TALA mambu bau mesala Yezu! Bau mebula yandi bansonso na nti na kutobulaka yandi maboko na makulu. Inki lufwa ya mpasi mutindu yai. Sambu na nki bau mesala mambu ya mutindu yai na Yezu?

Yau kele sambu bantu mingi kumengaka ngolo kibeni Yezu. Na kati ya bambeni na yandi vandaka Satana Dyabulu, wanzyo ya mbi yina kupusaka Adamu na Eva na kukolama na Jéhovah. Kaka yandi Satana muntu mepusa bambeni ya Yezu na kusala yandi mambi yai.

Na ntwala ya kubula yandi bansonso na nti, bambeni yina fingaka Yezu ngolo kibeni. Yibuka dyaka kukangama na yandi na masamba ya Getesemane. Bambeni ya Yezu vandaka banani? Bamfumu ya mabundu. Kansi nki mambu kubwaka na nima?

Mpila bau monaka nde bau mekanga Yezu, balongoki na yandi kutinaka mpi kubikisaka yandi kaka yandi mosi na bambeni na yandi. Bau waka boma mingi. Kansi Pierre na Jean kukwendaka ve ntama kibeni mpi bau mekaka na kulanda yandi sambu na kutala nki mpila mambu zolaka kusuka.

Bantu kunataka ntete Yezu na mbuta Anna, nganga-Nzambi ya nene. Yandi sukininaka ve kuna. Na nima, bau nataka yandi na Kaïfe, yina vandaka ntangu yina nganga-Nzambi ya nene. Bamfumu mingi ya mabundu kutanaka na nzo na yandi.

Bau sambisaka Yezu na nzo ya Kaïfe. Bau kotisaka bantu yina fundaka mpamba Yezu. Bamfumu ya mabundu tubaka na ndinga ya ngolo nde: ‘Yandi fwete fwa.’ Na yau, bau losilaka yandi mate na luse mpi bau bulaka yandi.

Na ntangu yina, Pierre bikalaka na kibansala. Bonso madidi vandaka, bau tulaka tiya mpi bantu vandaka kuyotila yau; Pierre mpi vandaka pana. Kansi nsadi mosi ya nkento monaka yandi mpi talaka yandi mbote-mbote ye tubaka nde: ‘Tala muntu mosi vandaka mpi na Yezu.’

Pierre vutulaka nde: ‘Luvunu!’

Mbala tatu bau tubilaka Pierre nde yandi mpi vandaka longoki ya Yezu. Mbala tatu yandi buyaka Yezu. Na kubuya ya mbala ya tatu, Yezu balukaka mpi talaka Pierre. Ebuna Pierre monaka mpasi, yandi basikaka mpi dilaka.

Na Kitanu, na suka, ntangu mwini mebasika, banganga-Nzambi nataka Yezu na Sanedrin. Bau tubanaka na kati na bau sambu na kuzaba nki bau lenda sala yandi. Na nima, bau nataka Yezu na Ponce Pilate, mfumu ya distrike ya Judée.

Bau tubaka na Pilate nde: ‘Muntu yai kele muntu ya mbi. Yandi fwete fwa.’ Na nima ya kuyula Yezu, Pilate tubaka nde: ‘Mono memona mambi ve ya muntu yai mesala.’ Ebuna Pilate tindaka Yezu na Hérode Antipas, mfumu ya Galilée, yina kuvandaka mpi na Yerusaleme kilumbu yina. Hérode mpi monaka ata mambi mosi ve na Yezu. Yandi vutulaka Yezu na Pilate.

Pilate zolaka kubika yandi, kansi bambeni ya Yezu lombaka nde muntu ya boloko yankaka kubasika na kisika ya Yezu. Muntu yina vandaka Barabas. Yau vandaka kiteso ya midi ya Pilate nataka Yezu na nganda mpi tubaka na bantu nde: ‘Beno tala ntotila na beno!’ Kansi banganga-Nzambi tubaka nde: ‘Fwa yandi! Fwa yandi!’ Ebuna Pilate bikaka Barabas mpi pesaka bau Yezu sambu na kufwa yandi.

Na Kitanu, na luyantiku ya ntangu ya nkokila, bau bulaka Yezu bansonso na nti. Bau tulaka mpi na nti bimpumbulu zole, mosi na diboko ya kitata mpi yankaka na diboko ya kimama. Nge lenda mona bau awa na kifwanisu. Na ntwala ya lufwa ya Yezu, mosi na kati ya bimpumbulu yina tubaka nde: ‘Yindula mono ntangu nge takwisa kuvutuka sambu na kuyala.’ Yezu vutudilaka yandi nde: ‘Nge tavanda na mono na Paladisu.’

Tala kilaka ya kitoko! Inki paladisu Yezu vandaka kutubila? Paladisu yina Nzambi salaka na luyantiku vandaka wapi? Awa na ntoto. Ntangu Yezu tayala yantika kuna na zulu, yandi tafutumuna muntu yina na Paladisu ya mpa na ntoto. Mambu yina yonso kepesa beto kikesa!