KAPU 10

Yezu Meluta Bademo na Ngolo

KETI nge keyibuka sambu na nki wanzyo mosi ya Nzambi kukumaka Satana Dyabulu?— Kima kupusaka yandi na kukuma mbeni ya Nzambi kele mpusa na yandi ya bwimi ya kusosa nde bantu kusambila yandi. Keti bawanzyo yankaka kulandaka Satana?— Ee, bo landaka yandi. Biblia kebinga bo ‘bawanzyo ya Satana,’ to bademo.—Kusonga 12:9.

Keti bawanzyo yai ya mbi, to bademo, kekwikilaka na Nzambi?— Biblia ketuba nde: ‘bademo kekwikilaka nde Nzambi kele.’ (Yakobo 2:19, NW) Kansi na ntangu yai, bo kewaka boma. Bo kewaka boma sambu bo mezaba nde Nzambi tapesa bo ndola sambu na mambu ya mbi ya bo mesalaka. Inki mambu ya mbi bo mesalaka?—

Biblia ketuba nde bawanzyo yango kubikaka kisika na bo mosi na zulu mpi bo kwisaka kuzinga na ntoto bonso bantu. Bo salaka mutindu yina sambu bo zolaka kuvukisa nitu ti bana-bankento ya kitoko na ntoto. (Kuyantika 6:1, 2; Yude 6) Inki mutindu nge le tendula kuvukisa nitu?—

Kuvukisa nitu kele kuvukisa binama ya kusubila ya nkento  ti ya bakala. Na nima, mwana kesalamaka na divumu ya mama. Kansi kuvukisa nitu kele mbi sambu na bawanzyo. Nzambi mepesaka nswa ya kuvukisa nitu kaka na bakala ti nkento yina mekwelaka. Ebuna kana bo buta mwana, bakala ti nkento na yandi kusansa mwana yango.

Ntangu bawanzyo lwataka banitu ya bantu mpi kuvukisaka nitu ti bankento na ntoto, bana na bo kukumaka bantu ya nene-nene ti ya nda-nda na ntangu bo yelaka. Bo vandaka bantu ya nku mpenza, mpi bo vandaka kunyokula bantu. Yo yina Nzambi kunokisaka mvula mosi ya ngolo sambu na kufwa bantu yina ya nene-nene ti ya nda-nda mpi bantu yonso ya mbi. Kansi yandi songaka Noa nde tunga maswa ya nene, sambu na kugulusa ndambu ya bantu yina vandaka kusala mambu ya mbote. Longi ya Nene kutubaka nde yo kele mfunu na kuyibuka mambu yina kusalamaka na ntangu Mvula ya ngolo kunokaka.—Kuyantika 6:3, 4, 13, 14; Luka 17:26, 27.

Ntangu Mvula ya ngolo kwisaka, keti nge kezaba mambu yina kukuminaka bawanzyo ya mbi?— Bo yambulaka kusadila banitu ya bantu yina bo lwataka, mpi bo vutukaka na zulu. Kansi, bo lendaka dyaka ve kuvanda bawanzyo ya Nzambi, yo yina bo kumaka bawanzyo ya Satana, to bademo. Ebuna nki kuminaka bana na bo, bantu ya  nene-nene ti ya nda-nda?— Bo fwaka na Mvula ya ngolo nzila mosi ti bantu yonso yina vandaka kulemfukila ve Nzambi.

Banda na ntangu ya Mvula ya ngolo, Nzambi kepesaka dyaka ve bademo nzila ya kukuma bonso bantu. Kansi ata beto le mona bo ve, bademo kesosaka kaka na kupusa bantu na kusala mambu ya mbi mpenza. Bo ke na kukotisa mavwanga mingi kibeni kuluta yina bo vandaka kusala ntete. Bo kesalaka mpidina sambu bo melosaka bo na ntoto.

Keti nge mezaba sambu na nki beto le mona ve bademo?— Sambu bo kemonanaka ve. Kansi beto mezaba nde bo ke na luzingu. Biblia ketuba nde Satana “ke kusaka bantu yonso,” ebuna bademo na yandi kesadisaka yandi.—Kusonga 12:9, 12.

Keti Dyabulu ti bademo na yandi le kusa beto mpi?— Ee, bo le kusa beto kana beto kekeba ve. Kansi beto fwe wa ve boma. Longi ya Nene kutubaka nde: ‘Dyabulu le sala munu kima ve.’ Kana beto kangama ngolo na Nzambi, yandi tatanina beto sambu Dyabulu ti bademo na yandi kusala beto ve mbi.—Yoane 14:30.

Yo ke mfunu nde beto zaba mambu ya mbi yina bademo tasosa kupusa beto nde beto sala. Yo yina, nge fwe yindula dyambu yai. Inki mambu ya mbi bademo kusalaka ntangu bo kwisaka na ntoto?— Na ntwala ya Mvula ya ngolo, bo vukisaka nitu ti bankento. Bo salaka kima mosi ya kuvandaka ve mbote sambu na bawanzyo. Bubu yai, bademo kesepelaka ntangu bantu kelemfukaka ve na nsiku ya Nzambi yina metala kuvukisa nitu. Bika mu yula nge ngyufula mosi, Banani kaka kele ti nswa ya kuvukisa nitu?— Mvutu na nge ke ya kyeleka, kaka bantu yina mekwelaka.

