Kitini ya 3

Bandongisila ya Mayele ya Ketomisaka Luzingu

YINDULA nde munganga mosi ya mpa mekwisa na bwala na beno. Na luyantiku, nge lenda yindula nde yandi kele ve munganga ya mbote. Kansi inki nge tasala kana banduku na nge mekwenda kusosa yandi sambu na kusansa bo mpi na nima, mavimpi na bo metoma kibeni? Keti nge mpi takwenda ve kusosa yandi sambu na kubaka lusansu?

Na mutindu mosi buna, Masonuku ya Santu kele bonso munganga yina. Bantu yankaka kevandaka na ketiketi ya kutanga yo. Kansi ntangu bo kesadilaka bandongisila na yo ya mayele, luzingu na bo ketomaka kibeni. Beto tadila mwa bambandu.

Kuyidika Makambu na Makwela

Sumiatun keyibuka nde: “Na luyantiku ya makwela na beto, mu vandaka kumona nde bakala na mono Dumas vandaka kutudila mono ve dikebi. Mbala mingi, kana mu mewa makasi, mu vandaka kunganina yandi, kulosila yandi bima, ata nkutu kubula yandi. Bantangu yankaka, mu vandaka kudiyangisa ngolo tii na kiteso ya kubwa mpi kudizaba dyaka ve.

“Ntangu Dumas yantikaka kulonguka Masonuku ya Santu, mono vandaka kuseka yandi. Kansi, mono vandaka kuwidikila na kinsweki na suku yankaka mambu yina yandi vandaka kulonguka. Kilumbu mosi, mono waka lutangu ya verse yai: ‘Beno bankento, beno lemfuka na babakala na beno, mutindu beno ke lemfukaka na Mfumu . . . Konso nkento fweti zitisa bakala na yandi.’ (Efezo 5:​22, 33) Bangogo yai simbaka ntima na mono. Mono sambaka Nzambi na kulolula mono mutindu mono kenyokulaka bakala na mono, mpi mono lombaka yandi na kusadisa mono na kukuma nkento mosi ya mbote. Ntangu fyoti na nima, beto zole kumaka kulonguka Masonuku kumosi.”

Masonuku ya Santu ketuba dyaka nde: “Babakala mpi fweti zola bankento na bo, mutindu bo ke zolaka nitu na bo mosi.” (Efezo 5:28) Sumiatun ketuba nde: “Kulonguka mambu yai sobaka luzingu na beto zole. Mu yantikaka kunatila Dumas dikopa ya te ntangu yandi vandaka kuvutuka na nzo na nima ya kisalu, mpi kusolula ti yandi na mutindu mosi ya mbote. Dumas mpi yantikaka kuzola mono mingi mpi kusadisa mono na bisalu ya nzo. Beto zole salaka bikesa sambu na ‘kuvanda bantu ya mbote, kuwilana mawa, mpi kulolulana’ na luzolo yonso. (Efezo 4:32) Na nima, zola mpi luzitu yina vandaka na kati na beto vandaka kulanda kaka na kuyela. Ntangu yai beto kele na makwela ya kyese mpenza, kiteso ya bamvula 40. Bandongisila ya mayele yina kele na Ndinga ya Nzambi kugulusaka makwela na beto!”

Kuyala Makasi

Tayib ketuba nde: “Mono vandaka muntu mosi ya mubulu. Mono vandaka kunwana mingi mpi mbala na mbala mono vandaka kusadila munduki sambu na kupesa bantu boma. Dyaka, mono vandaka kubula Kustriyah, nkento na mono, mpi kubwisa yandi na ntoto  ntangu mono vandaka na makasi. Bantu mingi vandaka kuwa mu boma.

