KAPU 6

Longi ya Nene Kusadilaka Bantu Yankaka

KETI nge kesepelaka na ntangu bantu kesadilaka nge mambu ya mbote?— Bantu mingi mpi kesepelaka kana muntu yankaka mesadila bo kima mosi ya mbote. Beto yonso kesepelaka kana muntu mesadila beto kima ya mbote. Longi ya Nene kuzabaka dyambu yai, mpi yandi vandaka ntangu yonso kusadila bantu mambu mingi. Yandi tubaka nde: ‘Munu kwisaka ve sambu bantu kusadila munu, kansi sambu na kusadila bantu.’—Matayo 20:28.

Yo yina, inki beto fwe sala kana beto kezola kuvanda bonso Longi ya Nene?— Beto fwe sadilaka bantu yankaka. Beto fwe sadilaka bo mambu ya mbote. Yo ke ya kyeleka nde bantu mingi kesalaka yo ve. Na kutuba ya mbote, bantu mingi kezolaka kaka nde bankaka kusadila bo. Nkutu, balongoki ya Yezu vandaka kuyindula ntete mpidina. Konso muntu vandaka kuzola nde yandi luta bankaka na nene.

Kilumbu mosi, Yezu vandaka na nzyetolo ti balongoki na yandi, yina vandaka kutambula ti yandi. Na nima ya kukota na bwala Kapernaumi, penepene ti Nzadi ya Galilea, bo yonso kukotaka na kati ya nzo mosi. Kuna Yezu kuyulaka bo nde: “Sambu na nki beno vandaka kwenda kutula ntembe na nzila?” Bo vandaka kaka pima, sambu na nzila bo vandaka kuditudila ntembe sambu na kuzaba kana nani kulutaka bankaka na nene.—Marko 9:33, 34.

 Yezu kuzabaka nde yo vandaka mbote ve nde longoki mosi na kati ya balongoki na yandi kuyindula nde yandi meluta bankaka na nene. Yo yina, mutindu beto longukaka na kapu ya ntete ya mukanda yai, yandi tedimisaka mwana mosi ya fyoti na ntwala na bo mpi yandi tubilaka bo nde bo fwe kudikulumusaka bonso mwana yina ya fyoti. Kansi, bo bakisaka kaka ve ata kima mosi. Yo yina, bilumbu fyoti na ntwala ya lufwa na yandi, Yezu kulongaka bo dilongi mosi ya bo zolaka kuvila ve ata fyoti. Inki yandi salaka?—

Ntangu bo yonso vandaka kumosi sambu na kudya, Yezu kutelamaka mpi yandi katulaka bamvwela na yandi ya zulu. Yandi bakaka sume, yandi lwataka yo na luketo na yandi. Na nima, yandi bakaka dilonga mosi ya kuyobidila mpi yandi tulaka masa na kati. Ntembe kele ve nde balongoki na yandi kudiyulaka nde nki dyaka yandi zolaka kusala. Ntangu bo vandaka kutala yandi, Yezu kupusanaka na kisika yina bo yonso kuvandaka, yandi nyekaka mpi yandi yobisaka bo makulu. Na nima, yandi katulaka bo masa na makulu ti sume yina. Yindula ntete! Inki nge zolaka kusala kana nge vandaka pana? Inki mutindu nge zolaka kudiwa?—

Balongoki na yandi kumonaka mbote ve nde Longi ya Nene kusadila bo na mutindu yina. Bo waka nsoni. Nkutu, Piere kuzolaka ve nde Yezu kusadila yandi kisalu ya kudikulumusa ya mutindu yina. Kansi Yezu kutubaka nde yo vandaka mfunu nde yandi kusala yo.

Bubu yai, beto kevandaka ve ti kikalulu ya kuyobisa bampangi na beto makulu. Kansi, bantu vandaka kusala yo na ntangu Yezu kuvandaka na ntoto. Keti nge kezaba sambu na inki?— Na insi yina Yezu mpi balongoki na yandi vandaka kuzinga, bantu vandaka kulwata basandale yina vandaka kufika ve bitini yonso ya makulu mpi bo vandaka kulwata ve basoseti. Yo yina, ntangu bo vandaka kutambula na banzila ya ntoto, pusiere vandaka kukumisa makulu na bo mvindu. Sambu na kusonga ntima na yandi ya mbote, muntu yina meyamba munzenza vandaka kuyobisa nzenza na yandi makulu sambu na kukatula yandi pusiere.

Kansi kilumbu yina, ata longoki ya Yezu mosi ve sosaka na kuyobisa makulu ya bankaka. Yo yina Yezu kusalaka yo yandi mosi. Na ntangu yandi salaka mpidina, Yezu kulongaka balongoki na yandi dilongi mosi ya  mfunu. Bo vandaka na mfunu ya kulonguka dilongi yina. Yo ke dilongi mosi ya beto mpi fwe longuka bubu yai.