Bubu yai, baleke mingi ya babakala ti ya bankento kevukisaka nitu, kansi yo ke mbi sambu na bo. Biblia ketubilaka “kibakala,” to mbia. (Levi 15:1-3) Bantu kebingaka kinama ya kusubila ya nkento nde mbunda. Yehowa kusalaka binama yai ya nitu sambu na lukanu mosi ya nene, yina bankwelani mpamba bantu kele na nswa ya kusepila na yo. Bademo kevandaka na kyese ntangu bantu kesalaka mambu yina Yehowa mebuyisaka. Mu mbandu, bademo kevandaka na kyese ntangu mwana-bakala kesakanaka ti mbunda ya mwana ya nkento to ntangu  mwana-nkento kesakanaka ti mbia ya mwana-bakala. Ya kyeleka, beto kezola ve kusepedisa bademo, mpidina ve?—

Kele ti kima yankaka ya bademo kezolaka kansi ya Yehowa kezolaka ve ata fyoti. Keti nge mezaba kima yango?— Nku. (Nkunga 11:5) Kana muntu ke ngolo mpi yandi kebula bantu yankaka, pana beto tatuba nde yandi ke nku. Kuvila ve nde yo yina mambu ya bantu yina ya nene-nene ti ya nda-nda, bana ya bademo, vandaka kusala.

Bademo kezolaka mpi kupesa bantu boma. Bantangu yankaka, bo kekusaka nde bo ke bantu yina mefwaka. Bo kebakaka nkutu bandinga ya bantu yina mefwaka sambu na kutuba bonso bo. Na ntangu bo kesalaka mutindu yina, bademo kekusaka bantu mingi na kukwikila nde bantu yina mefwaka kevandaka na luzingu mpi nde bo le tuba ti bayina kezinga. Ya kyeleka, bademo kepusaka bantu mingi na kukwikila nde bamvumbi kezingaka.

Yo yina, beto fwe kebaka sambu Satana ti bademo na yandi kukusa beto ve. Biblia kekebisa nde: ‘Satana kesosaka kumonisa nde yandi ke wanzyo ya mbote, bansadi na yandi mpi  kesalaka mutindu mosi.’ (2 Korinto 11:14, 15) Kansi, na kuta masonga, bademo kele bantu ya mbi. Beto tala nki mutindu bo le sosa na kupusa beto nde beto vanda bonso bo.

Na nki kisika bantu kelongukaka mambu mingi ya metala nku, kuvukisa nitu na mutindu ya mbi, bampeve mpi bamvumbi ya kezingaka?— Keti bo kelongukaka yo ve na ntangu ya bo ketalaka bansaka mpi bafilme yankaka ya kelutaka na Televizio, na ordinatere ti na video, na Internet, mpi na ntangu ya bo ketangaka mikanda ya bansaka? Keti kusala mambu yai kesalaka nde beto kuvanda penepene na Nzambi to penepene na Dyabulu ti bademo na yandi? Inki nge keyindula?—

Nge keyindula nde nani kezolaka nde beto wa mpi beto tala mambu ya mbi?— Satana ti bademo na yandi bantu kezolaka mpidina. Yo yina, inki mambu nge ti munu fwe sala?— Beto fwe tangaka, kuwaka, mpi kutalaka mambu yina ke ya mbote sambu na beto mpi yina ya tasadisa beto na kusadila Yehowa. Keti nge le yindula mwa mambu yango ya mbote ya beto le sala?—

Kana beto kesala mambu ya mbote, mfunu ya kuwa bademo boma tavanda ve. Yezu meluta bo na ngolo, mpi bo kewaka yandi boma. Kilumbu mosi, bademo kutubilaka Yezu na ndinga ya ngolo nde: “Nge me kwisa sambu na kufwa beto?” (Marko 1:24) Keti beto tavanda ve na kyese ntangu kilumbu ya Yezu tafwa Satana ti bademo na yandi talunga?— Na ntangu beto kekinga nde mambu yina kusalama, beto ketula ntima nde Yezu tatanina beto na bademo kana beto kelanda kaka na kuvanda penepene na yandi ti Tata na yandi ya zulu.

Bika beto tanga ntangu yai mambu ya beto fwe sala na 1 Piere 5:8, 9; mpi Yakobo 4:7, 8.

[Kifwanisu ya kele na lutiti 57]

Inki mambu ya mbi bawanzyo yai kusalaka?

[Kifwanisu ya kele na lutiti 58]

Sambu na nki mpasi ke mingi bubu yai na ntoto kuluta na ntangu ya ntama?

[Bifwanisu ya kele na lutiti 60]

Inki le salama kana beto ketala mambu ya nku?

[Kifwanisu ya kele na lutiti 61]

Inki mambu beto fwe sala yina tanatila beto mambote?