“Kilumbu mosi mono tangaka bangogo yai ya Yezu: ‘Mono kepesa beno nsiku mosi ya mpa: Beno zolana beno na beno. Mutindu mono ke zolaka beno.’ (John 13:34) Yo simbaka mpenza ntima na mono, mpi mono bakaka lukanu ya kusoba mambu. Ntangu makasi vandaka kukwisila mono, mono vandaka kusamba Nzambi sambu yandi sadisa mono na kubikala pima. Kukonda kusukinina, makasi na mono vandaka kukita. Mono mpi nkento na mono sadilaka ndongisila yai ya kele na Efezo 4:26, 27: ‘Beno vanda na makasi ve kilumbu ya mvimba. Beno pesa ve Satana nzila ya kuyala beno.’ Beto vandaka kutanga Masonuku mpi kusamba kumosi konso nkokila. Kusala mutindu yai manisaka bampasi yina kebasikaka konso kilumbu mpi kukumisaka ngolo bangwisana na beto.

“Bubu yai, mono mezabanaka bonso bakala mosi ya ngemba. Nkento mpi bana na mono kezolaka mono mpi kezitisaka mono. Mu mekumaka na banduku mingi, mpi mono kekudiwaka penepene ya Nzambi. Mono kele mpenza muntu ya kyese.”

Kuyambula Kunwa Bima Yina Kelausaka

Goin ketuba nde: “Mono vandaka na kimvuka ya batoko mosi ya mubulu, mono vandaka kunwa makaya ngolo, mpi mbala mingi mono vandaka kulala na nganda, mpi kulauka ngolo mpenza. Dyaka, mono vandaka kunwa mpi kuteka bima yina kelausaka​—marijuana mpi ecstasy​—yina mono vandaka kubumba na nsi ya kazaka na mono yina kelutisaka ve masasi (gilets pare-balles). Ata mono vandaka kumonana bonso muntu mosi ya nku mpi kusala mambu yina, mono vandaka kuzinga ntangu yonso na boma.

“Na nima, muntu mosi songaka mono verse yai: ‘Mwana na mono, kuvila ve mambu ya mono ke longa nge. . . . Malongi na mono ta pesa nge luzingu ya mbote ti ya nda.’ (Bingana 3:1, 2) Mono vandaka mpenza na mpusa ya luzingu mosi ya nda mpi ya ngemba! Mono tangaka mpi mambu yai: ‘Banduku na mono ya mono ke zolaka, Nzambi silaka mambu yina yonso sambu na beto. Yo yina beto fweti katula mambu yina yonso ke nataka mbi  na nitu na beto ti na ntima na beto, beto fweti tula ngolo na kuvanda mpenza bantu ya Nzambi, beto fweti zitisa Nzambi.’ (2 Korinto 7:1) Yo yina kukonda kusukinina, mono yambulaka bima yina kelausaka, kinduku ti batoko yina ya mubulu, mpi mono yantikaka kusadila Nzambi.

“Kiteso ya bamvula 17 meluta banda mono meyambulaka bima yina kelausaka. Mono kele na mavimpi ya mbote, dibuta ya kyese, banduku ya mbote, mpi kansansa ya bunkete. Dyaka, na kisika ya kulala na nganda na nima ya kulauka, mono mekumaka kulala na mbeto konso mpimpa na ngemba yonso.”

Kuyambula Kumenga Bantu ya Makanda Yankaka

Bambang ketuba nde: “Ntangu mono vandaka toko mono vandaka muntu mosi ya nku, mpi bantu mingi yina mono vandaka kusala mbi, vandaka bantu ya mwa dikanda mosi yina mono vandaka kumenga.

“Kansi na nima, mono yantikaka kusosa Nzambi. Bansosa yango kutwadisaka mono na kimvuka mosi yina vandaka kuvukana sambu na kulonguka Masonuku ya Santu. Na lukutakanu yango, bantu ya dikanda yina mono vandaka kumenga kuyambaka mono mbote mpenza! Mpi mono monaka nde, na kati ya kimvuka yango ya balongoki, bantu ya bampusu ya kuswaswana kuvukanaka na ngemba mpi na kyese yonso. Mono yitukaka ngolo mpenza! Yo yina, mono bakisaka mpenza verse yai: ‘Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.’​—Bisalu 10:34, 35.

