KAPU 22

Sambu na Nki Beto Fwete Kusaka Ve

YINDULA ntete kana mwana-nkento mosi kusonga mama na yandi nde: “Kana beto mebasika na nzo-nkanda mu takwisa mbala mosi na nzo.” Kansi na nima yandi bikala kwa yandi na nzo-nkanda sambu na kusekana ti banduku na yandi ebuna na nima yandi kwisa kusonga mama na yandi nde: “Ntangu beto basikaka na nzo-nkanda, longi na munu kutubilaka munu nde mu bikala.” Keti yo tavanda mbote na kutuba mambu ya mutindu yina?—

To yindula ntete kana mwana-bakala mosi kutubila tata na yandi nde: “Mu bulaka ve balo na kati ya nzo.” Kansi, inki nge keyindula kana na kuta masonga yandi bulaka yo? Keti yo tavanda mbi kana yandi kutuba nde yandi bulaka yo ve?—

Longi ya Nene kusongaka beto dyambu ya mbote ya beto fwe sala. Yandi tubaka nde: ‘Kana nge metuba nde: Ee bika kaka yo vanda Ee, kana nge metuba nde Ve, bika yo vanda kaka Ve, sambu mambu yina ya nkaka ya nge lenda tuba, yo ke katukaka na Muntu ya Mbi.’ (Matayo 5:37) Inki Yezu zolaka kutuba na ntangu yandi tubaka mpidina?—  Yandi zolaka kutuba nde beto fwe salaka mambu yina ya beto ketubaka.

Kele ti disolo mosi na Biblia ya kesonga nde kuta masonga ke mfunu mingi mpenza. Disolo yango ke ya bantu zole yina vandaka kutuba nde bo vandaka balongoki ya Yezu. Beto tala mutindu yo lutaka.

Kiteso ya bangonda zole na nima ya lufwa ya Yezu, bantu mingi ya kukatukaka na bisika ya ntama kwisaka na Yeruzalemi sambu na kuta fete mosi ya mfunu ya Bayuda yina bo vandaka kubinga nde nkinsi ya Pantekoti. Ntumwa Piere kusalaka diskure mosi ya kitoko. Na kati ya diskure yango, yandi tubilaka bantu mambu ya metala Yezu yina Nzambi kutedimisaka na lufwa. Sambu na bantu mingi yina kukwisaka na Yeruzalemi, yo vandaka mbala na bo ya ntete ya bo waka mambu yina metala Yezu. Yo yina bo zolaka kuzaba mambu mingi dyaka. Ebuna, inki bo salaka?

Bo bikalaka kuna ntangu mingi kuluta yina bo kanaka. Kansi na nima ya mwa ntangu, bantu mingi na kati na bo kuvandaka dyaka ve ti mbongo mpi bo vandaka na mfunu ya lusadisu sambu na kusumba madya. Balongoki yina kuvandaka na Yeruzalemi kundimaka na kusadisa banzenza yango. Yo yina, mingi na kati na bo kutekaka bima ya bo vandaka na yo mpi bo nataka mbongo na bantumwa ya Yezu. Ebuna bantumwa  vandaka kupesa mbongo yango na bayina kuvandaka na mfunu na yo.

Ananiasi ti nkento na yandi Safira, yina kuvandaka bamambre ya dibundu ya Bukristu na Yeruzalemi, kutekaka kilanga na bo mosi. Ata muntu mosi ve kulombaka bo na kuteka yo. Bo bakaka desizio yango bo mosi. Kansi bo salaka yo ve sambu na kusonga zola na bo na balongoki ya Yezu yina ya mpa. Ananiasi ti Safira kuzolaka nde bantu kumona nde bo vandaka bantu ya mbote kansi na kuta masonga bo vandaka bantu ya mbi. Bo bakaka lukanu ya kutuba nde bo tapesa mbongo yonso sambu na kusadisa bankaka. Bo tubaka nde bo tapesa mbongo yonso, kansi bo pesaka kaka ndambu. Inki mpila nge kemona dikambu yai?—

Ananiasi kwendaka kutala bantumwa. Yandi pesaka bo mbongo. Ya kyeleka, Nzambi kuzabaka nde yandi pesaka ve mbongo yonso. Yo yina Nzambi kumonisaka ntumwa Piere nde Ananiasi kutaka ve masonga na dikambu yango.

Ebuna Piere kutubaka nde: ‘Ananiasi, sambu na nki nge mebika nde Satana kupusa nge na kusala dikambu yai? Kilanga kuvandaka ya nge. Muntu kutubilaka nge ve nde nge teka yo. Mpi ata na nima ya kuteka yo, nge zolaka kusadila mbongo yina mutindu nge kanaka na ntima na nge. Kansi sambu na nki nge ketuba nde nge mepesa mbongo yonso kansi nge mepesa kaka ndambu? Zaba nde nge kekusa, kaka beto ve, kansi Nzambi.’

