DILONGI 71
Yehowa Taninaka Yezu
Na insi mosi na esti ya Izraele kuvandaka ti bantu yina vandaka kukwikila nde bambwetete lenda twadisa bo. Kilumbu mosi na mpimpa, bantu ya nkaka yina katukaka na ndambu ya Esti monaka kima mosi yina vandaka kumonana bonso mbwetete ya ke sema ngolo ke tambula, mpi bo landaka yo. “Mbwetete” yango nataka bo na Yeruzalemi. Bantu yango yantikaka kuyula bantu nde: ‘Mwana yina ta vanda ntotila ya Bayuda ke na wapi? Beto me kwisa kufukimina yandi.’
Ntangu Erode, ntotila ya Yeruzalemi, waka mambu ya ntotila ya mpa, yandi kudiyangisaka mingi. Yandi yulaka mfumu ya banganga-nzambi nde: ‘Ntotila yai fwete butuka na wapi?’ Bo songaka yandi nde: ‘Baprofete tubaka nde yandi ta butuka na Betelemi.’ Yo yina, Erode bingaka bantu yina katukaka na Esti mpi songaka bo nde: ‘Beno kwenda na Betelemi mpi beno sosa mwana yina. Beno kwisa kuvutuka mpi beno songa mono kisika yandi kele. Mono ke zola kufukimina yandi mpi.’ Kansi yandi vandaka kukusa.
“Mbwetete” yantikaka diaka kutambula. Bantu yina landaka yo tii na Betelemi. “Mbwetete” telamaka na zulu ya nzo mosi mpi bantu vandaka na kati ya nzo yango. Bo monaka Yezu ti mama na yandi Maria. Bo fukamaka na ntwala ya mwana mpi bo pesaka yandi makabu ya wolo, olibani, mpi mire. Keti Yehowa muntu tindaka bantu yai na kusosa Yezu? Ve.
Na mpimpa yina, Yehowa songaka Yozefi na ndosi nde: ‘Erode ke sosa kufwa Yezu. Baka nkento na nge ti mwana mpi beno tina na Ezipte. Beno bikala kuna tii kuna mono ta songa beno na kuvutuka.’ Na mbala mosi, Yozefi ti dibuta na yandi kwendaka na Ezipte.
Yehowa songaka bantu yina katukaka na Esti nde bo fwete vutuka ve na kisika ya Erode. Ntangu Erode bakisaka nde bantu yina vutukaka ve na kisika na yandi, yandi waka makasi mingi. Sambu yandi lendaka ve kuzwa Yezu, yandi pesaka nsiku nde bo fwa na Betelemi bana yonso ya fioti yina kele mvula mosi ti Yezu. Kansi Yezu vandaka na lutaninu, ntama na Ezipte.
Na nima, Erode fwaka. Yehowa songaka Yozefi nde: ‘Sesepi nge lenda vutuka.’ Yozefi, Maria, ti Yezu vutukaka na Izraele, mpi bo kumaka kuzinga na mbanza ya Nazareti.
“Mutindu mosi mpi, mambu ya ke basika na munoko na mono ta vanda mutindu yina . . . , mpi yo ta nunga kibeni na mambu yina mono me tinda yo na kusala.”—Yezaya 55:11
Nge Lenda Sepela Mpi Ti
YEZU KELE NZILA, KIELEKA, MPI LUZINGU
Bantu Yina Ke Zabisaka Mambu Yina Ta Salama na Bilumbu Ke Kwisa na Nzila ya Bambwetete Me Kwenda Kutala Yezu
Sambu na nki mbwetete yina bo monaka na Esti nataka bo ntete na Erode ntotila ya nku kansi ve na Yezu?
YEZU KELE NZILA, KIELEKA, MPI LUZINGU
Bo Me Tina Mfumu Mosi ya Nku
Bambikudulu tatu ya Biblia ya me tala Mesia me lungana na luyantiku ya luzingu ya Yezu awa na ntoto.
