Mutindu kifwanisu yai ya kele na diboko ya kitata ke monisa yo, bantu mingi ke yindulaka nde na Kilumbu ya Kusambisa, bo ta nata mioyo mingi kibeni na ntwala ya kiti ya kimfumu ya Nzambi sambu na kusambisa bo sambu na mambu yina bo vandaka kusala mpi nde bantu ya nkaka na kati na bo ta zwa dibaku ya kukwenda na zulu mpi nde bankaka diaka ta kwenda kuniokwama na bilungi ya tiya. Kansi yai kele ve mambu ya Biblia ke longaka. Yo ke tubaka nde na Kilumbu ya Kusambisa, Nzambi ta katula bantu na kimpika ya mambu ya mbi. (Nkunga 96:13) Nzambi me tulaka Yezu Zuzi sambu na kuvutula diaka mambu ya mbote na ntoto ya mvimba.—Tanga Yezaya 11:1-5; Bisalu 17:31.

Adami, bakala ya ntete, kolamaka na luzolo yonso na Nzambi, yo yina bana na yandi yonso me kumaka bampika ya disumu, ya bampasi mpi ya lufwa. (Baroma 5:12) Sambu na kumanisa mambu yai ya mbi, Yezu ta futumuna to ta vutula na luzingu bantu mingi kibeni yina me fwaka. Mukanda ya Kusonga ke tuba nde Yezu Kristu ta sala mambu yai na nsungi yina yandi ta yala bamvula 1 000.—Tanga Kusonga 20:4, 11, 12.

Mutindu mukanda ya Kusonga kapu 20 ke monisa yo, bo ta sambisa bantu yina ta futumuka na kulanda mambu yina bo ta sala ntangu bo ta longa bo mambu yina ta vanda na “barulo” ya mpa yina ta basika kansi ve na kulanda mambu yina bo vandaka kusala na ntwala nde bo fwa. (Baroma 6:7) Ntumwa Polo ke tuba nde “bantu ya lunungu ti bantu ya kukonda lunungu” ta vanda na kati ya bantu yina ta futumuka yina bo ta longa mambu ya Nzambi.—Tanga Bisalu 24:15.

Bantu yina me fwaka kukonda nde bo longa bo mambu ya Yehowa Nzambi mpi kukonda nde bo zwa dibaku ya kusadila yandi, ta vanda na ntangu yina ti dibaku ya kuyambula mambu ya mbi mpi ya kusala mambu ya mbote. Kana bantu yai kukuma kusala mambu ya mbote, “lufumuku [na bo ta kuma] ya luzingu.” Kansi bantu ya nkaka yina ta futumuka ta zola ve nde bo longa bo mambu ya Yehowa. Yo yina lufumuku na bo ta kuma “lufutumuku ya kusambisa.”—Tanga Yoane 5:28, 29; Yezaya 26:10; 65:20.

Na nsuka ya Kilumbu ya Kusambisa yina ta baka bamvula 1 000, Yehowa ta sadisa diaka bantu ya bulemfu na kukuma ti luzingu ya mbote kibeni kaka mutindu yandi vandaka ntete kuzola banda na luyantiku. (1 Bakorinto 15:24-28) Yai nsangu ya mbote kibeni sambu na bantu yonso ya bulemfu! Na kumekama ya nsuka, Satana ta lungisa dezia bamvula 1 000 ya kukanga na dibulu ya nda mpi na nima Nzambi ta basisa yandi kuna sambu yandi meka diaka kupusa bantu na kukolama na Yehowa. Kansi bantu yina ta buya kulanda Satana ta zinga mvula na mvula na ntoto.—Tanga Yezaya 25:8; Kusonga 20:7-9.

Biblia ke tubilaka mpi “kilumbu ya kusambisa” sambu na kutubila mambu yina ta nata nsi-ntoto yai na nsuka. Kilumbu yai ya kusambisa ta kwisa na kintulumukina kaka bonso Mvula ya Ngolo yina fwaka bantu yonso ya mbi ya bilumbu ya Noa. Kansi nsangu ya ke pesa kiese kele nde kubika fioti mpenza, “bantu yina ke vwezaka Nzambi” ta fwa mpi bantu ya mbote ta zinga na ntoto ya mpa mpi kuna kaka “[mambu ya mbote] ta vanda.”—Tanga 2 Piere 3:6, 7, 13.