Yo vandaka dikambu ya nene mpenza. Ananiasi kukusaka! Yandi salaka ve mambu ya yandi tubaka nde yandi tasala. Yandi kusaka kaka nde  yandi tasala yo. Biblia ketubila beto mambu yina kusalamaka na nima. Yo ketuba nde: ‘Ntangu yandi waka mambu yina Piere kutubaka, Ananiasi kubwaka mpi yandi fwaka.’ Nzambi kufwaka Ananiasi! Na nima, bo nataka nitu na yandi na nganda mpi bo zikaka yandi.

Kiteso ya bangunga tatu na nima, Safira kwendaka kukota. Yandi zabaka ve mambu yina kukuminaka bakala na yandi. Ebuna Piere kuyulaka yandi nde: ‘Keti beno zole tekaka kilanga na ntalu ya mbongo yai beno mepesa beto?’

Safira nde: ‘Ee, beto tekaka kilanga yango kaka na ntalu yina.’ Kansi yandi taka luvunu! Bo bumbaka ndambu ya mbongo yina bo zwaka ntangu bo tekaka kilanga. Yo yina, Nzambi kufwaka mpi Safira.—Bisalu 5:1-11.

Inki dilongi beto fwe baka na mambu yina kukuminaka Ananiasi ti Safira?— Yo kelonga beto nde Nzambi kezolaka ve bantu ya luvunu. Yandi kezolaka nde beto ta masonga ntangu yonso. Kansi bantu mingi ketubaka nde kukusa kele mbi ve. Keti nge keyindula nde bantu yina ketubaka kyeleka?— Keti nge mezaba nde kima menataka bamaladi yonso, bampasi, mpi lufwa na ntoto kele luvunu?—

Yibuka nde Dyabulu kukusaka nkento ya ntete, Eva. Dyabulu kutubilaka yandi nde yandi tafwa ve kana yandi kolama na Nzambi mpi kana yandi dya mbuma yina Nzambi kutubaka nde yandi fwete dya yo ve. Eva kukwikilaka Dyabulu mpi yandi dyaka mbuma. Yandi ndimisaka mpi Adami na kudya yo. Ntangu bo dyaka yo, bo kumaka bantu ya masumu, mpi bana na bo yonso kumaka kubutuka ti masumu. Mpi sambu bo vandaka bantu ya masumu, bana yonso ya Adami kumonaka mpasi mpi kufwaka. Inki kunataka bampasi yina yonso?— Luvunu.

Mpila ya kuyituka kele ve kana Yezu kutubaka nde Dyabulu “kele muntu ya luvunu mpi tata ya luvunu”! Yandi vandaka muntu ya ntete yina kutaka luvunu. Ntangu muntu ketubaka luvunu, yandi kesalaka  mambu yina Dyabulu kusalaka ntete. Beto fwete yibukaka dyambu yai kana beto kewa mpusa ya kuta luvunu.—Yoane 8:44.

Inki ntangu nge le wa mpusa ya kukusa?— Keti mpusa yango kekwisaka ve na ntangu ya nge kezabaka nde nge mesala mambu ya mbi?— Nge le pasula kima mosi na kidiba. Kana bo yula nge, keti nge tatuba nde mpangi na nge ya nkento to ya bakala muntu mepasula yo? To keti nge takusa nde nge mezaba ve nki mutindu yo pasukaka?—

Inki nge tasala kana yo lombaka nde nge sala badevware na nge ya nzo-nkanda, kansi nge memanisa ve na kusala yo? Keti nge tatuba nde nge salaka yo yonso, ata nge mezaba nde nge salaka yo ve yonso?— Beto fwe yibuka Ananiasi ti Safira. Bo tubaka ve kyeleka yonso. Mpi Nzambi kufwaka bo sambu na kumonisa nde kukusa kuvandaka mbi mpenza.

Yo yina ata beto mesala konso nki kima yina, kuta luvunu sambu na kima yango takumisa kaka makambu mbi kuluta, mpi beto fwete tubaka nkutu ve kaka ndambu ya kyeleka. Biblia ketuba nde: ‘Tubila mpangi kyeleka.’ Yo ketuba dyaka nde: “Beno tubana mambu ya luvunu ve.” Yehowa ketubaka kyeleka ntangu yonso mpi yandi kekinga nde beto mpi kusala mpidina.—Efezo 4:25; Kolosai 3:9.

Beto fwe tubaka kyeleka ntangu yonso. Yo yina mambu ya Biblia ketuba na Kubasika 20:16; Bingana 6:16-19; 12:19; 14:5; 16:6; mpi Baebreo 4:13.

[Kifwanisu ya kele na lutiti 117]

Inki dyambu ya mbi mwana-bakala yai mesala?

[Kifwanisu ya kele na lutiti 118]

Inki luvunu Ananiasi ke na kutuba na Piere?

[Kifwanisu ya kele na lutiti 119]

Inki mekumina Ananiasi sambu yandi kusaka?

[Kifwanisu ya kele na lutiti 120]

Yezu kutubaka nde nani muntu kutubaka luvunu ya ntete, mpi nki mbuma yo butaka?

[Kifwanisu ya kele na lutiti 121]

Inki ntangu nge le wa mpusa ya kukusa?