Mutangi ya Luzolo:

Keti nge ke kudiwaka pene-pene na Nzambi? Bantu mingi ke monaka nde yo lenda salama ve. Bankaka ke monaka nde Nzambi kele ntama kibeni; bankaka diaka ke kudimonaka nde bo me fwana ve mpenza. Kansi Biblia ke siamisa beto na zola yonso nde: “Beno kwenda pene-pene na Nzambi, mpi yandi ta kwisa pene-pene na beno.” (Yakobo 4:8) Nkutu, yandi ke ndimisaka bansadi na yandi nde: “Mono Yehowa Nzambi na nge, ke simba nge na diboko ya kitata mpi ke tubila nge nde: ‘Kuwa boma ve, mono ta sadisa nge.’”—Yezaya 41:13, NW.

Inki mutindu beto lenda sala bangwisana ya ngolo ya mutindu yai ti Nzambi? Sambu na kusala kinduku ti muntu, yo ke lombaka ntete kuzaba yandi mpi kusepela mpenza ti bikalulu na yandi. Yo yina, kulonguka mutindu Nzambi ke salaka mambu mpi bikalulu na yandi, mutindu Biblia ke monisa yo, kele mfunu mingi. Kuyindulula mutindu Yehowa ke monisaka konso kikalulu na yandi, kumona mutindu Yezu Kristu monisaka yo na mutindu ya kukuka mpi kubakisa mutindu beto lenda yedisa yo, ta sadisa beto na kukwenda kibeni pene-pene na Nzambi. Beto ta bakisa nde Yehowa mpamba me fwana na kuvanda Mfumu ya luyalanganu. Diaka, yandi kele Tata yina beto yonso kele ti mfunu na yandi. Sambu yandi kele ngolo, lunungu, mayele mpi zola, yandi ke yambulaka ve ata fioti bana na yandi ya kwikama.

Bika nde mukanda yai kusadisa nge na kukwenda kibeni pene-pene na Yehowa Nzambi, mpi kusala bangwisana ya kukonda nsuka ti yandi, sambu na kuzinga luzingu yina ta pesa yandi lukumu kimakulu.