Keti nge mezaba dilongi yango?— Ntangu Yezu lwataka lele na yandi ya zulu imene mpi yandi vandaka dyaka na mesa, yandi tendulaka nde: “Keti beno ke bakisa mambu yai ya mono me sala beno? Beno ke bingaka mono ‘Longi’ ti ‘Mfumu’; beno ke tubaka mbote, sambu ya kieleka mono kele Longi ti Mfumu. Kana mono muntu kele Mfumu ti Longi, mono me yobisa beno makulu, beno na kati na beno, beno mpi fweti yobisa makulu beno na beno.”—Yoane 13:2-14.

Awa Longi ya Nene kumonisaka nde yandi zolaka nde balongoki na yandi kusadisana. Yandi zolaka ve nde bo kudiyindula kaka na bo mosi. Yandi zolaka ve nde bo yindula nde bo vandaka mfunu mingi mpi nde bankaka fwe sadilaka bo ntangu yonso. Yandi zolaka nde bo vanda na luzolo ya kusadila bankaka.

Keti yo vandaka ve dilongi mosi ya mbote?— Keti nge tavanda bonso Longi ya Nene mpi nge tasadilaka bantu yankaka?— Beto yonso le sala mambu sambu na bankaka. Yo tapesa bo kyese. Kansi kuluta dyaka, yo tapesa kyese na Yezu mpi na Tata na yandi.

Yo ke mpasi ve na kusadila bantu yankaka. Kana nge sosa, nge tamona mambu mingi yina nge le sala sambu na bankaka. Yindula fyoti ntangu  yai: Keti ke ti kima ya nge le sala sambu na kusadisa mama na nge? Nge mezaba nde yandi kesalaka mambu mingi sambu na nge mpi sambu na bantu yankaka na dibuta. Keti nge le sadisa yandi?— Sambu na nki nge yula yandi ve?

Mosi na kati ya bima ya nge le sala kele kuyidika mesa na ntwala nde dibuta kudya. To mbala yankaka, kana dibuta memanisa kudya nge le katula malonga ya mvindu na mesa mpi kudipa mesa. Bana yankaka kekwendaka kulosa mvindu na fulu konso kilumbu. Ata konso nki kima ya nge le sala, yo tavanda kusadila bankaka, mutindu Yezu kusalaka.

Keti nge ke ti baleke ya babakala mpi ya bankento yina nge le sadila? Yibuka nde Yezu, Longi ya Nene, kusadilaka nkutu balongoki na yandi. Nge talanda mbandu ya Yezu kana nge kesadila baleke na nge ya babakala ti ya bankento. Inki nge le sala sambu na bo?— Ziku nge le sadisa bo na kubakisa nde kana bo sakana imene, bo fwe vutulaka bima na bo ya kusekinina na bisika yina yo kevandaka.  To mbala yankaka nge le sadisa bo na kulwatisaka bo bilele. To mbala yankaka nge le sadisa bo na kubongisa mbeto na bo. Keti nge le yindula bima yankaka ya nge le sadila bo?— Kana nge kesadila bo mambu yina, bo tazolaka nge mutindu balongoki ya Yezu kuzolaka yandi.

Na nzo-nkanda mpi nge le sadila bantu yankaka. Yo le vanda banduku na nge ya nzo-nkanda to longi na nge. Kana muntu mebwisa mikanda na yandi, yo tavanda mbote nde nge lokutila yandi yo. Nge le lomba nswa nde nge kezola kufwanza tablo to kusala kima yankaka sambu na longi na nge. Ata kusimbila muntu kyelo na ntangu yandi keluta kevandaka dyambu mosi ya mbote.

Bantangu yankaka, beto tamona nde bantu tapesa beto ve mersi sambu na mambote ya beto tasadila bo. Keti nge keyindula nde yo fwe pusa nge na kuyambula kusala mambote?— Ve! Bantu mingi kupesaka ve Yezu mersi sambu na bisalu ya mbote ya yandi sadilaka bo. Kansi yo pusaka yandi ve na kuyambula kusala mambote.

Yo yina, beto le vutuka ve nima ata fyoti sambu na kusadila bantu yankaka. Beto fwe yibukaka Yezu, Longi ya Nene, mpi beto fwe salaka ntangu yonso kikesa sambu na kulanda mbandu na yandi.

Sambu na baverse yankaka ya ketubila kusadisa bantu yankaka, tanga Bingana 3:27, 28; Roma 15:1, 2; mpi Galatia 6:2.

[Kifwanisu ya kele na lutiti 37]

Na nki mambu balongoki ya Yezu vandaka kutula ntembe?

[Kifwanisu ya kele na lutiti 39]

Inki dilongi Yezu vandaka kulonga balongoki na yandi?

[Bifwanisu ya kele na lutiti 40, 41]

Inki nge le sala sambu na kusadisa bankaka?