Kana nge kele na nduku mosi ya nge kesepelaka na yandi mpi ya nge kezitisaka, nge tasala yonso sambu na kuvanda bonso yandi. Biblia ketuba nde: “Mfumu Nzambi kele muntu ya mbote mpenza!” (Nkunga 25:8) Sambu na kuvanda nduku ya Nzambi, beto fwete vanda bantu ya mbote mpenza. Biblia ketuba nde: “Beno kele bana yina ya Nzambi ke zolaka; yo yina beno fweti meka na kusala bonso yandi.” (Efezo 5:1, 2) Tala mwa mambu ya nge lenda sala sambu na kusala bonso yandi:

Sadisaka bantu yankaka. “Beto sala bantu yonso mbote.”—Galatia 6:10.

Vandaka kikesa na kisalu. “Muntu yina vandaka kuyiba, yandi kuyiba diaka ve, kansi yandi kusala kisalu ya mbote na maboko na yandi mosi.”—Efezo 4:28.

Vanda bunkete na nitu mpi na mabanza. “Beto fweti katula mambu yina yonso ke nataka [mvindu, NW] na nitu na beto ti na ntima na beto, beto fweti tula ngolo na kuvanda mpenza bantu ya Nzambi, beto fweti zitisa Nzambi.”—2 Korinto 7:1.

 Zolaka mpi zitisaka bantu yina kele na dibuta na nge. “Konso bakala fweti zola nkento na yandi bonso yandi mosi, konso nkento fweti zitisa bakala na yandi. Beno bana, beno fweti wila batata ti bamama na beno.”—Efezo 5:33–6:1.

Zolaka bantu yankaka. “Beto zolana, sambu kuzola ke katukaka na Nzambi.”—1 Yoane 4:7.

Lemfukaka na bansiku ya insi. “Konso muntu fweti lemfuka na bamfumu ya leta, . . . beno pesa na konso muntu konso kima yina ya beno fweti pesa: beno futa mpaku na bantu yina ya beno fweti futa mpaku.”—Roma 13:1, 7.