“Ntama mingi ve, beto lendaka kuyindula nkutu ve nde beto ta bakaka madia ya kimpeve ya beto lenda sadila na ba-apareyi.” Keti nge ke ndima mambu yai? Yo kele mambu ya ke pesa kikesa yina mpangi Geoffrey Jackson tubaka na Rapore No. 6 ya Nto-Kimvuka na Mvu 2020. Yandi tubaka diaka nde: “Kansi bubu, mbala ya nkaka beto lenda kudiyula: inki beto zolaka kusala na ntangu yai ya maladi kana beto vandaka ve ti bisadilu bonso JW Library? Yehowa vandaka kuyidika beto banda bamvula mingi sambu beto vanda ya kuyilama sambu na mambu bonso yai.”

 Inki mutindu Yehowa vandaka kuyidika beto? Inki yo lombaka kusala sambu na kusala aplikasio JW Library? Inki mutindu bo ke yidikaka aplikasio yango mpi bo ke kumisaka yo diaka mbote?

 Na Mayi 2013, Nto-Kimvuka lombaka bampangi ya ke salaka na Baprograme ya Kubasisa Mikanda na Bandinga Mingi (Programmation MEPS) na kusala aplikasio mosi yina ta vanda ti Mbalula ya Nsi-Ntoto ya Mpa na kati. Bampangi yango ke sadilaka Yehowa na departema mosi ya kele na babiro ya ke twadisaka kisalu na beto na ntoto ya mvimba. Mpangi Paul Willies kele na kati ya bampangi yina ke sadilaka Yehowa na departema yina. Yandi ke tuba nde: “Beto me bikaka ntete ve kubasisa aplikasio mosi ya kusadila na ba-apareyi. Kansi beto vukisaka mwa bampangi. Beto bikaka ntete kusala bisalu ya nkaka mpi beto salaka ti badepartema ya nkaka sambu na kusala aplikasio yina mpi mambu yina ta vanda na kati. Beto vandaka kusamba Yehowa mbala na mbala. Yandi sadisaka beto. Yo yina na nima ya bangonda tanu, na lukutakanu ya nene ya ke salamaka konso mvula, aplikasio yina basikaka.”

 Yo vandaka ti kima ya nkaka ya mpasi. Yo vandaka kulomba nde beto sala nde aplikasio yina kukuma biblioteke mpi yo vanda ti mikanda mingi na kati mpi na bandinga mingi. Na Yanuari 2015, mikanda na beto mingi ya vandaka na Kingelesi kotaka dezia na aplikasio yina. Kaka bangonda sambanu na nima, bantu lendaka kusadila Internet sambu na kubaka yo na bandinga mingi ya nkaka.

 Banda pana, bampangi na beto me kumisaka aplikasio yina diaka mbote. Bo me yikaka bavideo, bo me tulaka mikanda mpi bima ya nkaka ya beto ke sadilaka na balukutakanu na kisika mosi (onglet). Diaka, bo me sadisaka bantu ya ke sadilaka aplikasio yai na kukota na bareferansi yina kele na Mukanda ya Bansosa kana bo me bweta na verse mosi ya Biblia.

Kusala nde Biblioteke Kulanda Kusala Kaka Mbote

 Bo ke kangulaka aplikasio JW Library konso kilumbu na bamilio 8 ya ba-apareyi mpi konso ngonda na bamilio kuluta 15 ya ba-apareyi. Inki yo ke lombaka kusala sambu aplikasio yina kulanda kusala mbote na ba-apareyi yina? Mpangi Willies ke tuba nde: “Kana beno me sala aplikasio mosi ya kusadila na ba-apareyi, yo ke lombaka kulanda kutomisa yo. Yo ke lombaka kuyika mbala na mbala bima ya mpa mpi kusadisa bantu na kusadila yo kukonda mpasi. Bisadilu ya bo ke tulaka na ba-apareyi (systèmes d’exploitation) yina bantu ya mumbongo ke basisaka, bo ke tomisaka yo mbala na mbala. Yo yina beto fwete wakanisaka bisadilu yango ti aplikasio JW Library sambu yo landa kusala mbote. Beto fwete sala mpi nde yo beba ve mpi kuyidika yo sambu na kulanda kusadila yo ntangu yonso ya beto ke yika mikanda mpi bima ya mpa ya kuwidikila.” Bubu yai, aplikasio JW Library kele na kimvuka ti kiteso ya mikanda 200 000 mpi bima ya kuwidikila mpi bavideo kuluta 600 000 na bandinga yonso ya kele dezia na kati ya aplikasio.

 Sambu na kusala nde biblioteke yai kulanda kusala mbote, yo ke lombaka mambu mingi katula kuvanda ti bisadilu. Yo ke lombaka kusumba bima mosi buna (licences de logiciels). Tubima yango yina, bo ke tekaka mosi na mbongo ya badolare 1500 ya kusadila na mvula mosi. Diaka, sambu na kuzikisa nde aplikasio ta sala mbote na baordinatere ya mpa, ba tablettes mpi batelefone ya mpa, bampangi ya ke salaka Baprograme ya Kubasisa Mikanda na Bandinga Mingi ke basisaka mbongo ya badolare kiteso ya 10 000 konso mvula sambu na kusumba ba-apareyi yina bantu ya mutindu na mutindu me sala.

