Biblia tubaka dezia nde “insi mosi [ta] nwanisa insi ya nkaka” mpi nde bisumbula ya lugangu ta monika na nsuka ya nsi-ntoto. (Matayo 24:3, 7) Beto monaka mutindu mambu yai ya kupemama lunganaka na mvula ya kisalu 2023. a Kansi ata bitumba mpi bisumbula ya lugangu salamaka na bansi pene-pene ya 100, Bambangi ya Yehowa monisaka zola yina Yehowa ke vandaka ti yo. Inki mutindu?

 Na mvula ya kisalu 2023, bampangi na beto bwilaka bisumbula ya lugangu to bisumbula yina bantu ke vandaka na kisika na yo kuluta 200. Na kimvuka, bimvuka yina leta me ndimaka yina Bambangi ya Yehowa ke sadilaka, sadilaka mbongo ya badolare b kuluta bamilio kumi ya katukaka na mbongo ya makabu yina bampangi ke pesaka na ntoto ya mvimba sambu na kusadisa bantu yina bwilaka mpasi. Na ntalu yina, beto me kotisa ve mbongo yina bampangi mingi ya babakala mpi ya bankento sadilaka na bikesa yina bo ke salaka na babwala ya bo kele. Tala mutindu bo sadilaka makabu na beno sambu na kusadisa bampangi yina bwilaka bisumbula zole ya lugangu.

 Na bansungi ya nkaka, babwala ya nkaka ya Nigéria ke dindaka mbala na mbala na masa kana mvula me noka. Kansi na octobre 2022, masa fulukaka na insi na mutindu yina yo me bikaka ntete ve kusalama bamvula kumi. Ba-ektare ya bilanga kuluta 676 000 bebaka mpi bo katulaka bantu kuluta bamilio zole na bisika yina bo vandaka mpi bo nataka bo na bisika ya nkaka. Betele ya Nigeria tulaka nswalu Bakomite Yina Ke Sadisaka Bantu Yina Me Bwila Mpasi sambu na kuyidika kisalu ya kusadisa bampangi na kinsuni mpi na kimpeve.

•   Bo nataka bampangi 7 505 ya ke longaka nsangu ya mbote na bisika ya nkaka

•   Banzo 860 bebaka to bukanaka

•   Banzo ya Kimfumu 90 mpi Nzo mosi ya Balukutakanu ya Nene dindaka na masa

 Bo sadilaka mbongo ya badolare kuluta 250 000 sambu na kusadisa bampangi, bo sadilaka yo sambu na bima yai:

•   Madia mu mbandu loso, madesu, mpi madia ya bo ke bingaka nouilles

•   Bima ya nzo mu mbandu bamatela mpi bamustikere

•   Kuyidika to kutunga diaka banzo yina bebaka

 Inki mutindu bampangi na beto zikisaka nde bo ke sadila mbote mbongo ya makabu? Bo talaka mbote-mbote konso nzo sambu na kuzaba kana yo ke lomba kuyidika yo kaka to kutunga ya nkaka. Kana bo mona nde yo ke lomba kutunga nzo ya nkaka, bo vandaka kutunga nzo mosi ya kukonda mindondo bonso banzo ya nkaka ya kisika yina.

 Bampangi na beto ya babakala mpi ya bankento yina bo sadisaka ke pesa mersi ya mingi. Mpangi-nkento mosi tubaka nde: “Mvula yina ya ngolo kumisaka luzingu na beto mpasi sambu yo bebisaka baferme na beto mpi beto vandaka diaka ve ti banzo. Beto bakaka lusadisu ntangu bampangi na beto ya babakala mpi ya bankento kwisaka kaka kilumbu yango yina sambu na kusadisa beto mpi kupesa beto bisika ya kuvanda. Beto zwaka lusadisu ya nene ntangu bo pesaka beto bima ya kudia yina Betele tindilaka beto. Beto yitukaka ngolo kibeni sambu beto monaka nde mambu yina Biblia ke tuba na Yoane 13:34, 35 lunganaka na luzingu na beto. . . . Zola ya kieleka ke vandaka kibeni. Mono ti dibuta na mono ya mvimba, beto ke pesa beno yonso bampangi yina kwisaka kusadisa beto na ntangu ya me fwana mersi na ntima ya mvimba.”

