Sambu na kuvanda nduku ya Nzambi, nge fwete longuka mambu yina metala yandi. Keti banduku na nge mezaba zina na nge mpi bo kesadilaka yo? Ee. Nzambi kezola nde nge zaba zina na yandi mpi nge sadila yo. Zina ya Nzambi kele Yehowa. (Nkunga 83:18, NW; Matayo 6:9) Nge fwete longuka mpi mambu yina yandi ke zolaka ti yina ya yandi kezolaka ve. Nge fwete zaba banani ke banduku na yandi mpi banani ke bambeni na yandi. Yo kelombaka ntangu mingi sambu na kuzaba muntu. Biblia ketuba nde yo kele dyambu mosi ya mayele na kubumba ntangu sambu na kulonguka mambu yina metala Yehowa.—Efezo 5:15, 16.

Banduku ya Nzambi kesalaka mambu yina kepesaka yandi kyese. Yindula fyoti banduku na nge. Kana nge kesadila bo mambu ya mbi ti mambu yina ya bo kezolaka ve, keti bo tavanda kaka banduku na nge? Ata fyoti ve! Yo kele mutindu mosi ti Nzambi. Kana nge kezola kuvanda nduku na yandi, nge fwete sala mambu yina kepesa yandi kyese.—Yoane 4:24.

Mabundu yonso ve kenataka muntu na kukuma nduku ya Nzambi. Yezu, yina kele nduku ya ngolo ya Nzambi, kutubilaka banzila zole. Nzila mosi kele ya nene mpi yo kele ya kufuluka ti bantu. Nzila yango kenataka na lufwa. Nzila yina yankaka kele ya fyoti mpi bantu fyoti mpamba kelandaka yo. Nzila yina kenataka na luzingu ya mvula na mvula. Yo kezola kutuba nde kana nge kezola kuvanda nduku ya Nzambi, nge fwete longuka mutindu ya mbote ya kusambila yandi.—Matayo 7:13, 14.