Keti Kilumbu Kele Terorizme Ta Mana?
Kana bateroriste me fwa bantu, nge lenda kudiyula nde: ‘Keti Nzambi ke kipaka beto? Sambu na nki mambu ya mutindu yai ke salamaka? Keti kilumbu kele terorizme a ta mana? Inki mutindu mono lenda zinga ti boma?’ Biblia ke pesa bamvutu ya mbote na bangiufula yai.
Inki mutindu Nzambi ke tadilaka terorizme?
Nzambi ke mengaka mubulu mpi terorizme. (Nkunga 11:5; Bingana 6:16, 17) Yezu, yina kele mumonisi ya Nzambi, nganinaka balongoki na yandi ntangu bo salaka mambu ya mubulu. (Matayo 26:50-52) Ata bantu ya nkaka ke tubaka nde bo ke salaka mambu ya mubulu na zina ya Nzambi, yandi ve muntu ke pesaka bo nzila ya kusala mambu yina. Na kutuba ya kieleka, yandi ke waka nkutu ve ata bisambu na bo.—Yezaya 1:15.
Nzambi ke tulaka dikebi na bantu yonso yina ke monaka mpasi, ata bantu yina ke monaka mpasi sambu na mambu ya bateroriste. (Nkunga 31:7; 1 Piere 5:7) Biblia ke tuba mpi nde Nzambi ta sukisa mubulu.—Yezaya 60:18.
Kisina ya terorizme
Biblia ke tubila kisina ya terorizme. Yo ke tuba nde: “Muntu me yalaka muntu sambu na kupesa yandi mpasi.” (Longi 8:9) Na disolo ya luzingu ya bantu, bamfumu me sadilaka terorizme sambu na kupesa bantu mpasi. Sambu bo ke monisaka bo mpasi, bantu ya nkaka me sadilaka terorizme sambu na kudinwanina.—Longi 7:7.
Nsuka ya terorizme
Nzambi ke sila nde yandi ta manisa boma ti mubulu mpi ta tula ngemba na ntoto. (Yezaya 32:18; Mika 4:3, 4) Yandi ta:
Katula kisina ya terorizme. Nzambi ta katula luyalu ya bantu mpi ta yingisa yo na kimfumu na yandi yina ta yala ntoto ya mvimba. Mfumu ya kimfumu yina kele Yezu Kristu; yandi ta sadila bantu yonso mambu mutindu mosi, mpi yandi ta katula bampasi mpi mubulu. (Nkunga 72:2, 14) Na ntangu yina, ata muntu mosi ve ta sadilaka terorizme. Bantu “ta wa kiese mingi kibeni na ngemba ya mingi.”—Nkunga 37:10, 11.
Katula bampasi yina terorizme me basisaka. Nzambi ta belula bantu na bampasi yina terorizme me natilaka bo, yo vanda bampasi na nitu to na mabanza. (Yezaya 65:17; Kusonga 21:3, 4) Yandi ke sila nde yandi ta futumuna nkutu bantu ya me fwaka, yandi ta vutula bo na luzingu na nsi-ntoto ya ngemba.—Yoane 5:28, 29.
Biblia ke pesa beto bikuma ya mbote ya kundima nde Nzambi ta yidika mambu ntama mingi ve. Kansi nge lenda kudiyula nde: ‘Sambu na nki Nzambi me manisaka ntete ve terorizme?’ Sambu na kubaka mvutu, tala disolo Sambu na Nki Nzambi Me Pesaka Nzila na Bampasi?
a Mbala mingi, ngogo, “terorizme” ke tadilaka kusadila mubulu, mingi-mingi na basivile, sambu na kupesa bo boma mpi kulungisa lukanu mosi ya politiki, ya mambu ya lusambu to ya luzingu. Kansi, beto lenda buya kundima kana bo tuba nde diambu mosi buna kele terorizme to ve.
Nge Lenda Sepela Mpi Ti
MASOLO MPI BAVIDEO
Inki Nge Lenda Sala Sambu Nge Kudiyangisa Ve Kuluta Ndilu
Inki bandongisila ya mfunu mpi baverse ya Biblia lenda sadisa nge kudiyangisa ve kuluta ndilu?
MASOLO MPI BAVIDEO
Kivuvu ya Kieleka Sambu na Bilumbu ya Ke Kwisa
Inki mambu ya Biblia me tubaka nde yo ta salama ya kele ve bonso yina bantu me tubaka nde yo ta salama mpi yina bo me tubaka nde bo ta sala?
BAMVUTU NA BANGIUFULA YA BIBLIA
Kimfumu ya Nzambi Kele Inki?
Sosa kuzaba sambu na nki luyalu ya Nzambi me luta baluyalu yonso ya nkaka.
NZOZULU YA NKENGI
Inki Mambu Kimfumu ya Nzambi Ta Sala?
Yezu zabaka nde Kimfumu ya Nzambi mpamba ta manisa bampasi na ntoto. Inki mambu Kimfumu ya Nzambi me salaka dezia yina ke sadisaka beto na kutudila yo kibeni ntima?
MASOLO MPI BAVIDEO
Keti Bantu Ta Monaka Lunungu Yina Bo Ke Sosaka?
Bible ke monis ande lunungu ya kieleka ke katukaka na Nzambi, yandi ke monaka bantu yonso kiteso mosi.
MALONGI YA MFUNU YA BIBLIA
Sambu na Nki Nzambi Me Pesaka Nzila na Bampasi?
Bantu mingi ke kudiyulaka sambu na nki ntoto me fulukaka ti bampasi mpi mambu ya nku. Biblia ke pesa mvutu ya mbote yina ke pesa kivuvu.
