansi ya kinsukami mpasi mingi kuluta.”

 Biblia ke sadisa beto na kuzaba sambu na nki mpasi ya mbongo ya mutindu yai ke kumina beto, mutindu beto lenda kangila yo ntima mpi kivuvu yina beto kele ti yo nde mambu ya mutindu yai ta mana.

•   Biblia ke binga ntangu yai ya beto ke zinga nde “bilumbu ya nsuka.”—2 Timoteo 3:1.

•   Yezu tubaka nde “mambu ya ke pesa boma” ta salama na nsungi yai. (Luka 21:11) Bantu ke wa boma ntangu bo ke mona nde ntalu ya bima ke mata nswalu. Bo ke wa boma na yina me tala mutindu luzingu na bo ta vanda na bilumbu ke kwisa mpi kana bo ta kuka kulungisa bampusa ya mabuta na bo.

•   Mukanda ya Kusonga tubaka na ntwala nde bima ta kuma ntalu mingi na nsungi yai. “Mono waka bonso ndinga mosi . . . ke tuba nde: ‘Muntu yina me sala kilumbu ya mvimba, salere na yandi kele kilo mosi ya ble to kilo tatu ya orze.’”—Kusonga 6:6, Bible en Kituba.

 Sambu na kuzaba mambu mingi na yina me tala “bilumbu ya nsuka” mpi mukanda ya Kusonga yina ke tubilaka mambu yina ta salama, tala video Mambu ya Nsi-Ntoto Me Sobaka Banda na 1914 mpi tanga disolo “Bantu Iya ya Ke Tambusa Bampunda—Bo Kele Banani?”

•   “Bo ta tunga banzo mpi ta zinga muna, bo ta kuna bilanga ya vinu mpi ta dia mbuma na yo. Bo ta tunga ve sambu muntu ya nkaka kuzinga, bo ta kuna mpi ve sambu bantu ya nkaka kudia.”—Yezaya 65:21, 22.

•   “Mbuma ta vanda mingi kibeni na ntoto; yo ta fuluka na nsongi ya bangumba.”—Nkunga 72:16.

•   “‘Sambu bo ke niokula bantu ya ke mona mpasi, sambu na kudila ya nsukami, mono ta telama sambu na kusala diambu,’ Yehowa muntu me tuba.”—Nkunga 12:5. a

 Kubika fioti, Nzambi ta manisa bampasi ya mbongo na ntoto ya mvimba, kansi ve kaka na insi mosi mpamba. Sambu na kuzaba inki mutindu yandi ta sala yo, tanga disolo “Keti Bantu Yonso Lenda Vanda Kiteso Mosi na Mambu ya Mbongo?”

 Kansi yo vanda bubu, Biblia lenda sadisa nge na kuzaba mutindu nge lenda kanga ntima mpila bima ke mata ntalu. Inki mutindu? Biblia kele ti bandongisila ya mfunu na yina me tala mutindu nge lenda sadila mbongo mbote. (Bingana 23:4, 5; Longi 7:12) Sambu na kuzaba mambu mingi, tanga disolo “Tanina Bima ya Nge Ke Zingilaka” mpi disolo “Mutindu ya Kuzinga ti Mbongo Fioti.”