Kitini 7

Banani Kesambilaka na Dibundu ya Kyeleka?

1. Inki beto fwete sala sambu na kusepidisa Nzambi?

 SAMBU na kuvanda ti bangwisana ya mbote mpi ya zola ti Nzambi, beto fwete sambila ve na dibundu ya luvunu. Beto fwete sambila na dibundu ya kyeleka. Bantu mingi na ntoto ke na kusala yo bubu yai.

2. Na wapi nge lenda kuta Bambangi ya Yehowa, mpi nki kisalu bo kesalaka?

² Mutindu Biblia kutubaka, bantu yina kesambilaka na kyeleka kesala “ndonga mosi ya bantu mingi” yina mekatuka na ‘makanda yonso, na bandinga yonso ti na bansi yonso.’ (Kusonga 7:⁠9) Na bansi 235, bamilio ya Bambangi ya Yehowa kesadisa ti kikesa yonso bantu yankaka na kulonguka banzila ya zola ya Yehowa mpi mambu yina ya yandi kelombaka.

Kuzaba Bantu Yina Kesambilaka na Kyeleka

3. Bambangi kesambilaka nani, mpi nki mitindu ya lusambu bo kebuyaka?

³ Bambangi kendimaka nde Yehowa mpamba muntu mefwana na kubaka lusambu. Bo kefukamaka ve na ntwala ya biteki to bifwanisu ya mabundu. (1 Yoane 5:21) Bo kesambilaka ve bafwa, yo yina bo kesalaka ve matanga to mambu yankaka yina kepesaka lukumu na balukwikilu ya dibundu ya luvunu mpi na “malongi ya bampeve ya mbi.” (1 Timoteo 4:⁠1) Kansi, sambu na kupesa kikesa na bantu yina kele na mafwa, bo ketendudilaka bo nde Nzambi mesilaka nde yandi tafutumuna bafwa sambu bo zinga na paladisu ya ntoto.​—⁠Yoane 5:​28, 29; Bisalu 24:⁠15.

4. Inki mutindu bantu ya Nzambi ketadilaka mazi?

⁴ Bambangi kesadilaka ve mazi ti kindoki, sambu bo mezaba nde bima yai kekatukaka na Dyabulu. Bo ketulaka ve ntima nde mazi kutanina bo​—⁠bo ketulaka ntima na Yehowa.​—⁠Bingana 18:⁠10.

5. Na inki mutindu Bambangi ya Yehowa kele “bantu ya nsi-ntoto yai ve”?

⁵ Yezu kutubaka nde bantu na yandi tavanda “bantu ya nsi-ntoto yai ve.” (Yoane 17:16) Yezu yandi mosi kubuyaka na kukota na makambu ya politiki ya ntangu na yandi. (Yoane 6:15) Mutindu mosi mpi, Bambangi kekotaka ve na makambu ya politiki, na kuzola ya insi, mpi na kunwanina biyeka ya ntoto yai. Kansi, bo kefutaka mpaku mpi kezitisaka bansiku ya insi yina bo kezingaka.​—⁠Yoane 15:19; Roma 13:​1, 7.

6. Inki bansiku bansadi ya Nzambi kelandaka na yina metala makwela mpi kufwa makwela?

⁶ Sambu bo kelemfukaka na lutwadisu ya luyalu, Bambangi kesonikisaka makwela na bo na leta. (Tito 3:⁠1) Bo kelemfukaka na lutwadisu ya Nzambi, yo yina bo kekwelaka ve bankento mingi. (1 Timoteo 3:⁠2) Dyaka, sambu bo kezitisaka bansiku ya Biblia na luzingu na bo, yo kevandaka mpasi nde makwela ya bansadi ya Nzambi kufwa.

7. Inki mutindu Bambangi kemonisaka zola na kati na bo?

⁷ Bambangi kezolanaka. Zola yai, kumosi ti kuzola ya bo kezolaka Nzambi, kevukisaka bo na kimpangi mosi ya kyeleka, ata bo mekatukaka na bikanda mpi na bansi mingi. Kana kisumbula mesalama to bampangi na bo kele na mpasi, Bambangi kekwendaka nswalu sambu na kusadisa bampangi na bo. Bambangi kemonisaka zola na mutindu bo kezingaka.​—⁠Yoane 13:⁠35.

8. Inki bisalu ya mbi bantu ya Nzambi kebuyaka?

⁸ Bantu ya Yehowa kesalaka ngolo na kuvanda masonga, mpi na kusala mambu ya mbote na luzingu. Bo kebuyaka kuyiba, kukusa, mansoni, kulauka malafu, mpi bisalu ya mumbongo ya kukonda masonga. Babakala kebulaka ve bankento na bo. Na ntwala ya kukuma Bambangi, bankaka vandaka kusala mambu yai, kansi na lusadisu ya Yehowa bo meyambulaka yo. Bo ‘me sukulaka ntima na bo’ na meso ya Nzambi.​—⁠1 Korinto 6:​9-11.

Bo Kesalaka Luzolo ya Nzambi

9. Mukanda mosi kutubaka nki sambu na mabundu ya kimpeve ya Afrika?

⁹ Ya kyeleka, mabundu mingi ketubaka nde bo kele ti kyeleka. Bo lenda sikisa bisalu ya  kuyituka yina bo mesalaka sambu na kundimisa bantu mambu ya bo ketuba. Mu mbandu, na yina metala mabundu yina bo kebingaka nde mabundu ya kimpeve na Afrika, mukanda mosi ketuba nde: “[Bimvuka ya mpa ya Bukristu] mekumaka kusala bisalu yina bantu ya mazi to banganga-nkisi vandaka kusala. . . . Bo ketubaka nde bo ketubaka baprofesi mpi kesalaka bidimbu ya nkumbwa. Baprofete na bo kepesaka bavizio mpi ketendulaka bandosi. Bo kesadilaka masa ya lusampulu, mafuta ya santu, putulu, babuzi mpi ndumbu sambu na kubelula mpi kutanina bantu na maladi.”

