Konso mvula, bo ke bingisaka na Gileadi, Nzo-Nkanda ya Biblia ya La Société Watchtower mwa bampangi ya ke sadilaka Yehowa na kisalu ya ntangu yonso na ntoto ya mvimba. Nzo-nkanda yango ke salamaka na kisika La Société Watchtower ke longaka bana ya nzo-nkanda na Patterson na New York. a Na nzo-nkanda yango, bana ya nzo-nkanda ke longukaka mutindu bo lenda lungisa mbote-mbote mikumba yina bo ke pesa bo na organizasio ya Yehowa. Formasio yina bo ke bakaka na nzo-nkanda yango ke sadisaka bo na kupesa kikesa na bampangi ya kele na mabundu mpi na Babetele na ntoto ya mvimba.

 Gileadi kele kibeni nzo-nkanda yina bo ke bingisaka bampangi ya ntoto ya mvimba. Mu mbandu, nzo-nkanda ya 147 yina salamaka na 2019 vandaka ti bana ya nzo-nkanda 56. Bana ya nzo-nkanda yai katukaka na bansi 29. Bana ya nzo-nkanda yina landaka malongi na nzo-nkanda ya 147 vandaka bampangi yina ke sadilaka Yehowa na kisalu ya ntangu yonso na Babetele, bankaka vandaka bankengi ya nziunga, bamisionere to bapasudi-nzila ya nene.

 Bangidika sambu na nzo-nkanda yai ke yantikaka na ntwala kibeni. Mu mbandu, Biro ya Ke Talaka Mambu ya Nzietelo ya kele na Babiro ya Ke Twadisaka Kisalu na Beto na Ntoto ya Mvimba ke sumbaka babiye sambu na bana ya nzo-nkanda. Sambu na nzo-nkanda ya 147 ya Gileadi, sambu konso mwana ya nzo-nkanda kukuma na Patterson, bo sumbilaka konso mwana ya nzo-nkanda biye na mbongo ya badolare 1,075. Yo lombaka nde bana ya nzo-nkanda yina katukaka na îles Salomon kubaka ba-avio iya sambu na kukuma na Patterson, mpi sambu na kuvutuka yo lombaka nde bo baka ba-avio tatu. Bo salaka nzietelo ya bakilometre kuluta 35,400. Yo lombaka kufutila konso mwana ya nzo-nkanda mbongo ya badolare 2,300 sambu na banzietelo yina. Sambu na kubasisa ve mbongo mingi, Biro ya Ke Talaka Mambu ya Nzietelo ya kele na Babiro ya Ke Twadisaka Kisalu na Beto na Ntoto ya Mvimba ke sadilaka kisadilu mosi ya ke sadisaka bo na kulomba nde bo bumbila bana ya nzo-nkanda bisika na ntalu ya mbote. Ata na nima ya kubumbila bana ya nzo-nkanda bisika, kisadilu yina ke salaka nde bo landa kuzikisa bamposo mingi, yo vanda bangonda mingi sambu na kuzaba na wapi ntalu ya babiye me kita. Biro ya Ke Talaka Mambu ya Nzietelo ya kele na Babiro ya Ke Twadisaka Kisalu na Beto na Ntoto ya Mvimba ke sadilaka ngidika mosi (crédits et le kilométrage donnés par les compagnies aériennes) sambu na kuzwa babiye.

 Bana mingi ya nzo-nkanda ke vandaka ti mfunu ya mukanda mosi (visas) sambu na kukota na États-Unis. Yo yina, Biro ya Ke Talaka Mambu ya Bansiku ya Kele na Babiro ya Ke Twadisaka Kisalu na Beto na Ntoto ya Mvimba ke sadisaka bana ya nzo-nkanda na kuzwa mukanda yango (visas). Sambu nde konso mwana ya nzo-nkanda kuzwa mukanda yango mpi kufuta mbongo ya kusonikisa zina, yo ke lombaka mbongo ya badolare kiteso ya 510.

 Inki mutindu formasio yina bana ya nzo-nkanda ke bakaka na nzo-nkanda yango ke natilaka beto mambote? Gunawan kele nkuluntu na Asie du Sud-Est. Yandi kele dibundu mosi ti bakala mosi mpi nkento na yandi. Bakala yina ti nkento na yandi bakaka maplome na Gileadi. Yandi ke tuba nde: “Ntete, dibundu na beto vandaka ve ata ti mupasudi-nzila mosi. Kansi ntangu bampangi yai ya bakaka maplome na Gileadi kwisaka, kikesa na bo mpi mpeve na bo ya mbote sambukilaka bampangi ya nkaka, ebuna bampangi ya nkaka bakaka lukanu ya kukuma bapasudi-nzila. Na nima, mpangi-nkento mosi na dibundu na beto kotaka nkutu Nzo-Nkanda ya Bansamuni ya Kimfumu.”

 Sergio Panjaitan ke sadilaka Yehowa na Betele ya Asie du Sud-Est. Yandi ke sadilaka Yehowa ti bampangi yina bakaka maplome na Gileadi. Yandi ke tuba nde: “Formasio yina bo bakaka vandaka ve lusakumunu kaka sambu na bo mosi; yo me kuma mpi lusakumunu sambu na beto. Bo longukaka mambu mingi. Kansi na kisika ya kumonana bonso nde bo kele mfunu mingi kuluta bantu ya nkaka, bo ke songaka bampangi ya nkaka mambu yina bo longukaka. Diambu yai ke pesaka beto kikesa, beto mpi na ture na beto, beto ke pesaka bampangi ya nkaka kikesa.”

 Mbongo yina organizasio ke sadilaka sambu na mambu ya nzo-nkanda yai ke katukaka na wapi? Yo ke katukaka na makabu yina bampangi ke pesaka na ntoto ya mvimba. Bamingi ke pesaka makabu yango na nzila ya Internet. Bo ke sadilaka metode mosi na kati ya bametode yina kele na donate.dan124.com. Beto ke pesa beno mersi sambu na makabu yai ya beno ke pesaka na luzolo yonso mpi ya ke sadisaka bana ya nzo-nkanda yina ke kotaka nzo-nkanda yai ya ke bingisaka bampangi ya ntoto ya mvimba.