 Bampangi ya nkaka ya bwala na beto monaka kisalu ya kusadisa bantu yina salamaka. Mfumu mosi ya Sabagreia na Bayelsa tubaka nde: “Ba-organizasio mpi mabundu kele mingi na ntoto, kansi Bambangi ya Yehowa mpamba bantu me sala diambu ya mutindu yai. . . . Organizasio na [beno] kele organizasio ya kuluta mbote na ntoto.”

 Na février 2023, batiya kuluta 400 bebisaka bima mingi na insi Chili. Ba-ektare kuluta 430 000 ya ntoto tanga mpi banzo ya nkaka ya mfunu ya insi bebaka. Bo nataka bantu kiteso ya 8 000 na bisika ya nkaka. Bilumbu fioti na nima ya mpasi yina, Betele yantikaka kuyidika mambu sambu na kusadisa bampangi.

•   Bo nataka bampangi 222 yina ke longaka nsangu ya mbote na kisika ya nkaka

•   Banzo 20 ya bampangi bebaka

 Sambu na kusadisa bampangi yina bwilaka mpasi, bo basisaka mbongo ya badolare kuluta 200 000 sambu na kusumba bima yai:

•   Bima ya kudia mpi masa

•   Karbira, bima ya kutudila bunkete, mpi bankisi ya kunwa

•   Kutunga diaka banzo yina bukanaka

 Dibuta mosi waka mpasi mingi ntangu bo monaka nde bima yonso yina bo vandaka ti yo bebaka, yo vanda nzo na bo to mumbongo na bo. Diambu yai salaka nde dibuta yai kuvanda diaka ve ti kisalu yina lenda sadisa bo na kuzwa mbongo. Na bilumbu ya ntete, yo vandaka kusala bo mpasi ntangu bo vandaka kutala kisika yina nzo na bo vandaka me bikala pululu. Kansi ntangu bo monaka nde bo bampangi ke tunga diaka nzo na bo, bo yantikaka kudiwa mbote. Bampangi yina ya bavolontere monisaka nde bo ke zolaka bo mingi. Diambu yai sadisaka bo na kukanga ntima. Mambu yai ya salamaka pusaka dibuta yai na kuvukana ti bavolontere yina sambu na kutunga nzo ya mpangi ya nkaka.

 Kisalu yina ya kusadisa bantu ya me bwila mpasi simbaka ntima ya bampangi na beto mingi ya babakala mpi ya bankento. Mpangi-bakala mosi tubaka nde: “Ngidika ya Yehowa ya kuvanda ti Bakomite sambu na Kusadisa Bampangi Yina Me Bwila Mpasi kele ngidika mosi ya mbote kibeni. Na kilumbu yina landaka mpasi yango, bampangi yina vandaka dezia pana sambu na kupesa bampangi bima ya mfunu ya luzingu. Kutanga mambu ya me tala kisalu ya kusadisa bampangi yina me bwila mpasi ke pesa kibeni kikesa. Kansi kana mambu yina me bwila nge, yo ke vandaka mutindu ya nkaka. Nge ta kuma kusepela diaka mingi ti organizasio, ti mutindu bampangi ke landa mbandu ya bikalulu ya Yehowa, mpi mutindu bo ke salaka kibeni yonso sambu beto vanda ti bima yina beto kele na yo mfunu na kinsuni, na kimpeve mpi na mawi. Beto ke monaka zola ya Yehowa.”

 Mutindu nsi-ntoto yai ke kwenda na nsuka, bisumbula ya lugangu ta landa kusalama mingi. (Luka 21:10, 11) Kansi na nzila ya dibundu ya Bukristu, beto ke mona nde Yezu Kristu yina kele Ntotila na beto ya zola, kele ti beto bilumbu yonso tii na nsuka ya nsi-ntoto. (Matayo 28:20) Makabu ya luzolo ya mbote yina beno ke pesaka na nzila ya donate.dan124.com mpi na mitindu ya nkaka sambu kisalu yai kusalama na nsi-ntoto ya mvimba mpi ntangu ti ngolo ya beno ke pesaka, ke monisa nde beno ke pesa maboko na Kimfumu mpi na Ntotila na yo ya zola. Matondo sambu na kikalulu yai ya kukaba ya beno ke landa kumonisa.