10, 11. Sambu na nki bisalu yina mabundu kebingaka nde bidimbu ya nkumbwa bubu yai kemonisaka ve nde Nzambi kendimaka bo?

¹⁰ Bantu ya mabundu yai ketubaka nde bidimbu ya nkumbwa kemonisaka nde Nzambi kesakumunaka dibundu na bo. Kansi yina ya bo kebingaka nde bidimbu ya nkumbwa kemonisaka ve nde Yehowa kendimaka dibundu yina. Satana kepesaka bansambidi ya luvunu ngolo ya kusala “mambu ya kuyituka.” (2 Tesalonika 2:⁠9) Dyaka, Biblia kutubaka nde makabu ya kusala bidimbu ya nkumbwa yina Nzambi kupesaka bantu, mu mbandu kutuba baprofesi, kutuba na bandinga yankaka, mpi mayele ya kuswaswana, zolaka ‘kumana.’​—⁠1 Korinto 13:⁠8.

¹¹ Yezu kukebisaka nde: “Bantu yina ke bingaka mono nde: ‘Mfumu, Mfumu,’ bo yonso ve ta kota na Kimfumu ya Nzambi, kansi bantu yina ke salaka luzolo ya Tata na mono yina kele na zulu, bo kaka bantu ta kota na Kimfumu ya Nzambi. Na kilumbu yina, bantu mingi ta yula mono nde: ‘Mfumu, Mfumu! Beto ve bantu vandaka kuzabisa nsangu ya Nzambi na zina na nge? Beto ve bantu vandaka kubasisa bampeve ya mbi na zina na nge? Beto ve bantu vandaka kusala bidimbu mingi na zina na nge? Na ntangu yina mono ta tubila bo nde: ‘Mono me zabaka beno ntete ve. Beno bantu ke salaka mambu ya mbi, beno katuka awa na meso na mono!’ ”​—⁠Matayo 7:​21-23.

12. Banani takota na Kimfumu ya zulu?

¹² Ebuna banani takota na Kimfumu ya zulu? Kele bantu yina kesalaka luzolo ya Yehowa.

Bo Kelongaka Kimfumu ya Nzambi

13. Inki kisalu Nzambi ketwadisa bantu na yandi na kusala na bilumbu na beto, mpi banani kesala yo?

¹³ Luzolo ya Nzambi sambu na bantu na yandi kele nki na bilumbu na beto? Yezu kutubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Matayo 24:14) Yai kele kisalu ya Bambangi ya Yehowa kesalaka ti kikesa yonso.

14. Kimfumu ya Nzambi kele nki, mpi nani tayala na Kimfumu yina?

¹⁴ Na “nsi ntoto ya mvimba,” Bambangi ya Yehowa ke na kuzabisa nde Kimfumu ya Nzambi kele luyalu ya zulu yina tayala ntoto ya mvimba na lunungu. Bo kelongaka nde Yehowa meponaka Kristu Yezu sambu yandi kuvanda Ntotila ya Kimfumu yina, kumosi ti bantu 144 000 ya bo ponaka na kati ya bantu sambu na kuyala ti yandi.​—⁠Daniele 7:​14, 18; Kusonga 14:​1, 4.

15. Kimfumu tafwa inki?

¹⁵ Bambangi kesadilaka Biblia sambu na kusonga bantu nde Kimfumu ya Nzambi tafwa ngidika yonso ya Satana. Kimfumu tafwa kimakulu dibundu ya luvunu ti malongi na yo yina kepesaka Nzambi nsoni mpi kepesaka Dyabulu lukumu! (Kusonga 18:⁠8) Yo tafwa mpi kimakulu baluyalu yina kele na kimbeni ti Nzambi!​—⁠Daniele 2:⁠44.

16. Kristu Yezu tayala banani, mpi bo tazinga na wapi?

¹⁶ Dyaka, Bambangi ya Yehowa kezabisaka bantu nde Kristu Yezu tapesa balusakumunu ya kitoko kibeni na bantu yonso yina kesalaka mambu ya Nzambi kelombaka. Bo tavanda bantu yina yandi tayala na ntoto. Biblia kesila nde: “Yandi ta sadisaka bantu ya mawa yina ke didila yandi ti bantu ya kukonda muntu ya kusadisa bo. Bansukami ti bantu yina ke na ngolo ve, yandi ta wilaka bo mawa; yandi ta sadisaka bantu yina ke na mpasi.”​—⁠Nkunga 72:​12, 13.

17. Kaka banani bantu kesamunaka Kimfumu ya Nzambi?

¹⁷ Kele ve ti kimvuka yankaka ya bantu yina kesalaka luzolo ya Nzambi na kulongaka nsangu ya mbote ya Kimfumu. Kaka Bambangi ya Yehowa bantu kezabisaka Kimfumu ya Nzambi na ntoto ya mvimba.

[Bangiufula ya disolo ya kulonguka]

 [Bifwanisu ya kele na lutiti 23]

Bambangi ya Yehowa kele ya kuvukana na kimpangi ya ntoto ya mvimba