“Bubu yai, ntima na mono kemengaka dyaka ve bantu ya makanda yankaka. Na kati ya banduku na mono ya ngolo, bankaka kele bantu ya dikanda yina mono vandaka kumenga ntete. Na nsadisa ya Masonuku ya Santu, Nzambi melongaka mono na kuzola bantu.”

Kuyambula Mubulu

Garoga ketuba nde: “Ntangu mono vandaka toko, mono kotaka boloko mbala tatu​—mbala zole sambu na muyibi mpi mbala mosi sambu mono tulaka muntu mosi mbele na nku yonso. Na nima, mono kotaka na kimvuka mosi ya bantu ya mubulu mpi beto fwaka bantu mingi. Ntangu kukonda kuwakana kumanaka, mono kumaka mfumu ya kimvuka mosi ya bangondi yina kebakaka mbongo mpi bansangu ya mfunu na kubangisaka bantu. Bantu yina vandaka kutanina mono vandaka kutambula ti mono konso kisika yina mono vandaka  kukwenda. Mono vandaka muntu mosi ya mubulu mpi ya nku mpenza.

“Na nima, kilumbu mosi, mono tangaka verse yai: ‘Muntu yina ke na zola yandi kekangaka ntima, kevandaka muntu ya mbote, kevandaka na kimpala ve, kekudisongaka ve, kevandaka lulendo mpi ve. Muntu yina ke na zola kesalaka ve mambu ya nsoni, kesosaka ve mambote na yandi mosi, kewaka makasi ve, keyindulaka ve mambu ya mbi ya bantu yankaka mesala yandi.’ (1 Korinto 13:4, 5) Bangogo yai simbaka ntima na mono. Mono kwendaka kuzinga na bwala yankaka, mono longukaka Masonuku, mpi sadilaka bandongisila na yo na luzingu na mono.

“Ntangu yai mono kele dyaka ve muntu mosi ya nku. Kansi, bantu kezitisaka mono bonso longi ya Ndinga ya Nzambi. Luzingu na mono kele ntangu yai na mfunu mpi ti lukanu ya kyeleka.”

Ndinga ya Nzambi Kele ya Ngolo

Bambandu yai mpi ya bantu mingi yankaka kemonisa nde “ndinga ya Nzambi kele ya moyo mpi ya ngolo.” (Baebreo 4:12, NW) Bandongisila na yo kele mpasi ve, ya mayele, mpi yo kepesaka kikesa.

Keti Masonuku ya Santu lenda sadisa nge mpi? Ee, yo lenda sadisa nge na mambu yonso ya mpasi yina nge lenda kutana ti yo. “Bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka, sambu na kubongisa bantu, ti sambu na kulonga bantu na kuzinga luzingu mosi ya kinzambi. Mpidina muntu ya Nzambi ta vandaka me yilama mbote-mbote, yandi ta vanda na mpila ya mbote ya kusala konso kisalu ya mbote.”​—2 Timoteo 3:16, 17.

Yo yina, bika beto tala mwa malongi ya mfunu yina kele na Masonuku ya Santu.

Inki Nge Keyindula?

• Na kati ya masolo yina beto metubila, inki disolo mebenda mpenza dikebi na nge? Sambu na inki?

• Inki mutindu Masonuku ya Santu lenda sadisa nge?

[Kifwanisu ya kele na lutiti 6]

Dumas mpi Sumiatun

[Kifwanisu ya kele na lutiti 7]

Kustriyah mpi Tayib kesamba kumosi konso mpimpa

[Kifwanisu ya kele na lutiti 7]

Goin

[Kifwanisu ya kele na lutiti 8]

Bubu yai, Bambang kele na kyese ya kuvukana ti banduku ya bampusu ya kuswaswana

[Kifwanisu ya kele na lutiti 9]

Garoga kele dyaka ve muntu mosi ya nku kansi longi ya luzitu ya Ndinga ya Nzambi