Mbendumuka na kati ya bigangwa ya kimpeve

Bigangwa yonso ya kimpeve yina Jéhovah gangaka vandaka mbote. Ebuna na nima wanzyo mosi kumaka imbi. Ikele Satana Diabulu. Satana zodilaka nde bantu yonso ya ntoto kusambila yandi, nde yandi kaka, kansi Jéhovah ve. Tala mambu ya kendimisa yau:

Na kilanga ya Edeni, banti vandaka mingi ya vandaka kubuta bambuma ya ntomo. Jéhovah tubaka na Adam mpi na nkento nandi, Eva, nde bau lendaka kudya bambuma yina mutindu bau zodila, kaka bambuma ya nti mosi bau lendaka kudya ve: kana bau kudya yau, bau fwete fwa.​—⁠Genese 2:9, 16, 17.

Kilumbu mosi ntangu Eva vandaka kaka yandi mosi, nyoka yantikaka na kutuba ti yandi. Kyeleka, kuvandaka mpenza nyoka ve vandaka kutuba; kuvandaka kibeni Satana Diabulu. Satana tubaka na Eva nde kana yandi kudya mbuma yina kupekisamaka yandi takuma mayele bonso Nzambi. Yandi tubilaka yandi dyaka nde yandi tafwa ve. Bangindu yina vandaka ya luvunu. Kansi, Eva kundimilaka Satana yempi kudyaka mbuma. Na nima, yandi pesaka yau n’Adam, yempi yandi kudyaka yau.​—⁠Genese 3:1-6.

Na lusadisu ya nkenda yai ya kyeleka, beto mezaba nde Satana kele mbenumuni mpi muntu ya luvunu. Yandi tubaka na Eva nde yandi tafwa ve kana yandi kukolama na Nzambi. Yau vandaka luvunu. Yandi fwãka kukonda ntembe, yempi Adam. Satana kufwãka ve na ntangu yina; kansi yau tavanda dyambu ya takumila yandi sambu yandi sumukaka. Kansi, sambu na mwa ntangu fyoti, yandi ke na kuzinga mpi kefula na kukusa bantu. Yandi ke muntu ya luvunu tii bubu yai, mpi yandi kemeka na kubenda bantu na kukulula minsiku ya Nzambi.​—⁠Yoane 8:⁠44.

 Banzyo yankaka mebendumuka

Na nima, banzyo yankaka kumaka imbi. Banzyo yina monaka, na ntoto, bankento ya kitoko, mpi bau zodilaka kusala bizumba ti bau. Bau kwisaka awa na ntoto mpi bau lwataka nitu ya bantu. Ebuna bau kudibakilaka bankento. Yau vandaka buna ve na lukanu ya Jéhovah.​—⁠Genese 6:1, 2; Yuda 6.

Kisalu na bau yina pesaka mpasi mingi na bantu. Bankento ya banzyo yina kubutaka bana, kansi bana ya imbi. Bau kumaka bantu ya nene ya ndá, mpi nkù. Ntoto fulukaka na mambu ya mubulu, na mpila nde Jéhovah kubakaka lukanu ya kufwa bantu yonso ya imbi na mvula ya ngolo. Bantu ya kugulukaka na masa ya mvula yina vandaka kaka Noa muntu ya lunungu ti dibuta nandi.​—⁠Genese 6:4, 11; 7:⁠23.

Na yau, banzyo ya imbi yina vutukaka na nsi ya kimpeve; bau kufwãka ve. Kansi bau bakaka ndola. Bau vutulamaka mpi ve na dibuta ya Nzambi, ya mesalama na banzyo ya kwikama. Dyaka, Jéhovah pesaka bau nzila dyaka ve ya kuvutukila nitu na bau yina ya kinsuni. Nsuka na bau ke lufwa na ntangu ya mfundusu ya nene.​—⁠2 Petelo 2:4; Yuda 6.

 Satana mekulama na zulu

Na luyantiku ya mvunkama yai, mvita salamaka na zulu. Na Bible, mukanda ya Nzayikusu ketendula yau mpidyai: “Mvita vandaka na zulu: Mikaele [Yezu ya mefutumuka] mpi banzyo nandi [ya mbote] nwanaka na Dalaka [Satana], mpi Dalaka ti banzyo nandi [ya imbi] nwanaka mpi, kansi bau nungaka ve, yempi sika monanaka dyaka ve na zulu sambu na bau. Dalaka ya nene losamaka na nsi, yandi ke nyoka ya nkulu, ya bingama Diabulu mpi Satana, yandi ke mukusi ya bantu yonso na nsi; yandi losamaka na ntoto, ye banzyo nandi sika mosi ti yandi.”

Ebuna inki dyambu kumonanaka? Tala ndandana ya nkenda yango: “Yau yina, yangalala, o mazulu, ye beno bantu ya ikele na yau!” Banzyo ya mbote fwanaka yangalala mutindu Satana na banzyo nandi ya imbi, to bampeve ya imbi, vandaka na zulu dyaka ve. A ebwe sambu na bantu awa na ntoto? “Mawa na ntoto mpi na mbu, mutindu Bible ketuba, sambu Diabulu mekulumuka na beno, yandi ke na makasi mingi, sambu yandi zaba nde ntangu nandi mebika fyoti.”​—⁠Nzayikusu 12:7-9, 12.

Na yau, Satana kumosi na banduku nandi yina ya imbi kebebisa bantu na ntoto mpi kepesa bau mpasi mingi. Banzyo yina ya imbi mebingama bampeve ya imbi. Bau ke bambeni ya Nzambi. Bau yonso kesalaka bantu imbi.

[Kifwanisu ya kele na lutiti 8]

Ntangu Satana sadilaka nyoka sambu na kutuba na Eva, yandi landaka yandi na mbendumuka nandi na Nzambi

[Kifwanisu ya kele na lutiti 9]

Banzyo ya imbi kwisaka na ntoto sambu na kusala masoni ya bizumba ti bankento

[Kifwanisu ya kele na lutiti 10]

Satana kumosi na banzyo nandi ya imbi kulamaka na zulu