Ntangu bantu ya Nazareti me sosa kufwa Yezu, yandi me kwenda na Kapernaumi, pene-pene ya Nzadi-Mungwa ya Galilea, yina bo vandaka mpi kubinga “dizanga ya Genezareti.” (Luka 5:1) Diambu yai me lungisa mbikudulu yina mukanda ya Yezaya tubaka nde bantu ya Galilea yina ke zinga na lweka ya nzadi-mungwa ta mona nsemo ya mingi.—Yezaya 9:1, 2.

Ya kieleka, awa na Galilea, Yezu ke landa kulonga nde: “Kimfumu ya zulu me kuma pene-pene.” (Matayo 4:17) Yezu me mona balongoki na yandi iya. Bilumbu me luta, bo vandaka kutambula ti yandi, kansi ntangu bo katukaka na Yudea ti Yezu, bo vutukilaka kisalu na bo ya kuloba. (Yoane 1:35-42) Kansi, ntangu me lunga sambu bo tambula ntangu yonso ti Yezu na mpila nde yandi longa bo mutindu bo ta landa kusala kisalu ya kusamuna ntangu yandi ta vanda ve.

Ntangu Yezu ke tambula na lweka ya nzadi-mungwa, yandi me mona Simoni Piere, mpangi na yandi Andre mpi banduku na bo ke yidika babukondi. Yandi me pusana, me kota na maswa ya Piere mpi me lomba yandi na kunata yo na kati ya masa, ntama ti ntoto. Ntangu bo me kuma mwa ntama, Yezu me vanda mpi yandi me yantika kulonga bantu yina kele na lweka ya nzadi kieleka ya me tala Kimfumu.

Na nima, Yezu me songa Piere nde: “Kwenda kisika yina kele mudindu, mpi beno losa babukondi na beno sambu na kukanga bambisi.” Kansi Piere me tuba nde: “Longi, beto salaka ngolo mpimpa ya mvimba mpi beto kangaka kima ve, kansi sambu nge me songa mono, mono ta losa babukondi.”—Luka 5:4, 5.

Bo me losa babukondi mpi bo me kanga bambisi mingi kibeni yo yina babukondi me yantika kupasuka. Na mbala mosi, balongoki ya Yezu me binga banduku na bo yina kele na maswa ya kele pene-pene na kukwisa kusadisa bo. Na mbala mosi, bamaswa yonso zole me fuluka ti bambisi mpi yo me yantika kudinda. Ntangu Piere me mona mambu yina, yandi me bwa na makulu ya Yezu mpi me songa yandi nde: “Mfumu, katuka na ntwala na mono, sambu mono kele muntu ya masumu.” Yezu me songa yandi nde: “Bika kuwa boma. Banda ntangu yai nge ta kangaka bantu ya moyo.”—Luka 5:8, 10.

Yezu me songa Piere ti Andre nde: “Beno landa mono, ebuna mono ta kumisa beno balobi-bantu.” (Matayo 4:19) Yandi me binga mpi balobi-mbisi ya nkaka zole Yakobo ti Yoane, bana ya Zebedeo. Bo mpi me landa yandi kukonda kusukinina. Bo yonso iya me yambula kisalu na bo ya kuloba bambisi mpi me kuma balongoki ya ntete ya Yezu ya ntangu yonso.