 JW Library me sala nde beto basisa diaka ve mbongo mingi sambu na kuniema mikanda, kuvukisa yo mpi kutinda yo na mabundu. Beto baka mbandu ya kamukanda, Beto Fimpa Masonuku Konso Kilumbu. Beto niemaka bamilio 12 ya kamukanda Beto Fimpa Masonuku Konso Kilumbu ya 2013. Kansi sambu na kamukanda yai ya 2020, beto niemaka yo kiteso ya bamilio tanu mpamba, ata na nsi-ntoto ya mvimba bampangi yina ke longaka nsangu ya mbote vandaka kiteso ya 700 000. Sambu na nki beto salaka mutindu yina? Yo kele sambu bampangi na beto mingi ya babakala mpi ya bankento me kumaka kutanga verse ya kilumbu na aplikasio JW Library. a

 JW Library ke sadisaka na mitindu mingi bantu yina ke sadilaka yo. Geneviève ke zingaka na Canada. Yandi ke tuba nde aplikasio yai me sadisaka yandi na kubanda kulonguka mbala na mbala. Yandi ke tuba nde: “Ya Masonga, kana yo vandaka kulomba nde mono vukisa mikanda yonso ya mono kele ti yo mfunu sambu na kulonguka, mono ke mona nde mono zolaka ve kukuka kulonguka konso kilumbu na suka. Kansi ti aplikasio yai, mono ke bakaka kaka tablette na mono mpi mono ke zwaka na kati yonso yina mono ke vandaka ti yo mfunu. Mono me kumisaka lukwikilu na mono ngolo sambu mono ke longukaka mbala na mbala mpi mono me pusanaka diaka mingi pene-pene ya Yehowa.”

 Na ntangu yai ya maladi ya COVID-19 me panzana na ntoto ya mvimba, yo me monana kibeni nde aplikasio yai kele kibeni mfunu. Mpangi-nkento Charlyn ke zingaka na États-Unis. Yandi ke tuba nde: “Mutindu COVID-19 me panzana na ntoto ya mvimba, mvula mosi ti ndambu me luta mpi mono ke monaka diaka ve mikanda ya mpa ya bo me niema. Kansi na nsadisa ya JW Library, beto me dia mbote madia ya kimpeve, mpi mono ke pesa Yehowa mersi mutindu yandi me yidika mambu na zola yonso mpidiayi.”

 Mpangi-nkento Faye ke zingaka na Philippines. Mambu yina yandi ke tuba kele mpi mambu yina bampangi mingi ke tubaka. Yandi ke tuba nde: “Yo kele mambu ya kuyituka. Mono ke sadilaka aplikasio yai mosi mpamba sambu na kulanda kuvanda pene-pene ya Yehowa. Yo kele kima ya ntete ya mono ke kangulaka konso suka. Mono ke widikilaka mambu ya kele na kati ntangu mono ke salaka bisalu na mono ya nzo. Mono ke sadilaka yo sambu na kuyidika balukutakanu mpi malongi ya Biblia ya kulonguka ti bantu. Mono ke talaka bavideo ya kele na kati ntangu mono ke vandaka ve ti kima ya kusala. Mono ke sadilaka yo sambu na kutanga masolo to Biblia ntangu beto ke vingilaka na mulongo. Yo kele aplikasio mosi ya mpamba-mpamba ve.”

 Aplikasio yai kele mpi mfunu mingi sambu na kisalu ya kulonga nsangu ya mbote. Mu mbandu, mpangi-nkento mosi ya ke zingaka na Cameroun vandaka na kisalu ya kulonga nsangu ya mbote. Yandi zolaka kutanga verse mosi ya mpangi-nkento ya nkaka tangaka mwa bampaso me luta. Yandi ke tuba nde: “Mono yibukaka ngogo mosi ya kele na verse yina. Mono kangulaka aplikasio, mono bwetaka na Biblia mpi mono sosaka ngogo yango. Mono zwaka mbala mosi verse yango. Aplikasio yai lenda sadisa mono na kuzwa baverse mingi ya mono ke vilaka.”

 Makabu ya beno ke pesaka na nzila ya bametode yina kele na donate.dan124.com me sadisa beto na kusala aplikasio JW Library, na kusala nde yo landa kusala mbote, mpi na kusala nde beto landa kukumisa yo diaka mbote mingi sambu na mambote ya bampangi na beto ya babakala mpi ya bankento na ntoto ya mvimba. Beto ke pesa beno mersi sambu na kikalulu na beno ya kukaba.

1. Na Oktobri 2013, bo basisaka aplikasio yai mpi yo vandaka ti Mbalula ya Nsi-Ntoto ya Mpa yina bo tomisaka

2. Na Yanuari 2015, bo yikaka mikanda ya nkaka ya Kingelesi mpi ya nkaka diaka mingi ya bandinga ya nkaka

3. Na Novembri 2015, bo yikaka kakidimbu mosi sambu na kutula bisono mukubu (fonction surlignage)

4. Na Mayi 2016, bo yikaka kidimbu Balukutakanu (onglet Réunions)

5. Na Mayi 2017, bo yikaka kakidimbu mosi sambu na kubakilaka banoti (fonction commentaire)

6. Na Desembri 2017, bo yikaka Biblia ya Kulongukila

7. Na Marsi 2019, bantu lendaka kukuma kubaka na nzila ya Internet bima ya kuwidikila, kutala bavideo mpi kutala bareferansi ya kele na Mukanda ya Bansosa

8. Na Yanuari 2021, bo yikaka bima ya nkaka (fonctionnalités) ya kele na mukanda Zinga Mvula na Mvula!